"Олимп" рубрик, 2017 ий, Теле тылзын 15-ше кечыже

Сборныйыш логалаш уло вийжым пышта

Статьян авторжо Анастасия Эманова

9-10 декабрьыште Киров олаште 1998-1999 ийлаште шочшо юниор-влакын самбо дене чемпионатышт лийын. Тушто марий рвезе Константин Кудрявцев 100 кг нелытан категорийыште кокымшо верым налын.

Кудрявцев шолаштеКостя – Курыкмарий район Кулаковы селан шочшыжо. Красноволжский кыдалаш школышто 9-ше класс марте тунемын. Кызыт Йошкар-Оласе Олимпийский резерв училищын студентше. «Икымше классыштак спорт дене заниматлаш тӱҥалынам. Футболла модынам, ече дене коштынам. Кокымшо классыште тунемме годым кугурак ийготан йоча-влакын дзюдо секцийыш коштмыштым пален налынам. Мыйынат тушко миен толаш кумыл лектын. Занятий-влак келшеныт, да спортын ты видшылан жапым утларак ойыраш тӱҥалынам. Икымше тренерем Александр Иосифович Петров лийын, а кызыт мыйым тӱрлӧ таҥасымашке Сергей Александрович Ялпаев ямдыла. 

Дзюдо, самбо дене заниматле, физически веле огыл, морально пеҥгыде лиям. Спортын нине видшылан кӧра шкем да лишыл еҥ-влакым аралаш тунемынам. Такшым уремыште конфликтан ситуаций деч кораҥаш тыршем.

Икымше таҥасымашыш кокымшо классыште тунеммем годым миенамн, тунам республикыште кокымшо верым налынам.  Тӱрлӧ чемпионатыште ятыр гана призер да чемпион лийынам. Юл кундем федеральный округышто тунемше-влакын 2015 ийыште лийше спартакиадыште визымше верым налынам. Но тиде кумылым волтен огыл, ончыкшым утларак заниматлаш пижынам. Кечеш кок гана тренировкым эртарем. Эрдене  ик шагат да кастене ик шагат утла. Вара шокшо але контрастный душышто организмым пеҥгыдемдем», — ойла 18 ияш спортсмен.

Костян канде ӱштыжӧ да икымше кугыеҥ разрядше улыт. Тудо Российын сборныйышкыже логалнеже да тӱнямбал таҥасымаште чемпион лийнеже. Сборныйыш логалаш Российын чемпионатыштыже сеҥыман. Тудо вес ийын февральыште эрта. Кызыт К.Кудрявцев эшеат чот тыршен заниматла.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: