"Мыланна латкудыт" рубрик, 2017 ий, Кылме тылзын 24-ше кечыже

Творчествылан шӱман Лиана

Статьян авторжо Анастасия Эманова

Татарстан Республик Балтаси район Улисьялыште шочын-кушшо Лиана Фёдорова марла кушташ, мураш йӧрата.

федороваУсталык шӱлышан ӱдыр мастарлыкшым чыла шӧрыныштат нӧлташ тырша. Тудо тыгак сайын сӱретла, гитар дене шокта, тӱлӧ шымлыме пашам возаш йӧрата. «Ципья школышто 11-ше классыште тунемам. Балтаси районышто ик марий ял гына. Улисьялыште чылан марла мутланат, марий улмышт дене моткоч кугешнат. Кугу олаште, я вес ялыште улына, маршрутко машинаште кудалына гынат шочмо йылме дене мутланаш огына вожыл. 2011-2015 ийлаште Улисьял клуб пеленсе «Оҥгырвуй» ансамльыште куштенам, а 2015 ий годсек «Улисьял вел» фольклор ансамбльыш коштам. Марий муро ден марий национальный тувырын тӱрышт мыйым творчествылан эре шӱмаҥдат. Коллектив дене районлаш, Марий Элыш гастроль дене чӱчкыдын  лектына. Тӱрлӧ конкурслаште мастарлыкнам ончыктенам. Мутлан, Балтаси районышто кажне ийын куштымаш да мурымаш конкурс-влак эртаралтыт. Тушто эреак 1-ше да 2-шо лийына. Икана районыштына Семык фестиваль эртен. Тушто «Чевер ӱдыр» конкурсышто участвоватленам да 3-шо верым налынам. Такшым мый тӱрлӧ калыкын куштымашыштым куштем, но марий куштымаш чонемлан эн лишыл да йӧратыме», — ойла Лиана.

Л.Федерова визытанлан веле тунемаш тырша. Математике, биологий да марий йылме дене олимпиадылаште шинчымашыжым терга, биологий дене тӱрлӧ шымлыме пашам ышташ йӧрата. Врач лияш шона. ЕГЭ-лан кызытак кыртмен ямдылалтеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: