"Улам мый Рве-зы-лык!" рубрик, 2017 ий, Теле тылзын 14-ше кечыже

Тошто марий куштымаш чонжым савырен

Статьян авторжо Анастасия Эманова

Кодшо кугарнян Марий кугыжаныш университетын «Марий Мурсем» мурышо да куштышо ансамбльжын чапле концертше лийын. Мероприятий университетын (ончычсо пединститутын) актовый залыштыже эртен да ансамбльлан 15 ий теммылан пӧлеклалтын. Ансамбльыш коштшо ӱдыр-рвезе-влак мастарлыкышт дене ончаш толшо влакым куандареныт, марий тӱвыранам кӱшкӧ нӧлтеныт. А таче тендам, лудшына-влак, «Марий Мурсемын» ик участницыже Алёна Мамаева дене палдарена.

мамаева1Алёна – У Торъял район Тушнур ялын ӱдыржӧ. Шкеж нерген А.Мамаева теве мом ойла: «Ныл классым Чӱксола школышто тунемынам, а 5-11-ше класслам – У Торъял кыдалаш школышто. Тӱҥалтыш класслаште тӱрлӧ сценкыште модынам, почеламут конкурслаште участвоватленам, пырля тунемме йолташем-влак дене школысо мероприятийлаште мурымат муренам. Почеламут-влакым тунемаш, сылнын лудаш моткоч йӧратем. Сергей Есенинын творчествыже чонемлан лишыл. Ты поэт – элнан моторлыкшым ужын моштышо да тудым моктышо, уло шӱм-чонжо ден йӧратыше лирик. Тидын денак тудо мыйым сымыстарен.

Школышто сайын тунемаш тыршенам. Поснак англичан ден марий йылме-влакым йӧратенам. Нине предмет дене тӱрлӧ конкурсышто да олимпиадыште участвоватленам. А школ деч вара МарГУ-со Калыкле тӱвыра да тӱвыра кокласе кыл институтыш марий йылме да литературым.

Йот йылмым (финн да англичан) туныктышылан тунемаш пуренам. Кызыт кумшо курсышто улам.

Мураш-кушташ изинек йӧратем. Йоча годым ковам дене пырля «Шӱмсем пӧлек» да «Шонанпыл» передаче-влакым эреак онченам. Ешыште авам сылне йӱкан. Тудо школышто тунеммыж годым мурен, хорын солисткыже лийын. Ондак Тушнур ялын усталык шӱлышан еҥже-влак клубыш мураш да кушташ погынат ыле. Мыят коштынам. Ме Пеледыш пайремыште эреак выступатлыме, районысо муро да куштымаш конкурслаштат мастарлыкнам ончыктенна.

«Марий Мурсем» ансамбльыш икымше курсышто тунемме годым кошташ тӱҥалынам. Тунам тудын художественный вуйлатышыже Родион Сергеевич Алексеев мураш да кушташ кумылан-влакым ансамбльыш поген. Тӱрлӧ куштымашым куштена. Шернур вел куштымаш утларак келша. Костюмат пеш сӧрал. Тошто марий куштымашымат моткоч йӧратем, Пошкырт вел куштымаш оҥай, рвезе-влакын тыбырдикышт поснак чот кумылым савыра. Ансамбль мылам кокымшо еш гай лийын. Тыште шуко йолташым муынам. Яра жапнам пырля веселан  эртарена. Ансамбльым вуйлатыше Родион Сергеевич – мыланна ача гаяк. Тудо пеш поро, весела, ура чонан пӧръеҥ. Уремыште вашлийына гын, эреак шогалеш, тӱрлым мемнан деч йодыштеш».

Алёна кажне репетицийым чон вургыжын вуча. Эртыше концерт тудлан кугу событий лийын. «Ансамбльын лӱмгечыжлан шуко да кыртмен ямдылалтынна. Кажне кечын репетицийыш коштмо, кас мучко муренна, куштенна. Но чыла тиде арам лийын огыл. Мыйын шонымаште, концертна сайын эртен. Ончаш толшо-влак мемнам шокшын вашлийыныт. Тидыже кеч-могай артистлан эн кугу ак. Ончыкшымат пашана дене куандараш тӱҥалына. Ме республикысе чыла гаяк районышто концертым ончыктенна. Йошкар-Оласе йочасадлаште, Шкетан лӱмеш Марий театрыште, Сеҥымашын XXXидалыкше да Ленин лӱмеш лӱмеш тӱвыра полатлаште выступатленна. Марий Эл деч торашке миен коштын огынал, но, йӧн лектеш гын, вес кундемыштат марий койышнам эше ончыктена, шонем», — мане А.Мамаева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: