"Олимп" рубрик, 2018 ий, Пургыж тылзын 16-шо кечыже

Американ спортсмен дене палыме

Статьян авторжо Анастасия Эманова

Шукерте огыл Йошкар-Оласе «Спартак» спорткомплексыште смешанный боевой единоборство (ММА) шотышто Марий Элын чемпионатше да первенствыже эртеныт. Тушто 30 утла спортсмен таҥасен. 2001-2002 ийлаште шочшо рвезе-влак коклаште первенствыште Даниил Кокорев икымше верым налын.  Ынде тудо Марий Элын чапшым Юл кундем федеральный округысо тыгаяк таҥасымаште 16-19 мартыште Ижевскыште аралаш тӱҥалеш.

tqoS5sCwHVMДаниил Звенигово район Суслонгер посёлкышто шочын-кушкын. Кызыт тудо Йошкар-Олаште радиомеханический техникумышто икмыше курсышто автомеханик-техниклан тунемеш. Тылеч посна смешанный единоборство дене тренировкыш коштеш.

«Боевой искусствын ты видше дене Йошкар-Оласе «Единоборец12» клубышто талукат пеле заниматлем. Тренерем – уста спортсмен Сергей Михайлович Лобанов. Йоча годым кумирем Фёдор Емельяненко лийын. Мый тудыч чыла бойжым онченам да мастарлыкшылан ӧрынам. Тудлан кӧра смешанный единоборство дене заниматлаш кумыл лектын. Ача-авам тореш лийын огытыл. Нуно мыланем полшен шогат, таҥасымашкем  эреак кошташ тыршат», — ойла Д.Кокорев.

Самырык рвезе смешанный единоборство да Бразилийысе джиу-джитсу дене заниматлыше спортсмен Джефф Монсон денат палыме. «2016 ийыште Йошкар-Олаште смешанный единоборство шотышто «RED CITY FIGHTS — Global» турнир лийын. Тушко Джефф Монсон толын. Чапланыше спортсменым ужмеке, шинчамланат ӱшанен омыл. Тудын дене саламлалташат вожылынам. Но тыгай еҥым эре от уж, садлан войзалташ пырля содыки йодынам», - каласыш Даниил.

ача аваж денеД.Кокорев деч тренировкылан мыняр жапым ойырымыжым йодмемлан тудо тыге вашештыш: «Шуматкечын да рушарнян веле канем. Моло кечын тренировкыш коштам. Ятыр гана сусыргенам, но тиде спортым «коден каяш» иканат кумылым луктын огыл. Талукат пеле веле смешанный единоборство дене заниматлем. Икымше чемпионатем тачат шарнем. Кум тылзе веле тренировкыш коштынам, приём-влакым шагал паленам. Но тренерем мылам ӱшанен. Чот тургыжланенам. Республикысе турнирыште кумшо верым налмемлан, моткоч куаненам. Тунам шке виемлан ӱшанаш тӱҥалынам. Шуко гана икымше верым налынам. Но призовой верым логалын омыл гынат, вуйым сакен омыл. Йоҥылышем-влаклан кӧра шукылан тунемам. А кызыт Юл кундем федеральный округысо чемпионатыш кыртмен ямдылалтам».

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: