"Улам мый Рве-зы-лык!" рубрик, 2017 ий, Кылме тылзын 17-ше кечыже

«Эн сай самырык воспитатель»

Статьян авторжо Анастасия Эманова

10 ноябрьыште Национальный президентский школ-интернатыште «Педагогический дебют» конкурсым иктешленыт.

ВоспитательКонкурсышто 34 туныктышо шке мастарлыкшым, пӱсӧ уш-акылжым ончыктен. Кажныже шке пашаштыже могай кӱкшытыш шумыж нерген презентаций йӧн дене палдарен. Жюри сеҥыше-влакым кум номинацийыште: «Самырык туныктышо», «Самырык воспитатель» да «Педагог-наставник» -  палемден. Волжск оласе ешартыш образованийым пуышо экологий рӱдерын туныктышыжо, директорын туныктымо паша шотышто алмаштышыже Е.А.Буркова эн сай наставник лийын. «Самырык туныктышо» номинацийыште Йошкар-Оласе 5-ше №-ан кыдалаш школышто англичан йылмым, руш йылме ден литературым туныктышо Е.А.Александрова сеҥен. А Эн уста самырык воспитатель лӱмым Звенигово оласе «Светлячок» комбинированный видан йочасадын туныктышо-логопедше Н.В.Александрова налын. Надежда Вячеславовна конкурсышто шкенжым кугу профессионал семын ончыктен. Тудо почмо урокышто йоча-влакым вигак сымыстарен.

«Чот тургыжланенам. «Педагогический дебют» конкурс – икымше кугу сеҥымашем. Мый 2011 ийыште МарГУ-со специальный коррекционный педагогике факультетым тунем пытаренам. «Светлячок» йочасадыште икымше ий веле пашам ыштем, садлан конкурсышто икымше верым налмылан моткоч куаненам. Тыгай таҥасымаш профессионал семын кушкаш йӧным пуа, — ойла Н.Александрова. – Туныктшо-логопед лияш неле. Такшым образований аланыште ышташ нигунам куштылго огыл. Ме йоча-влак семынак эре тунемына. Илыш ончыко кая, кажне ийын тунемме программыште мо-гынат вашталтеш, у технологий пура. Чыла тидым эскерен шогена да тунемына. Садлан туныктшо лияш – чап, но тыгодымак неле, шуко ӱнарым йодшо паша. Йоча-влак занятийлашкем кумылын коштыт, ойлымем чыла шукташ тыршат. Тидыже мыйым моткоч куандара. Чаманен каласыман, кызыт шуко йоча начарын ойла. Занятийлаште йылмым лывырташ тыршена. Йочан тӱҥын ойлымыжо экологий, аван тазалыкше, тыгак кочмо дене кылдалтын, очыни Ме, логопед-влак, тидым тӧрлаш полшена. Ик йочалан жап шукырак кӱлеш гын, весе вашке сайын мутланаш тӱҥалеш».

Надежда Вячеславовна ончыкшым«Идалыкысе воспитатель» конкурсышто вийжым тергаш шона. Тидлан кызытак кыртмен ямдылалташ пижын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: