"Олимп" рубрик, 2017 ий, Кылме тылзын 17-ше кечыже

Сеҥымаш шулдыраҥда

Статьян авторжо Анастасия Эманова

Спортын тӱрлӧ видше дене заниматлен, пӱжвӱд дене пырля чыла кӱлеш-оккӱл шонымаш уш гыч лектеш, да чонлан ласка лиеш. Садлан спорт кап-кылым веле огыл пеҥгыдемда, тыгак ласкалыкым пуа. Тыге шона куштылго атлетике дене спорт мастерыш кандидат Алексей Ахтямов.

Тиде марий рвезе Шернур посёлкышто шочын, тыштак ила, тыштак «Тазалык памаш» аптекыште провизорлан пашам ышта.

XNEf6Lze5Gc- Алексей, спортлан кунам шӱмаҥынат?

- Изи годсек куржталам. Андрей изам дене таҥасен-таҥасен куржталынна. Тудо эре ончылно лияш йӧратен. Мыят почеш кодын омыл. Когыньнамат спортлан ачана Юрий Абдрахманович шӱмаҥден. Тудын куржталмыжым ончен кушкынна. Таҥасымашке мемнам чӱчкыдын коштыктен. Ончыч «Шернур-Лажъял» кокла кужытым ыштат ыле.  Районысо эн тале спортсмен-влак куржталыштыныт. Нуным эре куанен онченам. Ончыкшым мыят нунын гай тале спортсмен лиям манын шоненам.

Школышто футболым йӧратен шынденам. 8-ше класс марте спортын ты видше дене веле заниматленам. А вара угыч куржталаш тӱҥалынам.  

- Кечеш тренировкылан мыняр жапым ойыреда?   

- Тренировкым кажне кечын ыштем, рушарнян веле организмлан канаш пуэм. Кечеш ик-кок шагатым куржталам. Фартлекым ыштем. Фартлек – шкешотан модыш. Эн ончыч писын куржат, вара эркынрак. Тыгай тренировко писылыкым вияҥдаш поснак чот полша. Курыкан верлаштат куржталам. Тренировко годым 8 меҥгым, южгунам 30-35 меҥгым куржам. Марафонлан ямдылалтам гын, конешне, шукырак меҥгым куржаш перна.

 - Молан куштылго атлетикым ойырен налынат? Йоча годым шукын спортын икмыняр видше дене иканаште заниматлат. Шкалан келшышыжым кузе пален налаш? Ӱдыр-рвезе-влаклан тидын шотышто могай каҥашым пуэт?

- Футболла модынам. Спортын ты видыштыже, командыште модын, икте-весым  умылен моштымо дене веле  сеҥымашке шуаш лиеш. Куштылго атлетикыште чылажат шкендын вий гыч шога. Сайын тренироватлалтыт, лектышат сай лиеш. А сеҥымаш мылам шулдырым пуа. Мый йӧратем ончылно лияш.

Куштылго атлетике тазалыкым пеҥгыдемдаш полша, вий-куатым пуа, дисциплинылан туныкта. Йоча сайын куржеш гын, спортын моло видше денат шукыж годым сай лектышым ончыктен кертеш. А чонлан келшышым жап эртымеке умылаш лиеш, шонем.

 - Палем: шуко спортсмен тренировкым ыштымышт годым мурым колыштын куржталыштыт. А тый могай мурым колыштат?

- Мылам пӱртӱсын «семже» утларак ямле. Кайык-влакым мурымыштым, мардеж пуалме йӱкым эн чот колышташ йӧратем. Куржталме годым тӱрлым шонкалем. Мом ыштенам? Мом ыштышаш уло да моло нергенат. Конешне, куржталме годым, шонкален, «каваште чоҥештыман» огыл, корнышто эре тӱткӧ лийман. Машинам шекланыман, велосипедист ден йолешке-шамычым, пий-влакым эскерыман. 

 - Спортышто могай кӱкшытыш шуынат?

- Школышто тунемме годым районысо кросслаште эреак призовой верым налынам. А 11-ше классыште тунемме годым Йошкар-Олаште тунемше-влакын республикысе чемпионатышт эртен. Тушто кумшо лийынам. Вара ме, призовой верыш логалше-влак, республикнан чапшым Озаҥ олаште Юл кундем округысо чемпионатыште араленна. Тунам мый тыгай кугу таҥасымаште икымше гана лийынам.

Озаҥысе медицине кугыжаныш университетын фармацевтический факультетыштыже тунемме годым университетын чапшым араленам. Ятыр сеҥымаш лийын. Вуз-влакын чемпионатыштышт 1,5-10 меҥгым куржмаште икымше улам. 2009 ийыште ПФО-н Чебоксарыште эртаралтше первенствыштыже кумшо верым налынам. Но эн кугу сеҥымашлан куштылго атлетике дене Российын чемпионатыштыже кумшо лиймем шотлем. Такшым марафонышто шуко гана вием тергенам, республикыште сеҥымаш ятыр лийын.

 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: