"Кугарнягудо" рубрик, 2017 ий, Теле тылзын 25-ше кечыже

Китайыште туныктышо — эн пагалыме еҥ

Статьян авторжо Елена Годунова

- Илышыште шке шонымаш дене илыман, йöратыме пашам шуктыман да шке вийлан ӱшаныман, — манеш Китайысе Пекин олаште туныктышылан пашам ыштыше марий ӱдыр Анастасия Веткина. bZLcD45-2FkНастя Морко посёлкышто шочын-кушкын, тысе 1-ше номеран школышто 8-ше класс марте тунемын. Тыгак верысе музыкальный школышто скрипке дене шоктен. Школышто ӱдырын эн йöратыме предметше англичан йылме лийын. Тудым визымше класс гыч Фатыма Агзямовна Гмызова туныктен. Ӱдырын ойлымыж почеш, туныктышын йылмым сайын палымыже да туныктен моштымыжо тудлан ты йылмым келгын тунемаш кумылым луктыныт. Сандене 8-ше класс деч вара Йошкар-Олаште политехнический лицей-интернатыште гуманитарный профилян классыш тунемаш пурен. Вара Татарстанысште кугыжаныш гуманитарно-педагогический университетыште эрвел йылме-влак факультетыште англичан да араб йылме-влакым туныктымо специальность дене тунем лектын. Университетым ӱдыр йошкар диплом дене тунем пытарен. Озаҥ оласе ик школышто туныктышылан кум ий пашам ыштен, вара Москошто — ик ий. Йоча-влак дене пашам ыштымыже да Китайыш каяш тарванымыж нерген Настя тыгерак ойла: — Студент годым туныктышын профессийже тыгай неле лиеш манын, ик ганат шонен омыл. Эн ончыч йоча-влакын йолагай улмышт öрыктарен, öрканымыштат керек, кумылыштак тунемаш уке. Кокымшо: кугу олалаште ача-ава-влак пеш торжа улыт. Иктаж-мо ок келше гын, чечас вуйшиймашым возат. Но чыла тидыже мыйын туныкташ шонымо кумылемым волтен огыл. Вет мый англичан йылмым йöратенам, санденак эн ончыч икшыве-влакым туныкташ шонен, пашам ыштенам. Ныл n8UWLcgKpb8ий туныктымо деч вара умыленам: лач школышто веле жапым эртарен илаш ок лий. Туныктышын яра жапшат лийшаш, тыге духовный поянлык ешаралтеш, умбакыже туныкташ кумыл шочеш. Санденак ты паша гыч каяш шонен пыштенам. Лач тыгодым пырля тунемме йолташ ӱдырем Китайыш англичан йылмым туныкташ каяш темлыш. Мыланем шканемат Российысе ден Китайысе школ-влакын ойыртемыштым, туныктымо методикыштым таҥастарен ончаш оҥай ыле. Тыге TESOL программе почеш дистанционный курсышто йолташ ӱдырем дене пырля тунемын, сертификатым нална. Ты программе англичан йылмым йот йылме семын туныкташ правам пуа. Вара кӱлеш документым поген, Пекиныш чоҥештышна. Тыште мемнан палыме еҥ-влак илат. Толмеке, кумшо кечынак пашам муынна. Йолташ ӱдырем дене ик компанийыштак пашам ыштена. Мемнан босна — американец, шкеже Алабама гыч. Китай йоча-влакым англичан йылмылан Америке методике почеш туныктена. Ик группыш вич йоча деч шукын огыт кошт, шукыж годым коктын але кумытын веле улыт. Тыште йоча-влакым чынжымак туныктымыла чучеш. Россий деч утларак келша. Шкенан элыште ятыр жап планым, отчетым, моло тӱрлö кагазым возымылан кая гын, тыште йöршеш вес семын. Туныктымо рӱдерыште йоча-влак моткоч ушан улыт. Вич ияшак алфавитым палат, лудын, возен моштат. Шуко йоча ондак Америкыште илен, сандене англичан йылме дене сайын кутырат. Китайыште туныктышым пагалыме еҥлан шотлат. Сандене тудым эре «Учитель» маныт. Тыге каласыме деч вара вигак пагалымашым шижат, Храм неба воктенетидыже куандара да пашам ышташ кумылым луктеш. — Пекин — моткоч сöрал ола докан. Кушто лийын шуктенат? — Чынак, ты олаште моткоч шуко мотор вер уло. Толмеке, эн ончыч Пекинысе кугу зоопаркыште лийынна. Тушто ме вич шагат утла коштынна, но чыла вере пурен шуктен огынал. Тушто океанариум уло. Мийымына годым вӱдыштö илыше янлык-влакын шоушкышт логалынна ыле. Шоум руш муро почеш эртареныт. Олаште Ябаолу лӱман руш район уло, тудо ужалыше районлан шотлалтеш. Ме тудын воктене илена. Тышке шуко руш бизнесмен толеш. Шукыштлан эн ончыч, очыни, ты элысе Кугу Китайысе пырдыж палыме. Пекин олаште пырдыж-влак утларак аралалт кодыныт. Ме чыла вережак миен шуын огынал, но эн палыме Бадалин участкыште лийын шуктенна. Тышке моткоч шуко турист коштеш. Каныш кечылаште иктаж вере эре коштына. — Китаец-влак могайрак улыт? Руш-влакым пагалат мо? — Тыште шкешотан калык ила. Руш еҥлан нунын койышыштым южгунам умылашат неле. Мутлан, общественный верыште, вожылде, нерыштым пургедыт, шӱведат. Кочмышт годым чопкат, кодшо кочкышым умшашт гыч кӱварыш шӱвалын кертыт. Ӱдыр-влак косметике дене огыт пайдалане, ик вургемым арня дене чиен коштыт, тыгодым йöршеш огыт гладитле. Пырля пашам ыштыше ик китай ӱдырым йолташ ӱдырем шинчапуным, тӱрвым чиялташ туныктен ыле. Китайыште шуко тӱрлö национальностян калык ила. Шукышт вашла огыт келше, но руш еҥ-влакым тыште моткоч пагалат. — Китайыште ыштен лукмо сатум Российысе кевытлаште ужалат, тидын нерген мом ойлен кертат? — «Made in China» сату-влак Российыште, чынжымак, шуко ужалалтыт. Китайыште нуным шулдын налаш лиеш манын эре шоненам, но йоҥылыш лийынам. Ужалыме кугу рӱдерлаште сатун акше Российысе деч шукылан шерге. Интернет-кевыт гоч заказатлаш гын, шулдынрак налаш лиеш. Сандене тысе калык тидым умылен шуктен, шукышт интернет-кевыт дене пайдаланат. «Taobao» сайт ик эн палымылан шотлалтеш. Ты приложений тыште илыше кажне еҥын сото телефоныштыжо уло. Мыят икмыняр вургемым тыге налынам, сатум 3-4 кече веле вучыман. Мутлан, сай качестван сумкан акше кондымо дене пырля 500 теҥгеш веле шуын ыле. — Кочкыш шотышто кузерак? Колынам: тушто шукыж годым рисым кочкын илат? — Толмеке, тысе кочкышым кузе кочкыт манын шоненна. Ончыч тудо мыланна тамлын чучын огыл. Кызыт гын моткоч йöратена. Китай калык шӱрым ок коч, кокымшо кочкышлан утларак шӱман улыт. Шукыж годым рисым иктаж гарнир дене кочкыт. Гарнирлан брокколим, китай ковыштам, кешырым, помидор ден муным, чыве шылым, фасольым кучылтыт. Кинде ден шöр продукций тыште моткоч шерге. Российысе окса дене ик сукыр кинде да ик литр шöр 150 теҥгеш шуеш. Тусо лудо моткоч тамле кочкышлан шотлалтеш, сандене тышке толшо турист-влак тудым кочде огыт кай. — Могай пайремым кумдан палемдат? Кузе тудым эртарат? — Тыште Туныктышын кечыжым 10 сентябрьыште пайремлат. Шыжын ик эн кугу пайремжылан Великий арня шотлалтеш. Тений тудо октябрь тӱҥалтыште эртен. Ты арнян еҥ-влак ешышт дене чумыргат да тӱрлö путешествийыш коштыт. Пайремын символжылан юбеины пирожный да краб шотлалтыт. Садлан, йӱла почеш, ешыште нуным вашла пöлеклышаш улыт. Китайыште У ий пайремым февральыште пайремлат, тунемше-влак январь мучаш гыч февраль мучаш марте каникулыш каят.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: