"Ме марий улына" рубрик, 2018 ий, Шорыкйол тылзын 22-шо кечыже

Баритон ден тенор йӱкан мурызо

Статьян авторжо Эльвира Терентьева

Петров

Шернур район Кукнур вел Купсолаште шочшо да кызыт Карелийысе Кондопога олаште илыше чолга Петров нерген поро мутым ондакат колынам ыле. Тений 11 январьыште Виталий Ильич 70 ийым темен. Тачат самырык еҥ семынак мер пашаште чолган тырша, хорышто мура. Икманаш, тудын койышыжым ончен куанет, поро кумылым шарен шогышо марий еҥ семын пагалымаш шочеш.

- Ачам ден авам кум ияш улмем годым ойырленыт, — ойлыш шкеж нерген Виталий кочайна. — А 9 ийым темымеке, авам колен. Сандене йоча жапем Казанскийысе йочапӧртыштӧ эртен. Интернатыште ача-ава сурт деч сайжак огыл гынат, тиде пагыт нерген волгыдо шарнымаш веле кодын. Класс вуйлатышына Елизавета Яковлевна Яндулова ыле. Кызыт тудо Шернур посёлкышто ила. Лач интернатыште эн ӱшанле илыш йолташым вашлийынам – Лёша Куршаковым. Тудо Кукнур деч торасе огыл Поповка (ялже пытен) гыч ыле. А 8-ше класс деч вара Волжскысо 2-шо №-ан училищыш тунемаш каенам.

Практикыш В.И.Петровым Марий целлюлоз-кагаз комбинатыш колтеныт. А тылеч вара Кондопога олашке логалын. Тунам выпускник-влакым налаш тусо Кагазым ыштыше-влакын тӱвыра пӧртыштым вуйлатыше Пётр Гурьев лӱмынак толын.

- «Ачам-авам уке. Молан каяш огыл?» шоналтышым тунам, — каласкала шкеж нерген Виталий Ильич. — Ме тушко кандашын тарванышна. Лёша Куршаковат пырля ыле. Туддене ик кечын – 1967 ий 23 октябрьыште – армийыш кайышна. Финляндий деч торасе огыл разведвзводышто служитленам. Но ик жап гыч мемнам ойырышт: мыйым — Выборгыш, а тудым Заполярьеш колтышт.

Специальностьшо дене кагаз комбинатыште сушильщик лийын, но варажым технологлан пашам ыштен. Ты пашалан чумыржо 40 ийым пуэн. Кызыт тудын кок шочшыжат – 43 ияш Валера ден 40 ияш Лариса – ты комбинатыштак тыршат. Эргыже — сушильщик, а ӱдыржӧ – мастер.

Пелашыже, Нина Николаевна, торговльышто пашам ыштен, ужалыше гыч тӱҥалын заведующий марте кушкын. Марий пӧръеҥ лишыл еҥже нерген тынар моктеммутым ойлен мошта, ӧраш веле кодеш. Сай озаватын кӱэштме когыльыжымат кочкын ончымет шуын колта…

Хорыш мураш коштмыж нерген гын лым лийде каласкален кертеш. Тыгай хоббилан жапым да йӧным 2000 ийыште веле муын гынат, кызыт илышыштыже кугу верым налеш. «Карельская акварель» академический хорын чапше чынжымак нӧлталтын. Тысе участник-влак, 2007 ийыште музыкальный конкурсышто Гран-прим сеҥен налмеке, Москошто эртыше гала-концертыште вич номер дене выступатленыт. А теве 9 декабрьыште хорын лӱмгече концертше лийын.

Виталий Ильич «Карелийысе марий-влак» мер организацийын Кондопога оласе филиалжым вуйлата. Кызыт Кондопога олаште марла мутланыше да ты мер ушемыш ушнышо лу утла еҥ веле шотлалтеш. Нуно чӱчкыдынак Петрозаводскысо марий-влак дене тӱрлӧ пашам ворандарат. Тӱшкаште

Кажне ийын чолга пӧръеҥ Йӱштӧ кугыза лиеш. Тений оласе ик йочасадысе кум группышто ньога-шамычым куандарен. «Тыгай кумылжо кузе шочын?» йодмемлан ? уныкан Виталий кочай адак шке оҥай историйжым ойлыш. «Мемнан хорнам Барселоныш ӱжыныт ыле, — манеш тудо. — Тушко каяш ешартыш оксам ышташ шонен, йочасадыш дворниклан пурышым. Тыгак мый ачалкалыме-тӧрлатыме сомылымат ыштенам. А икана Йӱштӧ кочай лияш темленыт. Тыге ынде кажне ийын тыгай ю кумылым шӱм-чонышкем пуртем да йоча-влак коклаште шараш тыршем».

Тора кундемыште ила гынат, марла чаткан кутырымыжо путырак келшыш. Мутланаш йӧратыше, поро кумылан, а йӱкшӧ сымыстарен моштышо. «Иктаж-могай семӱзгар денат ала шоктеда?» — тудын уста улмыжым утыр палынем. «Мыйын семӱзгарем – баритон ден тенор йӱкем. Тудо илышыштем волгыдо корным ончыкта», — вашмутшо путырак куандара. А вара хорлан марий мурым темлымыжым ойла. Йӧратыме мурыжо — «Эҥер вӱд ӱмбалне».

Тудо кеч-могай темылан кече мучко мутланен кертеш докан. Шочмо кундемже тудын шӱм-чонжым поснак ырыкта. Тышке кодшо кеҥежым толын, родо-тукымжым ужын каен. Тиде кумылжак ятыр поро сомылым шукташ тарата. Эше ик гана лӱмгечыда дене!

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: