"Ме марий улына" рубрик, 2018 ий, Пургыж тылзын 22-шо кечыже

Шаран марий рвезе – теҥыз пехотинец

Статьян авторжо Ирина Степанова

артур8Елена Газина

Кушкын толшо эрге йочан шинча ончылныжо иктаж лишыл еҥже пример семын лийшаш. Тыге шона Россий армийын капитанже Артур Актимиров.
Башкортостан республикысе Шаран селаште шочын-кушшо марий рвезе элым аралышын профессийжым налаш 9-ше классыште тунеммыж годым шонаш тӱҥалын. Тиде жапыште Артурын кок изажат погонан лийыныт. Палемден кодем: ик ешеш шочын-кушшо ака-иза-влакын кум эргышт — кум марий патыр иза-шоляк — офицер погонан улыт. Тыгай чӱчкыдын огеш вашлиялт.
Артурынат нунын ден тӧр шогымыжо шуын. Каникуллан да отпускылан толшо изаже-влак воктен лияш тыршен, нунын койыш-шоктышыштым тӱткын эскерен. Тыге военнный лияш ямдылалташ тӱҥалын, вет военный тунемме верлашке конкурс эрак кугу. Эн ондак Артур шкенжын ончылно задачым шында — школым медаль дене тунем пытараш. Сай аттестат да ший медаль Екатеринбург оласе военный артиллерийский командный училищыш тунемаш пураш корным почыт. Икмыняр ий ончыч тиде училищым династийлан тӱҥалтышым пыштыше изаже, капитан Дмитрий Михайлович Минлигулов, тунем пытарен улмаш. А вес изаже, Анатолий Валерьевич Актимиров, военно-морской институтым пытарен. Кызыт капитан-лейтенант Актимиров Питерысе военно-морской институтышто тырша.

Училищыште Артур теҥыз пехотыш логалаш пеҥгыдын шонен пышта, а вет тушко эн виян да кӧргӧ чытышан-влакым веле ойырен налыт. Марий рвезат тидым пеш сайын умылен, садлан физподготовкыланат шуко жапым ойырен, кап -кылым ямдылен. Тунеммыштат эн сай лийын.
Тыге тудо военный институтым шӧртньӧ медаль дене пытара да шонымыж семынак теҥыз пехотыш толеш. Икмыняр ий Тихоокеанский флотышто службым эртымеке, ынде кумшо ий Артур Актимиров Санкт-Петербург оласе Михайловский военный артиллерийский академийыште курсовой офицер-преподаватель должностьышто тырша. Курсант-воспитанникше-влакымат тудо «Мый кертам! Мыйын вием сита!» девиз дене илаш туныкта.
Школышто физкультурым туныктышо Аркадий Баймурзинович ден медицине пашаен Елена Султанбуратовна ушан-шотан эргым куштен шогалтеныт. Чолга офицер землякышт дене Урсай да Мешер ял-влакат кугешнат. Артур деч таче пӱтынь Шаран вел марий самырык ӱдыр-врезе-влак примерым налын кертыт.

Елена Газина, Башкортостан.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: