"Сылнылык тӱня" рубрик, 2018 ий, Пургыж тылзын 26-шо кечыже

Актёр пашаште ик талант гына шагал

Статьян авторжо Анастасия Эманова

Артист лияш неле мо? Спектакльлаште геройын образшым почын пуэн моштыман, а тидлан геройын илыш нерген шонымашыжым, чон тургыжланымашыжым умылыман, шке шӱм-чонышто шижын моштыман. Тидым чыла еҥ огыл ыштен кертеш, очыни. Южгунам ме шкенан мом ыштымын амалжымат огына умыло, илыш деч мом вучымынам огына пале, вес еҥым, кеч тудо постановкысо герой гынат, умылымо нерген ойлыманат огыл. А Курчак театрыште артист лияш кузерак? Вет тушто актер шкет огыл, а курчак дене модеш. Уло ӱнаржым, мастарлыкшым пыштен, курчакым чонаҥда.

Марий Эл Республикысе Курчак театрын актёржо-влак драматический актёр семынак модын моштат. Ширме шеҥгелне, «илыше» планыштат модыт. Ты театрыште чынжымак энтузиаст-влак тыршат. Изи пашадарым ончыде, нуно йоча-влаклан куаным кондат.  Чаманен каласыман, пӧръеҥ актер шагалрак. Самырык тукым курчак театрын актержо профессийым ойырен налаш пешыжак кумылан огыл.

Ты пашан моторлыкшым, чыла нелылыкшым пален налаш манын, мый тылзе жапыште театрыш коштынам, репетицийлаште, у спектакльым шочыктымаште лийынам, тӱрлӧ курчак дене модын онченам. Ӱшанем: лудшына-влак, тиде статьям лудын, Курчак театрыште тыршыше уста «мӱкш-влакын», вес семын нуным таҥастарашат огеш лий, пашаштым утларак аклаш тунемыда, ала иктаж ӱдырын але рвезын актер профессийышке толаш кумылжо лектеш.

Талант деч посна кид вий кӱлеш

Театрыште руш да марий состав-влак улыт. Икымше репетицием руш составын актержо-влак дене лийын. «Сказка про Емелю» постановкышто тростевой курчак-влак дене модыт. Мый тиде спектакльым ончыч онченам ыле. Тунам ширме шеҥгелне актер-влак кузе пашам ыштат манын шоналтен омыл. А тушто эн кугу паша шолеш. Ик актерак икмыняр рольым модеш. Несмеяна царевнан образшым чоҥышо Аня Деркач мыйым тростевой курчакым чын кучаш, тудым «иландараш» туныктыш. Изи кайык IMG_6646лийын ончышым. Тыгак Мамка курчак дене пашам ыштышым. Ой-ой, ты пашаште талант шагал, кид вий кӱлеш. Икмыняр минут дене вуй ӱмбалне курчак дене модаш, мыйын гай у еҥлан пешак неле. Кид чытыраш тӱҥалеш, тыгай годым геройын мом каласышашыжымат монден колтет, а вет эше курчакын кидшым, вуйжым тарватылман. «Тростевой курчак дене пашам ышташ такшым неле огыл, вашке тунемалтеш», - каласыш мылам Аня. Ала-ала, мылам лу занятийжат шагалла чучо. А вет южо реквизитын нелытшат ситыше. Мутлан, коҥгам вуй ӱмбалнем кучаш ӱшанышт. Чотак тыршышым, но мучашлан тудым изиш гына ыжым камвозыкто. Курчак театрыште ыштыше чылан гаяк актер пашам палат. Спетакльыште эсогыл монтировочный цехыште ыштыше Денис Нуриев, озанлык паша ужашым вуйлатыше Сергей Якимов актер-влаклан тӱрлӧ реквизит дене модаш полшат. Ширме шеҥгелне мылам вер шагалла чучын. «Театрыште пашам ышташ пеш ласка, а теве йочасадлаш лектын, спектакль-влакым ончыкташ вер чынжымак шагал. Южгунамже нушкын, киен пашам ышташ логалеш. Садлан чыланат тыгай каҥга улына», - мыскара йӧре каласышт актер-влак.
«Сказка про Емелю» спектакльыште модын ончымеке, Анян мокталтымыж деч вара кумыл нӧлталте. Чот тургыжланенам. Ширме шеҥгеч актерын кидше, вуйжо я йолжо койыт гын, курчак-влак дене начарын пашам ыштет гын, йоча-влаклан шинчаш тидыже вигак перна да тидлан кӧра ик татыште залыште улшо «юзо» шӱлыш йомын кертеш.

 Ӱмыл театр кумылым савырен

Пиал шыргыжалын, у спектакль шочмым ужынам. Тыгай постановко Курчак театрыште эше лийын огыл. «Как Артемка мир спасал» спектакльыште мультипликацийым да ӱмыл театрысе йӧн-влакым кучылтмо. Тудым самырык режиссер Максим Белецкий шынден. Спектакльыште пӱртӱсым аралыме, келшымаш да йӧратымаш теме-влакым нӧлталме. Тудым эше ӱмаштак шындынешт улмаш, но кертын огытыл. Ӱмыл театр – шкешотан искусство, тудо шуко жапым да чытышым йодеш. Тыгай спектакль театрын репертуарыштыже икымше. Спектакльым шындыме годым режиссер, актёр-влак шуко каҥашеныт, ӱчашеныт, чыла276529678_349653422н шинча ла чон йӱлен пашам ыштеныт. Поснак Максим Вершининым палемдыме шуэш. Тудо эн шуко идейым ойлен. Эльвира Лисицынан да Надежда Медведеван мастарлыкыштлан эреак ӧрам. Йоча спектакльлаште модыт, но пеш виян драматический актрисе улыт. Чоҥымо образышкышт тугай келге шонымашым пуртен моштат. Моктымылан огыл тидым ойлем. Нуно чынжымак тӱҥалше актер-влаклан сай пример улыт.
Ӱмыл театрыште кугу экраным, вичкыж тоя дене пашам ыштыше тӱрлӧ тӱсан марионетке-влакым кучылтыт. «Как Артёмка мир спасал» спектакльын репетицийыштыже мый тыгай марионетке-влак дене модын онченам. Лыве дене пашам ыштенам. Нелыжак лийын огыл, вет ты рольын нимогай мутшо уке. Тростевой курчак дене модмо годым актер-влак шоген пашам ыштат гын, ӱмыл театрыште нуно кӱварыште почаҥын модыт. Конешне, ширме шеҥгелне мо ышталтме ончаш толшо-влаклан огеш кой. Спектакльым иктешлаш гын, паша сай, туныктымо сынан. Но ик йодыш содыки лектын. Постановко йоча-влаклан, а тушто пуштмаш раш ончыкталтеш. Тидыже, мыйын шонымаште, йомакым ойганым ышта. Кӱлеш мо пуштмым курчак спектакльыште ончыкташ? Очыни, вашталтышым постановкыш эше пуртат. Премьер шошым лиеш, кунамже але раш огыл.

Курчак театрын актержо профессий шкешотан. Кеч-могай пашаx7w1QIYkX3M
семынак актер пашам чон пыштен йӧратыман. Но моло профессий дене таҥастарымаште, курчак театрын актер пашаже йомак тӱнялан, поро юзо вийлан ӱшандара, а тидыже кызытсе саманыште моткоч кӱлешан. Изиш философийыш лупшалтым. Раш ойлаш гын, актер, поснак курчак театрын актержо лияш – чап.

Кажне репетицийыш куанен коштынам, мылам чылажат у да оҥай лийын. Курчак дене модын моштымаш, мыйын шонымаште, кугу усталык. Конешне, сай туныктышо воктенет уло гын, ты пашалан тунем шуаш лиеш. Тидлан лач жап кӱлеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: