"Улам мый Рве-зы-лык!" рубрик, 2017 ий, Теле тылзын 14-ше кечыже

Студент отрядыште пашам ышташ оҥай

Статьян авторжо Анастасия Эманова

 6 декабрьыште Марий Элысе Самырык-влаклан полатыште студент паша отряд-влакын слётышт лийын. Тушто отряд-влакын кеҥежым ыштыме пашаштым иктешленыт.

Тений 38 отряд Марий Элыште да вес кундемлаште пашам ыштен. Студент-влакын кокла пашадарышт 18 тӱжем теҥге лийын. Чоҥымо, туныктымо, сервисный отрядла, кӱртньыгорно вагонлаште проводник, специализированный: утарыме, экологический, медицинский — отряд-шамыч тӱрлӧ вере пашам вораҥдараш полшеныт.

лутошкина1Юлия Лутошкина:

- Студотрядыште пашам ышташ келша. Проводник я сервисник, вожатый але электрик улат – тӱҥжӧ пашам йӧратен ыштыман. Тунам чылажат куштылгын чучеш. Конешне, южгунам нелылыкымат шижат. Тыгай годым пырля пашам ыштыше йолташет полыш кидым шуялта, кӱлеш каҥашым пуа, поро мут дене кумылым нӧлта. Мый МарГУ-со «Милосердие» педагогический отрядын членже нылымше ий улам. Тиде жапыште республикыштынат, вес кундемыштат куд сменым пашам ыштена. Тений кеҥежым «Лесная сказка» лагерьыште вожатый лийынам. Шкеже педагогике да психологий факультетыште тунемам.

захароваМарина Захарова:

- 2013 ий годсек проводник-влакын отрядыш коштам. Тений кеҥежым проводниклан пашам ыштен кертын омыл, но  студент отряд-влакын слётыштышт лийынам. Проводниклан лӱмын курсым эртенам, экзаменым кученам. Москосо Беларус да Ленинград вокзаллаште, тыгак Санкт-Петербургысо Моско вокзалыште пашам ыштенам. Анапыш, Новороссийскыш кайыше поездыште проводник лийынам. Ты пашалан кӧра Мурманс, Великий Новгород, Ярославль олалам ужынам.

смирноваНаталья Смирнова:

- МарГУ-што тунемме годым проводник-влакын отрядышкышт ушненам. 2010-2013 ийлаште ныл кеҥеж пашам ыштенам. Проводникын пашаже моткоч оҥай. Тӱрлӧ койыш-шоктышан еҥ-влак дене вашлият, кажныж дене мутланен моштыман. Шуко олаште лийынам. Тушто йолташ-влакым муынам. Кызытат соцсетьыште нунын дене вашла вазкалена. Шем теҥыз воктене оксам тӱлыде канаш йӧн лийын. Проводникын пашаже шукылан туныктен. Кызыт студент омыл. Сузлаште да вузлаште тунемше ӱдыр-рвезе-влаклан паша отрядлаш ушнашышт кӱлешак, шонем.

 

решетоваЮлия Решетова:

- Мый МарГУ-со «Милосердие» педагогический отрядын боецше да «Детские и молодёжные социальные инициативы» общероссийский мер организацийын волонтёржо улам. Кумшо ий «Милосердие» отрядыш коштам. Тений Крымыште «Арт-Квест» лагерьыште вожатый лийынам, пеш келшен. Сутдент паша отряд – тӱрлӧ вашлиймашлан поян, куан кумыл дене темше илышем. Отрядыште пашам ыштен, шке вийым тергена, паша ӱнарнам ешарена, мастарлыкнам нӧлтена. Студент пагыт эн сай жап манын ойлат. А студент отряд – эн сай жапын сай татше.

Александр Ефимов:ефимов

- Студотрядыште пашам ышташ куштылгыжак огыл. Но тушто ыштыме жап нигунам ок мондалт, чонышто сай шарнымашым веле кода. Студотряд-влак – уло Россий мучко кугу еш. Отряд-влакын Российысе слётыштышт лийын, ме, самырык-влак, опытым погена, у йолташ-влакым муына, чон дене канена. Мый Марий Элысе линейный студотрядын командирже кумшо ий улам. Кок ий почела мемнан отрядын еҥже-влак Санкт-Петербургышто пассажир вагонлаште проводниклан ыштат.

Архангельск гыч тӱҥалын Абхазийысе Сухуми марте кудалын эртыме. Кӱртньыгорнышто пашам ыштыме шкешотан романтике. Студент-влак поездлаште йӧратен пашам ыштат, южыштым эсогыл тушко пашаш кодыт. 6 декабрьыште лийше республикысе слётышто кумшо паша семестрым иктешленыт, эн сай студентым палемденыт. Ме икымше курсышто тунемше студент-влаклан пример лийшаш улына. Мемнан паша лектышнам ончен, нунын отрядлаш ушнаш кумылышт лекшаш. Студент пагытыште шкем чолган ончыктыман. Шоҥгеммеке вара тиде пагытым шарнаш тӱҥалына

 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: