"Сылнылык тӱня" рубрик, 2017 ий, Кылме тылзын 3-шо кечыже

МарГУ-н ик эн чолга студентше

Статьян авторжо Анастасия Эманова

Татар ӱдыр Альмира Гарифуллинам тӱрлӧ молодежный мероприятийлаште шуко гана ужынам. А шукерте огыл тудо Сочиште самырык тукымын да студент-влакын XIXтӱнямбал фестивальыштышт лийын.

_VEbwFk9tl4Йошкар-Олаште шочын-кушшо Альмира МарГУ-со юридический факультетыште магистратурышто кокымшо курсышто тунемеш. «Вич ияш улмем годым ача-авам мыйым англичан йылме дене занятийлаш коштыкташ тӱҥалыныт. Йылмым сайын палем, садлан тӱнясе тӱрлӧ фестивальлаште участвоватлаш йӧнем уло. Спортым йӧратем. 28-ше №-ан лицейыште тунемме годым визымше классыште баскетбол дене модаш шӱмаҥынам. Лицейысе командына республикнам Российысе таҥасымашлаште шуко гана арален. А вара спортын ты видше дене университетын командыштыже модынам», — ойла ӱдыр.

- Альмира, калык-влак, тӱвыра кокласе кыл шотышто мероприятийлаш кунамсек коштат?

- 2013 ийыште «InterSeliger» самырык-влакын тӱнямбал форумышто лийынам. Тушто тӱнясе политике, калык-влак кокласе кылым вияҥдыме шотышто мутланенна. Мылам тидыже оҥай лийын. Марий Элыште шуко национальностян еҥ-влак илат. Кажныжын – шке культурыжо, историйже, илыш умылымашыже. Ме пырля келшен илышаш улына. Вашла умылаш тунемаш манын, кундемыштына тӱрлӧ пашам ворандарен шогыман. Тиде шонымаш денак тылеч вара тыгай сынан мероприятийлаште участвоватлаш тӱҥалынам. Бакалавриатыште кокымшо курсышто тунемме годым МарГУ-со калык-влак кокласе келшымаш клубын чолга еҥже-влак дене палыме лийынам да шкежат клубын пашашкыже ушненам, кызыт тудын председательже улам.

- Республикыштына кажне ийын студент-влаклан «Келшымаш кӱвар» национальный культур фестиваль, конфессий йодыш шотышто тӱрлӧ «йыргешке ӱстел» эреак эртат. Ты тематике дене кылдалтше у форматан иктаж-могай мероприятийым палемдыза.

- Тений шошым МарГУ-н тӱҥ корпусыштыжо «Открой свое сердце всему миру» night-festлийын. Тыгайже республикыштына икымше гана эртаралтын. Ӱмаште декабрьыште Марий университетыште «Единство России в дружбе» форум лийын. Тудын деч вара студент-влак калык-влакын культурышт дене палыме лияш у форматан мероприятийым ышташ шоненыт. Night-fest шуматкече кастене эртен. Тушко 2500 утла еҥ толын. Чылан «Наследие народов мира» выставкым ончен кертыныт, 2000 утла еҥ тӱрлӧ мастер-класслаште участвоватлен, 700 наре еҥ актовый залыште, а тудо 450 веран, концертым ончен. Тӱрлӧ национальностян 150 студент мастарлыкшым ончыктен. Мутлан, Таджикистан ден Узбекистанын представительышт ик номерым пырля ямдыленыт. Тидын дене калык-влак кокласе келшымашым ончыктеныт да пеҥгыдемденыт.

китайыште альмира покшелне- Альмира, татар самырык тукым могай?

- Моткоч чолга улына. Мый Марий Элысе «Бердэмлек» татар самырык тукымын ушемыштым вуйлатем. Ушемын членже-влак ӱмаште Озаҥыште лийше татар самырык тукымын тӱнямбал форумышкышт миен толынна. Тушко 30 эл, Российысе 60 регион гыч 900 утла самырык еҥ погынен. Форумышто татар йӱлам, тӱвырам арален кодымаште, вияҥден шогымаште самырык тукымын рольжо нерген мутланенна, тидын шотышто у проект-влакым ямдылаш тыршенна.

Ушемна тылеч посна шкежат мероприятий-влакым ямдыла. «Мый татарла ойлем» акцийым эртарена, Йошкар-Оласе татар тӱвыра рӱдерыште шочмо йылме дене войзымо фильм-влакым самырык-влаклан ончыктена, вара тудын шотышто шке шонымашнам ойлена. Киргиз ӱдыр-рвезе-влак дене пырля ӱмаште келшымаш касым эртаренна. Ӱмаштак рӱдерын специалистше-влак дене пырля йоча-влакым «Палет мо Тукайым?» модыш-квестыш ушенна.    

Мемнан ушем – моло регионласе татар ушем дене сай йолташ. Интернетлан кӧра кылна ок йом. Идалыкыште кок гана Озаҥыште татар самырык тукымын кечыже эртаралтеш. Тушко чолга еҥ-влак чыла регион гыч погынат. Тений тыгай форумым Марий Элыштат эртараш манын, проектым возенна. Кызыт тидын шотышто вашмутым вучена.

- Палем: тый республикысе калык-влакын молодежный ассамблейыштын членже улат. Ты организацийын участникше семын татар койышетым кушто ончыктет?

- Татар улмем дене кугешнем. Англичан йылмым веле огыл, шочмо йылмем палымаш мыйым Китай марте «конден». Тений майыште Москошто Евразийысе калык-влакын ассамблейыштын погынжо эртен. Тушто мыят лийынам. Юл кундем федеральный округ Китай дене пырля «Волга-Янцзы»  проектым илышыш шыҥдара. Кок арнялан Китай гыч эн чолга студент-влак мемнан деке тунемаш толыт, а ме – нунын деке. Тений МарГУ-н икмыняр студентше дене пырля  Поднебесный элыште лияш пиал шыргыжлын. Китайын культуржо, калыкше мыйым сымыстареныт. Самырык улмо годым тыгай мероприятийлаш кошташ йӧным кычалман. Тиде шӱм-чон поянлыкым веле огыл пуа, тыгак профессионально кушкаш полша. frnpN37tIx8

- Йылмым, шке калыкым йӧратымаш – чылажат еш гыч тӱҥалеш. Еш йӱлада уло, очыни.

-  Авам оласе, а ачам Параньга район Пӧртчара ялыште шочын-кушкын. Ачам марла умыла. Тудо мыйым чын лияш, вес еҥлан полшаш, калыкнан йӱлажым шуктен шогаш да ешнам аклен мошташ туныктен. Ме кажне ийын Сабантуй пайремыште уло родо-тукымна дене вашлийына. Юмылан ӱшанена, садлан мусульман календарь почеш Ураза байрамым, Курбан байрамым эреак палемдена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: