"Рубрик деч посна", 2018 ий, Ӱярня тылзын 2-шо кечыже

Балтач районышто — «Яндар йӱк»

Статьян авторжо Эльвира Терентьева

  балтач1

Пошкырт кундем Балтач районышто 18 марий ялыште 2700 наре марий еҥ ила. Тидыже чумыр еҥ деч 12,6 процент лиеш.  Нуно паша деч вара каналташ да жапым веселан, пайдалын эртараш тыршат.

Тидымак шукерте огыл Йыванайыште эртаралтше «Папа, мама и я, спортивная семья» районысо конкурс пеҥгыдемдыш. Тӱрлӧ таҥасымаште куд еш таҥасен: Арманшинмыт, Айдимировмыт, Валиевмыт, Тимербаевмыт да Фатхуллин фамилиян кок еш.Мероприятийым эртараш Йыванай школын коллективше да тунемше-влак, верысе тӱвыра пӧртын пашаеҥже-шамыч да ялысе калык полшен. Сандене тӱшкан ыштыме паша моткоч оҥайын лектын да ончышо-влакланат келшен. Эн писе да спортлан эн шӱман ешлан Фарит ден Алёна да Иван ден Лариса Фатхуллинмытым шотленыт.

Балтач районышто спортым веле огыл, марий мурымат йӧратат да икшыве-влакым шӱмаҥден шогат. Теве кодшо идалык мучаште Мата ялыште шочшо да ача-аваж дене пырля Екатеринбургыш илаш куснышоДенис Айбердин Казахстаныште эртаралтше тӱнямбал муро конкурсыш миен коштын. Тудын С.Анастасий дене пырля мурымыштым кокымшо степенян медаль ден диплом дене акленыт.

А 13 февральыштеБалтач район Кабырга тӱвыра пӧртыштӧ «Яндар йӱк» марий муро да такмак конкурс лийын.Тудым Кабырга тӱвыра пӧрт вуйлатыше Альфина Алексееван да районысо тӱвыра пӧлкан вуйлатымышт почеш эртарыме. Конкурсышто 65 еҥ участвоватлен, тышеч 23-жо — икшыве-влак. Эн кугу ийготан участник-влак — 60 ийым эрталтыше-влак Иван Калитов, Ольга ден Менлиса Кирилловамыт. Аэн изи ийготан-влак коклаште 10 ияш Лидия Акузина ден 11 ияш Юра Каляев чолгалыкыштым ончыктеныт.

Алёна АликаеваСольный мурышо-влак коклаште икымше верышБалтач район Кабырга гыч Алёна Аликаева лектын. Кокымшо верыште — ты район Мишкан ял гыч Алёна Салиева, кумшышто — Тевыл гыч Валерий Сафаргалиев. Тыгак ансамбль ден дуэт, трио, квартет гыч шогышо изи ансамбль-влак выступатленыт. Нунын коклаште Кабырга гыч ӱдырамаш-влак коллектив, Йыванай тӱвыра пӧртын «Ош пеледыш» ансамбльже, Мишкан ялысе тӱвыра пӧртын «Шонанпыл» коллективше да Усоласе ӱдырамаш коллектив мурымо мастарлыкышт дене ойыртемалтыныт. 

Тӱрлӧ номинацийлаште сеҥыше радамыш Юрий Каляев, Лидия Акузина, Артур Сайпанов, Иван Фатхуллин, Ольга Кирилова лектыныт. Тыгак жюри член-влак (а ты пашам районысо тӱвыра пӧртын методистше-вла да «Эрвел марий» марий национально-культурный автономийым вуйлатыше Пётр Абдулов шуктеныт) Алёна ден Фарит Фатхуллинмытлан, Ольга, Менлиса да Татьяна Кириловамытлан посна пӧлекым кучыктеныт.

Сольный мурым мурышо-влак коклаште эн ончыл верым налше Алёна Аликаева сценышке «Пӱтыральым-рончалте…» калык муро дене лектын. Алёна Михайловна – тӱҥалтыш класслам туныктышо. Кызыт тудо начар тазалыкан кок йочам туныкташ мӧҥгышкышт коштеш. А чонжым Кабырга тӱвыра пӧртысӧ «Висвис» вокальный ансамбльыште да «Ӱжара» калык фольклор коллективыште ынде 10 ий утла луштара. Нине кок ансамбльым Альфина Алексеева вуйлата. 

«Муро – калыкын чонжо», — манеш калыкмут. Балтач районышто тидым умылат да марий койышыштым, сыныштым, кумылыштым, вийыштым ончыкташ йӧнымат, жапымат муыт. Тидлан моло марий еҥ-влакланат тунемаш тыланена.

балтач

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: