"Увер" рубрик, 2018 ий, Ӱярня тылзын 13-шо кечыже

АРНЯН ВӰРШЕРЖЕ

Статьян авторжо Эльвира Терентьева

УВЕР-ВЛАК

Конкурс

«Мыйын еш поянлыкем»

Тыгай лӱман творческий конкурсым студент ден тунемше-влаклан увертарыме.

Эн ончыч тудо регионлаште эрта. Тушко ешын духовный поянлыкше, илыш-йӱлаже, традицийже нерген сочиненийым, эссем, ойлымашым (вич странице марте) возыман. Тыгак мультимедийный презентаций ден видеофильмым посна аклат. Кугытышт дене 20 слайд марте але 5 минуташ видеофильм лийшаш.

Шарнымаш

Театр паша-влак

Кугыжаныш Думо пеленысе Молодёжь парламент ден Евроазиатский Еврейский конгресс «Память народа» всероссийский театральный конкурсым эртара.

Тудо Кугу Отечественный сарысе да Холокостысо событий-влакым шарныме лӱмеш лиеш. Конкурсышто 18-35 ияш студент ден вузласе преподаватель-влак участвоватлат. Оргкомитетыш 15 март йотке йодмашым возыман да конкурслык спектакльым колтыман.

Проект

Шочмо верым тӱзаташ

Марий Элыште «Формирование комфортной городской среды» проект почеш 14 проектым сайлан шотлымо.

Чылаже общественный комиссийыш 28500 анкете пурен. Тушто 54 тӱжем утла темлымаш лийын. Тышеч 73 территорийым ойырен налме да шымыштшым эн оҥай да кӱлешанлан шотлымо. Ты проектлан федеральный рӱдер 137 млн 114 тӱжем теҥгем ойыра, Марий Элышке 76 миллион теҥге толшаш. А илышыш нине паша-влак вич ийыште шыҥдаралтшаш улыт. 18 мартыште, сайлымаш годым, нунын верч йӱклыман. Эн шуко йӱкым погышым ончылгоч илышыш шыҥдарат.

Пӱртӱс

Юл эҥерым эрыктат

Озаҥыште Кугыжаныш Думын Экологий да йырым-йырысе средам аралыме комитетшын «йыргешке ӱстелыштыже» Кугыжаныш Думын депутатше С.Казанков лийын.

Пытартыш 10 ийыште йырым-йырысе пӱртӱс начаремын. Сандене Юл эҥерымат эрыктыман. Тидлан 250 млрд теҥгем ойырат. Ты пашам 2025 ий марте шуктыман. Юл 17 субъектыште йоген эрта, сандене кажныже ты пашам ыштышаш. Тидлан федеральный бюджет тений 480 млн теҥгем колта, тышеч 20 миллион утла теҥгежым — Марий Элышке.

Сымыктыш

                                                                    «К» буква дене кочкыш

6 мартыште Йошкар-Олаште Национальный художественный галерейыште художник Пётр Фроловын «Круговорот» выставкыже почылтын. Тудо «Азбука Петра Фролова» проект почеш пашам ышта. Ленинградыште шочшо 43 ияш сӱретче 41 лышташан азбукым возен. Мо оҥайже: выставкым почмаште «Круговорот» натюморт дене сийленыт. Тушто чыла кочкышыжо «К» буква дене тӱҥалеш.

Православий

Ныл проект сеҥен

«Православная инициатива 2017-2018» конкурсым иктешлыме. Тушко Российын 73 регионжо гыч 1227 проект пурен. Конкурсыш Марий Эл гыч 24 проектым колтеныт да 4 проектше сеҥыше радамыш логалын.

Шернур районысо Йочам шуарен куштымо рӱдер тунемше-влаклан православий теме дене занятий-влакым эртарыме шотышто«Надёжный компас» проектым ямдылен. Йошкар-Оласе Вознесенский черке приходын «В семейных устоях традиции народа» проектше еш воспитаний ден еш кокласе кылым пеҥгыдемдаш виктаралтын. МарГУ-н «Святые станут ближе» пашаж дене православийысе святой-влак нерген умылтарынеже, тылеч вара «Жития святых на каждый день года» сборникым да мультимедийный приложенийым савыктынеже. Марий Элысе Национальный музей «Православие для всех» проект почеш Православий тоштерыште православный культурно-просветительский рӱдерым почеш.

Ялозанлык

Краснодарыш каят

Марий Элын ялозанлык министрже А.Гречихон вуйлатыме делегаций Ялозанлык производитель-влакын форумышкышт кая. Тудо 11-12 мартыште Краснодарыште лиеш.

Форумын пленарный заседанийышкыже Российын Президентше В.Путин толшаш. Мероприятий годым ялозанлыкысе, пищевой ден перерабатыватлыме промышленностьысо отрасль-влакым, фермер озанлык ден кооперацийым, ялысе озанлыкым вияҥдыме стратегий шотышто тематический секций-влак эртаралтыт. Участник-влак АПК сферысе самырык учёный-влакын выставкыштышт лийыт.

Тул

Эре шекланыза!

Кодшо арняште ончычсо дене таҥастарымаште Марий Элыште шагалрак (16) пожар лийын, тышеч нылытше — Йошкар-Олаште.

Кум пожар Звенигово районышто, 2 — Советский да икте дене — Волжский, Курыкмарий, Марий Турек, Медведево, У Торъял да Юрино районлаште. Эртыше арняште 9 оралте да ик автомашина йӱленыт.

Спорт

Мандариным погеныт!

8 мартыште Йошкар-Олаште Патриарший площадьыште «Мандариновый забег» манме таҥасымаш лийын.

Стартовый взносым тӱлышӧ кажне участниклан мандарин сӱретан значокым пӧлекленыт. Погынышо оксам кум ияш Коля Кузнецовын ача-аваштлан пуат. Кызыт ньогалан соҥгыра лиймыжлан кӧра операцийым ышташ окса кӱлеш.

Тыгак километрат пеле меҥгым куржшо участник-шамычлан мандариным пуэныт. Эн писын куржталше-влак 8 мандарин марте сулен кертыныт.

Тазалык

Грипп…

26 февраль гыч 4 март йотке Марий Элыште ОРВИ дене черланыме 5442 случайым регистрироватлыме. Тылеч ончычсо арня дене таҥастарымаште тидыже 30,5%-лан шукырак.

Тылеч посна грипп дене 5 еҥ черланен. Тышеч кумытын кугыеҥ (нуно грипп деч прививкым ыштен огытыл), коктынжо 14 ияш марте икшыве улыт. Лабораторийыште биоматериалым тергыме годым 12,8% образецыште парагрипп вирусым мумо, 43,6%-ыште – аденовирусым, 16%-ыште – респираторно-синцитальный вирусым, 0,6%-ыште – В гриппын вирусшым. Нерге черлан кӧра тений 20 школысо 47 классыште туныктымым чарыме, 11 йочасадысе 13 группым карантинлан петырыме.

Налог

3 май марте

2017 ийыште ыштен налме доходлан декларацийым 2018 ий 3 май марте ышташ лиеш.

Тидлан налог инспекцийыш 3-НДФЛ форман йодмашым возыман. Декларацийым ыштат: 3 ий деч шагалрак жап собственностьышто шотлалтше (2016 ий 1 январь деч вара собственностьлан шотлалтын гын, 5 ий) кусараш лийдыме погым ужалыме годым; шергакан кагазым, уставной капиталын ужашым ужалымеке; пачерым, пӧлемым да кусараш лийдыме моло погым айлыме годым; предприниматель пашам шуктымо годым; пӧлек шотеш налме (родо-тукым деч огыл) деч доход улмо годым: лотерей дене модын налме годым. Декларацийыште ончыктымо налогым 16 июль марте тӱлыман.

Форум

Почётан сомыл

Тений 13-15 февральыште РФ Президентын кӱштымыж почеш Москошто «Наставник-2018» форум эртаралтын. Февраль-мартыште окружной этапше-влак шым вере лийыт. 3 мартыште тудо Ижевскыште эртен.

Марий Эл гыч тушко гражданский инициативылан полшышо менеджер Полина Акимова миен. Тудо тулык йоча ден ача-аван полышышт деч посна кодшо икшыве-влаклан наставник лийме шотышто «Вектор» проектым вуйлата. «Опора» мер организаций ынде икмыняр ий йочапӧрт-влакын выпускникыштлан полша.

ЭЛЬВИРА ТЕРЕНТЬЕВА.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: