"Олимп" рубрик, 2018 ий, Шорыкйол тылзын 26-шо кечыже

Дисциплинылан эн ончыч туныкта

Статьян авторжо Анастасия Эманова

Киокусинкай каратэ дене Марий Эл Республикысе федерацийын членже, тренер-инструктор Михаил Васинов тӱрлӧ таҥасымаште ончыл верыш чӱчкыдын лектеш. Тудо каратэ дене шым ияшак заниматлаш тӱҥалын. Ты япон боевой искусство нерген марий рвезе шуко пала. Шке опытшо, моштымашыж гоч йоча-влакым каратэлан шӱмаҥда. Тудо Йошкар-Оласе 6-шо №-ан школышто да Медведево район Руш Кукмарий школышто тунемше-влаклан треинровкым эртара.

W6vmusVASF0- Михаил, кушечын те улыда? Япон боевой искусствым кунам йӧратен шынденда?

- Йошкар-Олаште шочынам. Ван Даммын, Чак Норрисын, Дольф Лундгренын модмо фильмлаштым ончен кушкынам. Нуно актер веле огыл, а профессионал спортсмен улыт. Нуным ончен, мыят тале спортсмен лиям манын шоненам. Шым ияш улмем годым ачам мыйым троллейбус паркыш каратэ секцийыш конден.  Арняште кум гана занятий лийын. Мыйын ончыч коштмем шуын огыл. Шортынам, ача-ава деч тренировкыш ынышт колто манын сӧрваленамат. Ачам мыйым пӧръеҥым куштен. Нелылыкым сеҥен лекташ, шке мутлан оза лияш туныктен. Тидлан мый тудлан кугу таум ойлем. Икмыняр жап гыч таҥасымашыш кошташ тӱҥалынам. Конешне, сеҥымаш иканаште лийын огыл. Тидлан мый шуко тыршенам. Да кок ий гыч 1997 ийыште рвезе-влак коклаште каратэ дене Россий первенствыште призер лийынам. Ий гыч ийыш мастарлыкем нӧлтенам, япон боевой искусствын философийжым умылаш тунемынам. Профессием дене автомеханик улам. Тидлан мый Йошкар-Оласе аграрный колледжыште тунемынам. Кызыт МарГУ-н студентше улам. Физкультурым туныктышо лияш ямдылалтам.

- Моло единоборствысо приёмым тренировкышто кучылтыда? Йоча-влакым туныктымаште эн ончыч кушеч тӱҥалман?

- Тӱрлӧ техникым кучылтына. Каратэ дене тӱрлӧ стиль уло. Кажныже мо дене гынат ойыртемалтеш. Но тӱҥжӧ тудак кодеш. Йочам эн ончыч дисциплинылан туныктена. Койышышто, чиемыште, мутланымаште дисциплине лийшаш. Вара тӱҥ технике-влаклан туныктена. Тренировко комплексым эртарена. Йочан физически веле огыл, кӧргӧ вийжым шижам гын, тудым вес икшыве дене спарингыш лукташ лиеш.

- Мо дене киокусинкай каратэ моло стиль деч ойыртемалтеш?  

- Бойым эртарыме технике, стойко, перыме дене ойыртемалтеш. Тыгак таҥасымашым эртарыме правилат весе. Чыла стилян картэ дене федераций уло. Ме киокусинкай, тыгак вес тӱрлӧ каратэ денат таҥасымашлашке коштына. Киокусинкай – «общество абсолютной истины» манын кусаралтеш. Кажне тренировко шкешотан ритуал дене тӱҥалеш да пыта. Каратист-влак, кеч кугу опытан, кеч тӱҥалше улыт, ик залыште заниматлат, икгай идеалышке шуаш тыршат. Тренировкым тӱҥалме деч ончыч чыла кӱлеш-оккӱл шонымаш нерген мондышаш улына. Тренировкым эртарымылан вашла тауштена, вуйнам савалтена. Тидыже туныктышо, тунемше-влак деке пагалымашым ончыкта.

Япон йылмым ом пале, но счётым, командым тунемшем-влаклан японла ойлем.

Noyt14DL1iI- Тренировкышто иктаж-могай саркуралым кучылтыда?

- Мыйын шкемын нунчаки оружий уло. Тудым кучылтын моштем, но йоча-влаклан ом туныкто, кӱлешлыкшат уке, вет каратэ яра кид дене кредалмаш манын кусаралтеш. Оружийым кучылтде шкем аралаш тунемына.

- Ӱштыда тендан могай?

- Киокусинкай каратэште чылаже 10 дан. Дан – боевой искусствышто разряд. Мыйын кокымшо разрядем уло. Эн кугу дан киокусинкай стильым шонен лукшо мастерын Масутацу Ояман лийын. Российыште Шихан Беловын шымше дан уло. Тылеч кугу элыштына иктынат уке. Ученический ӱштыжак лу. Шем ӱштым налмеке, спортсмен икымше данан лиеш. Тылеч посна шем ӱштын эше лу степеньже уло. Икманаш, мастарлыкым нӧлтыман да нӧлтыман, эре улан тунемман.

- Каратист оҥам пелыгыч шелын мошта. Те тыгай таҥасымаште участвоватленда?

- Конешне. Оҥан кужытшо тӱҥ шотышто – 300 мм, лопкытшо – 250 мм, а кӱжгытшӧ – 20 мм. Тудым тӱрлӧ семын шелыт. Вич оҥам мушкындо дене шалатем, тынарак оҥай – кынервуй дене. Ныл оҥам кормыжвундашын ӧрдыжлуж дене шелам да вич оҥам – йолтаган дене.

- Шуко таҥасымаште участвоватленда. Шарнымашеш кодшо иктаж-могайже нерген ойлыза.

- Шуко медалем уло, мыняржым рашыже ойленат ом керт. Нуным мый кугу кубкышто аралем. Кажне турнир чоныштем келге кышам кода. Вет тушко ямдылалташ шуко ӱнарем, вием пnlW00OaqJAMыштем. Ӱмаште майыште, мутлан, Российыште каратэ дене тӱнясе турнир лийын. Тушто мый икымше верым налынам. Эре ончылно лияш тыршем. Садлан сеҥалтам гын, кумылем чот вола. Южгунам каратэ дене заниматлымым ала чарнем шонем да каратэ деч посна иленжат ынде ом керт докан. Адакшым судья-влакат южгунам сайын огыт акле. Но тидыже ынде нигӧмат огеш ӧрыктаре, шонем.

- Мыняр йоча тендан деке коштеш? Йӧратат мо нуно каратэм?

- Чылаже 25 тунемшем уло.  Руш Кукмарий школышто занятийышкем 16 йоча коштеш. Эн изижлан – куд ий. Каратэм йӧратат, но южо йоча тичмашын ты боевой искусствым огеш умыло. Тидлан, конешне, жап кӱлеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: