"Рубрик деч посна", 2017 ий, Теле тылзын 13-шо кечыже

Марий рвезе тӱнябал чемпионатлан тулым чӱктен

Статьян авторжо Елена Годунова

s_cfmE3KpmI

2018 ийыште 14 июнь гыч 15 июль марте Российыште футбол дене тӱнямбал чемпионат лиеш. 11 олаште футбол дене матч-влак эртат. 14 ноябрьыште ты чемпионатым эртарыме годым Москосо, Калининградысе, Самарасе тӱҥ зданий да стадион-влакым электротул дене обслуживатлыше подстанций-влакым эксплуатацийыш колтеныт. Россий президент В.Путинын командыж почеш кум оласе стадионлаште электротулым чӱктеныт. Тудым марий кундемын шочшыжо, «Пресня» подстанцийын инженерже Константин Гориновлан (снимкыште) ӱшаненыт.

Москосо «Пресня» подстанций «Лужники» спорт комплексым, Москва-Сити рӱдерым электротул дене обслуживатла. 1978 ийыште тудым 1980 ийысе олимпиадылан лӱмын чоҥеныт. 2013 ийыште ты подстанцийыште олмыктымо паша ышталтын. У оборудованийым шындымылан кöра тудын пашам ыштыме куатше, кок пачаш ешаралтын.  Ончыч 560 МВт куатан лийын гын, кызыт 952 МВт дене ышта. Марий Элысе подстанцийын пашам ыштыме эн кугу куатше 464 Мвт шуэш.

Константин Кужеҥэр посёлкышто шочын. Аваже  Надежда Ивановна Коҥганур кыдалаш школышто тӱҥалтыш класслам туныктен. Сандене ешыже рвезын кок ияшыж годым Тумньымучаш ялыш илаш куснен. Костя спортлан изинек шӱмаҥын. Тӱҥ шотышто футболым, куштылго атлетикым, ече спортым йöратен. Республикысе, районысо таҥасымашлаште ятыр гана призовой верым налын. Сеҥымашке шуаш Коҥганур школышто тунеммыж годым тренерже В.С.Еменгулов чот тыршен.

К.Гориновшколым шöртньö медаль дене пытарен. Вара Марий кугыжаныш университетын электроэнергетический факультетышкыже тунемаш пурен. Школышто тудлан точный предмет-влак келшеныт, поснак физикым йöратен. Садлан энергетик лияш шонен пыштен.

- Энергетикын пашажым ондакысек кӱкшын аклат. Карьер тошкалтыш дене кӱшкö кӱзымаште, шке вийым шуарымаште, тӱрлö технологийым шымлымаште шуко йöным ышта. Университетыште «Электроснабжение» специальность дене инженерлан  тунемынам.  Спорт денат кылым кученам. Икымше курс гычак телымсе полиатлон дене (ече, турникыште шкем нöлтымö, лӱйкалымаш) заниматленам.  Кокымшо курсышто ты вид дене спорт мастерыш кандидатын норматившым шуктенам. 2012 ийыште МарГу-м тунем лекме деч вара Москосо федеральный научный агроинженерный рӱдерыш аспирантурыш тунемаш пуренам, тыгак тусо «МОЭСК» ПАО-што   подстанцийым обслуживатлыше инженерлан пашам ышташ тӱҥалынам.

Сай илышым ме шке чоҥена. Садлан тудлан негызым пыштыме деч ончыч чылажымат шотыш налын, висен ыштыман. Костян примерже шуко самырык ӱдыр-рвезылан шке ончыкылык илышышт нерген шоналташ тарата, шонем.

Тӱнямбал чемпионатым эртараш электротулым пуымо подстанций-влакым эксплуатацийыш колтымо да тудым чӱкташ Костялан ӱшаныме нерген, рвезе тыгерак каласкалыш:

- Электротулым чӱктымашке кö толшашым ончыч пален огынал. Чӱктымö деч икмыняр кече ончыч веле Владимир Путин командым пуа манын каласеныт. Кум олаште электротул чӱкталтмым эфирыште ик семын ончыктыман. Йоҥылыш ынже лий манын, кум кече репетироватленна.  Моско ден ола-влак коклаште кужыт тӱрлö, сандене сигналым пуымо жап рӱдö олаште ойыртемалтеш. Эфирыште тулым чӱктымо кажне олаште ик семын ончыкталтше манын, кнопкым темдал мошташ кӱлын. Кнопкым темдалме кылын тӱҥ каналже деч посна тыгак кок резервной канал лийын. Тудо иктаж экшык лектеш гын, полшымо шот дене ышталтын.

Путин командым Ситуационно-аналитический рӱдер гыч пуэн. Ты рӱдерым базе пелен чемпионатыште электровийым пуаш лӱмын ыштыме. Кнопкым темдалше мемнан компанийыште тыршыше кум еҥым темленыт ыле. Нунын кокла гыч иктыже – мый. Ойырымо деч ончыч кажнынан резюмежым шымленыт, мемнан дене мутланеныт. Тыге ты сомылым шукташ мыланем ӱшаненыт. Мый тидлан чот куаненам.. Инженер семын веле огыл, тыгак оперативно-диспетчерский пашаште умбакыжым вияҥаш кумыл лектын. Чемпионатым эртарыме объектлаште «Пресня» компаний электротул дене ӱшанлын обслуживатлаш тӱналеш манын, пеҥгыдын каласен кертам. Вет ты событий элыштына да мыланнат кугулан шотлалтеш. Ӱшанем: тӱнямбал футбол команде-влак шке модмышт дене куандарат, а Российысе команде деч сай модмым вучена.

Подстанций-влакым эксплуатацийыш колташ кнопкым темдалме верым футбол пасу семын келыштареныт, а кнопкыжым — меч семын. Тидыже футбол чемпионат дене кылдалтын. А ты меч кнопкым марий рвезылан темдалаш ӱшанымышт мыланнат кугешнымаш!

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: