"Олимп" рубрик, 2018 ий, Шорыкйол тылзын 26-шо кечыже

Чемпионатыш кайынет гын,  паспортым ыште

Статьян авторжо Анастасия Эманова

14 июнь гыч 15 июль марте футбол дене тӱнямбал чемпионат Российыште лиеш. Официальный данный почеш, ты чемпионатын матчше-влак 11 оласе 12 стадионышто эртаралтыт. Тидын вашеш Россий минкомсвязь болельщикын паспортшо проектым илышыш шыҥдара.

Чемпионатысе матч-влакым ончаш толшо-шамычын тыгай паспортышт лийшаш. Тидлан http://www.fan-id.ruсайтыште анкетым возыман але болельщикын паспортшым пуымо рӱдерыш толын, регистрацийым эртыман. Ты паспорт – персонифицированный ламинироватлыме карте. Тудым яра ыштат. Паспорт дене чемпионат годым чыла матчыш пураш лиеш. Конешне, билетым налын пурыман.

Вес элла гыч толшо да гражданстве деч посна улшо еҥ-влак болельщикын паспортшо дене  тӱнямбал чемпионат тӱҥалме деч лу кече ончычак Российыш визе деч посна пурен кертыт. Тиде паспорт денак  элна гыч каяш лиеш.

Матчыш билет да болельщикын паспортшо улыт гын, поезд дене матч эртыме ик ола гыч весыш оксам тӱлыде, кошташ лиеш. Нине олалаште автомашина, троллейбус, трамвай, метро дене яра кошташ йӧным пуат. Тидын дене кылдалтше шукырак информацийым transport2018.com. сайтыште пален налаш лиеш.

Болельщикын паспортшым налаш http://www.fan-id.ru порталыште йодмашым возыман. Тушто ончыктыман:

- фамилийым, лӱмым да ачалӱмым;

- шочмо кечым;

- личностьым ончыктышо документым (документын видше, серийже, номерже, кӧ да кунам тудым пуэн);

- гражданствым;

- футбол дене тӱнямбал чемпионатыш билетын (билет-влакын) номержым;

- фотографийым;

- мобильный телефонын номержым;

- электрон почтын адресшым;

- болельщикын паспортшым налме йӧным (почто гоч, вес элысе еҥ-влаклан курьер колта але болельщикын паспортшым пуымо рӱдерыш шке миен толын налман).

Тылеч посна паспортым налаш йодмашым возымо годым персональный данныйым радамлаш да электронный шижтарымашым налаш келшымыда нерген палемдаш кӱлеш.

Матч-влак Моско, Санкт-Петербург, Сочи, Озаҥ, Калининград, Саранск, Самара, Екатеринбург, Нижний Новгород, Ростов-на-Дону, Волгоград да Краснодар олалаште эртаралтыт. Нине олалаште болельщикын паспортшым пуымо рӱдер-влак почылтыныт. РФ граждан-влак тыгай паспортым тушто да почтышто налын кертыт.

Матчым ончаш билет ак кокла шот дене 3000 теҥге лиеш. Россий граждан-влаклан оксам шагалрак тӱлыман. Полуфиналым ончаш шонышо-влаклан билетым налаш 4480 теҥгем луктын пыштыман, а финалым ончаш  — 7040 теҥгем.

сайдаровАлексей Сайдарова, Йошкар-Ола:

- Футболым ончаш моткоч йӧратем, садлан тӱнямбал чемпионатым чон вургыжын вучем. Тушко логалаш мом ышташ кӱлымым чыла палем. Чемпионатыш билет-влакым мартыште ужалаш тӱҥалыт. Тунам Озаҥыште билетым да болельщикын паспортшым налаш рӱдерыш йодмашым возем. Швейцарий-Бразилий матчым ончаш шонем. Тудо Ростов-на-Дону олаште 17 июньышто лиеш.

евгений быковЕвгений Быков, Кужэҥер район:

- Ӱмаште футбол дене конфедераций кубок верч турнирыште тыгай паспортым икымше гана илышыш пуртеныт. Йолташем-влак дене Озаҥыште чемпионатысе иктаж матчым ончаш шонена. Садлан болельщикын паспортшым ыштыманак. Тудым налаш лӱмын пуымо рӱдерыште личностьым ончыктышо документ дене толман да йодмашым возыман. 10 минут жапыште паспортым ыштен пуышаш улыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: