"Марий йӱла" рубрик, 2018 ий, Пургыж тылзын 2-шо кечыже

Эх, межгем я портышкем! Тый улат гын суртыштем — Весела уремыштем!

Статьян авторжо Эльвира Терентьева

DSC_6831

Кодшо шуматкечын Волжский район Карайыште Портышкем пайрем нылымше гана лие. Ты пайремым «Кугарня» газет редакций Волжский районысо администраций да Карай школын коллективше дене пырля эртарат.

Школыш пурымаште кок ош межгем торашке волгалт коеш. Тудым йоча-влак кугурак-влакын полшымышт дене лум гыч куэн ямдыленыт да марий узор дене келыштареныт. Тыгак толшо еҥ-влакым школ капка воктенак кок могыр гыч лум гыч ыштыме да чия дене сӧрастарыме кок коҥга вашлиеш. Ончычсо семынак шукынжо портышкемым чиеныт, ӱдыр-влак тӱрлӧ тӱсан йолван шовычым пидыныт. А пӧръеҥ-влак ты гана эше ик модым шонен луктыч: ужалкалыше деч ӱштым куанен налыныт да тудым шӱешышт сакалтеныт.

«Портышкем пайремым тысе калык куанен вуча. Теле йӱштӧ манын огыт шоно. Тек ты пайремын ӱмыржӧ кужу лиеш: шомак дене огыл, мут дене, койыш-шоктышыж дене виян лийже. Тек ты пайрем ончыкыжымат, калыкым чумырен, тӱрлӧ пашам виктараш да келшен илаш полша», — каласыш Карай школым вуйлатыше Любовь Сергеева.

Чынжымак, Портышкем пайремлан кажне тунемше моткочак ямдылалтеш: сувенирлык портышкемым ышта, кочкышым кӱэштеш, марий тувырым чия, уремыште модаш да таҥасаш портышкемым конда, ӱдыр-влак коваштын шондыкышт гыч мыжерым шӱдырен луктыт да чият, кужу йолван шовычым пидын шындат.

Ты пайремлан кӧра ятыр йоча сувенирлык межгемым ямдылаш тунемын, моло кидпашалан шӱмаҥын. Чыла тидым нуно ты школысо ярмиҥгаште ужаленыт. А ача-ава дене пырля кӱэштын кондымо когыльыштым, печене да тортышым кузе темлен моштат! Эсогыл ужалымаште эрге-влакат шогылтыт ыле.

Лиза Захарова пошкудыжлан шӱртым пӱтыраш полша ыле. «Мо илем, эре шӱртым пӱтырем, шӱдырем, носким пидам, — мане пошкудыжо 67 ияш Евдокия Мансорова. — Василий пелашем дене 46 ий пырля илена. Вич икшывым ончен куштенна, кок уныкана уло».

Кызыт Карай велне шорыкым шукынжак огыт ашне. 70 ияш Елизавета Тарасован ойлымыж почеш, межым пазарыште налыт. Ты кок шешкан, кум веҥан да 13 уныкан кова шке ешыжлан носким пидын чикта. Школышто изирак выставкыште тудын пидме тӱрлӧ тӱсан носкиже-влак моторын койыт ыле. Шайрамбач Карайыш марлан толмыжлан 1 мартыште витле ий лиеш. Тунамсе жапым тачылак шарна: кандаш имне да латкандаш вате дене сӱан тудын суртышко толын.

Уремыште модмо да икте-весе дене таҥасыше вер ятырак ыле. Иктышт тоя дене перен, приз-влакым наледеныт, весышт портышкемым торашке кудалтен кертме шотышто ӱчашеныт. Тунемше-влак, кок командылан шелалтын, эстафетыште шке вийыштым тергеныт: куржталыштыныт, вӱдвара дене вӱдым нумалыныт, мунчалтеныт, модыныт.

Ече дене таҥасымашым эн оҥайлан шотлыман. Тений тышке 12 ӱдырамаш ден 9 пӧръеҥ ушненыт. Шукынжо межгемым чиен толыныт, а таҥасымаш годым сонарзе ече дене палемдыме дистанцийым эртеныт. Тений ӱдырамаш-влак коклаште «Марий Эл» газетын пашаеҥже Алевтина Байкова эн писын — ик минутат 14 секундышто — ече дене ик оҥгым ыштен. Кокымшо верыште Нина Ясмурзина лийын, кумшышто – Лидия Михеева. Эн чулым пӧръеҥлан Александр Фёдоровым шотлымо. Кокымшо верым коктын пайленыт: Георгий Пашкельдин ден Владимир Медведев. Икымше верлам налше-влаклан пӧлек шотеш межгемым кучыктеныт.

Портышкем – тазалыклан пайдам пуышо йолчием. Йӱштӧ телым йол ынже кылме да таза чонышто таза виян айдемын гына уш-акылже пеҥгыдемеш. Икманаш, портышкемда уло гын, чийыза! Тунам йӱштӧ телымат чонлан весела да каплан куштылго лиеш.

DSC_6738DSC_6517ТИЧМАШНЕК «Кугарня» газетын 2018 ий 2 февральысе номерысе газетыштыже лудын кертыда.

Эльвира Ендылетова.

Иван Речкинын фотожо-влак.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: