"Илыш йогын" рубрик, 2018 ий, Пургыж тылзын 16-шо кечыже

Марий Элыште чонжо кана

Статьян авторжо Анастасия Эманова

Египет – умылаш лийдыме мотор эл. Йоча годым акрет годсо Египет нерген тӱрлӧ документальный фильмым ончаш йӧратенам. Пирамиде, фараон, Юмо, мумий-влак нерген палаш оҥай лийын. Ты эл  турист-влакым шкешотан культуржо, поянлыкше, историйже дене сымыстара.

Египетянин дене вашлийын мутланаш йӧн лектын. Абделрхман Омар (Вконтакте соцсетьыште тудо тыгай лӱм дене возалтын) Марий Элыш Каир гыч толын. Элжын моторлыкшо, Марий кундемыш толмо амалже да моло нерген тудын дене мутланышна. Тудо рушла сайын мутланаш кӱчык жапыште тунем шуын.

омар - Абделрхман, кунамсек Марий Элыште илет? Мо тыйым кундемышкына конден?

- 2016 ий годсек тыште илем. Российысе иктаж-могай университетыш тунемаш пураш эре шоненам. Тыште образований системе пеш сай. Тӱрлӧ вуз нерген информацийым кычалынам, тушко йодашым возенам. Марий кугыжаныш университет гыч ӱжмашым налынам. Республикыш толын, кӱлеш экзамен-влакым кученам. Кызыт медицине факультетыште икымше курсышто тунемам.

- Марий Элыш толмеке, шуко нелылык дене тӱкненат? Кушто илет?

-  Шке кундем, лишыл еҥ-влак деч тораште илаш моткоч неле. Египет ден Россий калык-влакын культурышт ойыртемалтыт. Вес элыш тунемаш толынам гын, Россий, руш да марий калык-влакын илыш-йӱлаштым умылаш тыршенам. Эн кугу нелылык, тиде, конешне, йылмым палыдымаш. Рушла икмыняр мутым веле ойлен кертынам. Мый англичан йылмым чылан палат манын шоненам. А Марий Элыште англичанла шагалын мутланен моштат, тидыже мыйым ӧрыктарен. Но йылме средаш «пурен кайымеке», рушла вашке тунем шуынам.

Мый шокшо, кечан элыште шочын-кушкынам. Садлан йӱштӧ игечылан нелынрак тунемалтын. Марий Эл, поснак Йошкар-Ола, келша. Тыште ласка, чон кана. Тидым мый йӧратем.

МарГУ-ш тунемаш толмеке, ик жап пачерым айлен иленам, а вара университет мылам визымше номеран тӱшкагудышто пӧлемым пуэн. Тушто илаш оҥай, весела. Но студент-влаклан у тӱшкагудым чоҥат гын, сайрак лиеш ыле. Молан манаш гыч общежитийыште чылажат тошто.

Каир - А молан медицине аланым ойырен налынат?

- Еҥ-влаклан пайдам кондынем. Адакшым Египетыште ик аптекыште пашам ыштенам. Медицине чонемлан лишыл. МарГУ-што «лечебное дело» направленийыште тунемам. Врач лияш ямдылалтам.

- Египетыш толаш шонышо-влаклан кушко эн ончыч кайыман, мом эн ончыч ужман?

- Шочмо элыштем лийше кажне еҥын чонышкыжо Египетын пӱртӱс моторлыкшо логалеш. Историйна моткоч поян. Ожно Египет ик эн виян эл лийын. Акрет годсо тӱрлӧ документ, арвер-влак, пирамиде, фараон-влакын гробницышт кугезына-влакын чапыштым ончыктат. Египет тылеч посна яндар вӱдан Йошкар теҥызше дене палыме. Тудын серже воктеке канаш кажне ийын шуко еҥ толеш. Кӱкшӧ курык-влак, кугу пустынь кумылым савырат.

- А Египетыште илыше еш-влак коклаште эн тӱҥлан мо шотлалтеш?

- Элыштына ӱдырамашым чот пагалена, вет тудо икшывым шочыкта. Ватым, авам, акEgypt.Giza.Sphinx.01а-шӱжар-влакым, ме, пӧръеҥ-шамыч, перегышаш улына. Лишыл еҥна, родо-тукымлан полшена, нунылан нимогай оксам огына чамане.

 - Колынам, пуйто египтян-влакын фамилийышт уке. Чынак мо?

- Тиде шоя. Документыштына эн ончыч лӱмым, вара ачалӱмым да фамилийым возена. Мыйым тичмаш лӱмем Ахмед Абделрхман Али Мохамед.

- Университетым тунем пытарымеке, мом ышташ шонет?

- Москош але Лондоныш тунемаш кайынем. Озаҥ олат чонемлан лишыл. Пеш мотор, кызытсе саман дене тӧр «ошкылшо» ола. Тушкат тунемаш да илаш каяш шонем.  Адакшым университет деч вара ӱдырым налнем.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: