"Улам мый Рве-зы-лык!" рубрик, 2018 ий, Пургыж тылзын 26-шо кечыже

Ӱдырым налше каче лийын ончен

Статьян авторжо Анастасия Эманова

Шукерте огыл НТВ каналысе «Поедем, поедим!» программын съемочный группыжо Советский район Ӱшнӱр селаште уна лийын. Англичан вӱдышӧ Джон Уоррен марий калыкын национальный кухньыжо, тыгак сӱан йӱла нерген шуко пален налын. Импровизированный сӱаныште качын рольжым ты селанак эргыже Сергей Щербаков модын.

ckf7GY4nYKoРвезе марий улмыж дене кугешна, марий койышыжым тӱрлӧ мероприятийыште изиж годсек ончыкта. Тудо селасе школышто тунеммыж годым почеламутым сылнын лудмо тӱрлӧ конкурсышто участвоватлен. Сергей – усталык шӱлышан рвезе. «6-7-ше класслаште баян дене шокташ туныктымо кружок занятийлаш коштынам. 8-9-ше класслаште школысо театральный постановкылаште модынам. Тылеч посна телымсе полиатлон дене заниматленам. Районысо, республикысе таҥасымашлаште ятыр гана призовой верыш логалынам. Вузышто тунемме годым телымсе полиатлон шотышто эсогыл диплом пашам лийын. Мый МарГУ-со физический культур, спорт да туризм факультетым 2016 ийыште тунем пытаренам. Университет деч вара салтак радамыш логалынам. Моско область Наро-Фоминск олаште Кантемировский дивизийыште служитленам. Туштат спорт дене кылем лушкыдемын огыл. Дивизийын чапшым полиатлон, неле атлетике дене  таҥасымашлаште араленам. Кызыт гын ече дене кошташ йӧратем.

Тора Йӱдвелыште вахте йӧн дене пашам ыштем. «Поедем. Поедим!» программын съемкыштыжо участвоватлаш темлымылан моткоч йывыртенам. Качын рольжым модмо годым тургыжланен омыл, содыки арам огыл театральный кружокыш коштынам. Ты съемко моткоч пайдале да оҥай лийын. Сӱан йӱла нерген кызытсе самырык тукым шагалрак палена. Мутлан, сӱан деч вара вес кечынже каче оръеҥын ямдылыме пулашкамуным, кошталын, талиҥгаш пыштышаш. Весе, ӱстелтӧрыште оръеҥ ден каче кум гана шинчын шогалшаш улыт улмаш. Тидын нергенат пален омыл ыле. Мылам съемко сай шарнымашым коден. Оръеҥым модшо Вероника Мустаеват кумылым савырен моштышо ӱдыр», — каласкалыш Сергей.

Марий калык йӱлаж нерген ты передачым НТВ канал дене 10 мартыште ончыктат.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: