"Сылнылык тӱня" рубрик, 2018 ий, Ӱярня тылзын 19-ше кечыже

Ака ден шӱжар муралтат гын…

Статьян авторжо Иван Речкин

«Вуйыштем шовычем ош батистовый,

Вуемлан ласка, сынемланат келша.

Шовыным ит чамане, мушкат гын, ошемеш», —

муралта пелашыжын акажын йӧратыме мурыжым «Шайра» фольклор ансамбльым вуйлатыше Нина Николаева (снимкыште шола гыч кокымшо).

Шайра1Тудо Руш Шайра тӱвыра пӧртым ныл ий вуйлата. 23 мартыште «Шайра» ансамбль Ленин лӱмеш тӱвыра полатыште Йошкар-Оласе калыклан шке мастарлыкшым ончыкта.

Коллективым Н.И.Николаева 2009 ийыште поген. Тунам чолга мер пашаеҥ Владимир Козлов шочмо Шемъер ялысе яндар йӱкан вате-влакым Эстонийыш муро аршаш дене миен толаш ӱжын. Йотэлыш кудытын миен толыныт, нылытынже (кум вате да гармоньчо) – весела номерым ончыктеныт.

Мо оҥайже: Шемъер ялыште шочшо акак-шӱжарак Нина ден Лидия коктынат Шайрамбал ялыш ваштарешла суртыш марлан лектыныт. Кугуракше, Нина, Приволжский посёлкышто ешыж дене илен, изиракше, Лида, — Звенигово олаште. Коктынат профессийышт дене ужалыше лийыныт, а кызыт сулен налме канышыште улыт. Ынде ака-шӱжарын ешышт Шемъерыште пӧртым чоҥеныт.

Шуко шочшан ешыште вашла келшымаш ӱмыр мучко шижалтын. Ныл эрге да ныл ӱдыр шочын, коктынжо изинекак коленыт. А кызыт коктын веле кодыныт да, ача-аваштым да икте-весыштым шарналтен, ойган мурым шуйдарат, веселажымат муралтат. «Тиде мастарлык авана деч вончен. Авана семын лышташ дене яндарын мурен моштышым тетла вашлийын огынал», - маныт нуно.

2016 ийыште Нина Николаева ден Лидия Павлова «Шайра каче, Шемъер ӱдыр» муро дискым луктыныт. Тудым писын ужален пытареныт. Марий вате-влакын муралтымыштым чынже денак йӧратат. Шукыж годым нуно калык муро дене куандарат. А тидыже еҥын чоныш логалеш. Эн ончыч «Ала вӱдшӧ келге да…» мурым возеныт, вара «Ой, кунам», «Памаш корно», «Гармонист моторжат», «Монден ом керт» да моло мурыланат аранжировкым ыштеныт. Шукерте огыл Пошкырт вел сем почеш такмак-влакым мураш кумылаҥыныт.

«Шайра» ансамбльыште латик участник веле: кандаш кугыеҥ да кум йоча. Ӱдырамаш-влак яндар йӱкышт дене, йоча-влак моторын тавалтымышт дене калыкым сымыстарен моштат.

«Волжский районысо южо ялыште ик гана веле огыл концертым ончыктенна гынат, адак ӱжыт. Кызыт Карайыште, Пӧтъялыште вучат. Пошкырт мландыште, Татарстан Республикыште, Киров кундемыште лийынна. Кодшо ийын «Эҥер вӱд ӱмбалне» фестивальыште мурымылан икымше верым пуышт. Морко район Волаксолаште эртаралтше «Ах, гармонь» конкурсышто ансамбль-влак коклаште кокымшо верым нална. А кок рвезына, Никас ден Илюша Игнашевмыт, куштымаш дене икымше верыште лийыч. Тений 11 мартыште Марий Турек район Сысоево ден Косолопышто выступатлышна», - каласыш Нина Ивановна.

Н.И.Николаева — кум икшыван ава, кандаш уныкан да кок кугезе уныкан кова. Милана уныкажат ансамбльыш коштеш. Моло йочамат марла мураш-кушташ туныкташ шонат. Шемъер гай изи моло яллаштат марий коллектив-шамыч шочыт да мастарлыкыштым пойдарен толыт гын, куанаш веле кодеш.

Эльвира Терентьева.

И.Речкинын фотожо.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: