"Шинчымаш кугорнышто" рубрик, 2018 ий, Пургыж тылзын 2-шо кечыже

Теле школ пайдале лийын

Статьян авторжо Анастасия Эманова

26-28 январьыште Национальный президентский школ-интернатыште Теле школ кудымшо гана эртен. Тушко Марий Эл, Киров, Саратов, Угарман кундемла, Чуваший да Пермь край гыч 155 самырык туныктышо лийын.

Теле школышто самырык специалист-влак образований аланыште туныктышын рольжо да могай проблеме улмо нерген мутланеныт. Туныктышо-влакын тургыжландарыше йодышыштлан «йыргешке ӱстел» годым Марий Эл Республикын образований да науко министрже Н.Адамова ден калык образований да науко пашаеҥ-влак профсоюз организацийыштын председательже Л.Пуртова вашмутым пуэныт. Пален налме: у тунемме ийыште школлаште астрономий предметым туныкташ тӱҥалыт. Кызыт астрономий урокым эртараш туныктышо-влакым республикыште ямдылат, кӱлеш книга-влакым наледыме. Школлаште шахмат дене занятий-влакым эртараш мут лектын. Ты модыш йочан шонен моштымыжым йодеш. Тылеч посна республик мучко ГТО-м сдатлаш лийме рӱдерым почаш шонымаш уло.  Самырык туныктышо-влакым илыме вер йодыш тургыжландара. Школлаште тьютор, але вес семынже, йоча-влаклан наставник, кӱлмӧ нерген мутым луктыныт. «Тьютор-влак моткоч кӱлыт. Нуно эре лийыныт. Тьюторын пашажым вожатый-влак шуктат. Нуно йоча-влаклан полшен шогат. 13-15 февральыште Москошто «Наставничество» икымше форум лиеш. Тушко Марий Эл гычат участник-влак кайышаш улыт», — манеш министр Н.Адамова.
Теле школын паша программыже оҥай ыле. Тӱрлӧ темылан лекций, «йыргешке ӱстел», мастер-класс-влак самырык туныктышын мастарлыкшым нӧлташ полшеныт. Кажне участниклан тудо сай шарнымашым коден, шонем. Туныктышо профессийын престижшым нӧлташ, ялыш туныкташ каяш кӱлмым шукынжо умыленыт. Курыкмарий район гыч толшо участник-влак Теле школышто чолга улмыштым ончыктеныт. Ик участник – Артём Васиков – дене палыме лийна. Тудо Пӹнгель Парнингіш ялыште шочвасиковын. Пайскырык кыдалаш школым тунем пытарен, кызыт ты школышто ОБЖ предметым туныкта. Шкеж нерген рвезе кӱчыкын каласкалыш: «Школышто тунемме годым физкультурым йӧратенам. Волейболла, футболла, баскетболла модынам. Районыштына «Лӱдыкшыдымылык школ» военно-спортивный модмаш эреак эртаралтын. Тушто сеҥыше-влак республикысе модмаште участвоватленыт. Школын тунемшыже-влак, нунын коклаште мыят, ятыр гана призовой верым налынна. Школ деч вара, 2008 ийыште, МарГУ-со технолого-экономический факультетыш тунемаш пуренам. А дипломым налмеке, пайскырык кыдалаш школыш пашаш толынам. Туныктымо пашам йӧратем. Мый тылеч посна йоча-влакым «Лӱдыкшыдымылык школ» таҥасымашке ямдылем. Тӱрлӧ силовой упражненийым ыштыктем, чарак-влакым сеҥен лекташ, автоматым пужаш да угыч погаш туныктем. Школ директор Елена Зотиковна Оплева самырык туныктышылан тӱрлӧ семын полшен шога. Мемнам тӱрлӧ семинарыш эреак колта. Теле школышто лиймемлан моткоч куаненам. Чынжымак шукылан тунемынам. Школын программыже оҥай да поян лийын. 28 январьыште «Педагогическая дипломатия» мероприятий эртаралтын. Эксперт-влак мыланна изирак класслаште тунемше йоча-влакым умылен мошташ, нунын дене кузе йолташ лияш, каласкаленыт. Палаш пайдале ыле. Ик шонымашан туныктышо-влак дене палыме лийын, паша опытна, урокым эртарыме методике дене  вашла палдарен, профессионал семын кушкына». 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: