"Рубрик деч посна", 2018 ий, Ӱярня тылзын 19-ше кечыже

Вес еҥым ава манаш пӱрен

Статьян авторжо Иван Речкин

Шочмо аважлан йоча молан оккӱл лиеш? Икшывылан илышым пӧлекленат гын, тудым йол ӱмбак шогалтыман, эҥертышыже лийман огыл мо? Вет ала-кунам шкежат ньога лийынат, тыланетат ава кӱлын… Тыге Дима ятыр шонкален докан: тудо куд ияш гычак аван йӧратымыжым, чон шокшыжым палыде кушкын. Но кызыт рвезе тидын нерген шарналташ ок йӧрате. Тудо кушкын, ынде вес еҥым ава манеш.

кукуДмитрий Павловым изиж годсек палем. Тудо Морко район Ердӱр ялыш каникуллан, канышлан толеден. Эре ик ешыш – Ирида Ивановна Иванова дек. Поро кумылан рвезе. Кунам вашлият, эре саламлалтеш. Изинек пашалан тунем кушкын. Ирида Ивановна — шкежат чулым, пашаче ӱдырамаш. Рвезымат тыгаяк лияш туныктен. Йочалан ончыч тиде гостевой манме еш семын лийын, вара икте-весе дек тунемыныт, рвезе И.И.Ивановам ава манаш тӱҥалын. Ынде Ирида Ивановна — приёмный ава.

Кызыт Дималан — 18 ий. Тений Марий политехнический техникумым тунем пытара, чоҥымо паша шотышто мастер специальностьым налеш. Лишыл жапыште тудлан пачерым пуышаш улыт.

«Медведево район Нужъялыште шочынам. Шольым уло, тудо кызыт Морко район Октябрьский школ-интернатыште 8-ше классыште тунемеш. Куд ияш улмем годым ача-аванам йочам ончаш права деч посна коденыт. Шольым тунам аза ыле. Ончыч Йошкар-Оласе ик учрежденийыш наҥгаеныт, тушечын – Звенигово район Выльыпсола йочапӧртыш. Визымше класс гыч Морко район Октябрьский школ-интернатыште тунемынам, — каласкала Дима. — Тылеч вара шочмо авамым ик ганат ужын омыл, ужаш шоненат омыл. Шольым дене тудлан кӱлеш лийына гын, шке йоҥылышыжым умылен, мемнам кычал муэш ыле, шонем. Тыге ыштен огыл. Тугеже тудлан мемнан деч поснат сай. Иктаж лу ий ончыч тудо колен манын колынам ыле. Ачана ила, но тудымат тетла ик ганат ужын огынал. Но мый ӧпкем кучымаш уке. Кызыт вес ешем уло манын кертам. Вес айдемым ава манам».

«Авамлан, Ирида Ивановналан, тауштем. Тудо мыйым шукылан туныктен, — манеш Дмитрий. — Тудо огыл гын, ом пале, кызыт кушто лиям, мом ыштем ыле. Ирида Ивановна пеҥгыде койыш-шоктышан, паша деч посна ок шинче. Мыйымат тыгаяк лияш туныктен. Тудлан кӧра мыйын мӧҥгем уло. Кажне канышлан ялыш кудалыштам, мом-гынат ышташ полшем».

Дима школышто тыршен тунемын. Математике ден физкультурым поснак йӧратен. Кажне каныш кечым але каникулым чон вургыжын вучен, вет тунам Ердӱр ялыш наҥгаеныт. А кушкын шумекыже, автобусыш шинчын, шке кудал толын. Ялыште тудлан моткоч келшен. Ятыр йолташым муын. Кеҥежым пырля йӱштылаш коштыныт, колым кученыт. Рвезе пашаланат ок ӧркане. Пакчаште шӱкшудым кӱраш, вӱдым шаваш полша, шудо жап годым паша эшеат ешаралтеш. Кызыт Дима чыла сомылым ыштен мошта. Яра жапше лиеш гын, пошкудо-шамычлан уло кумылын полша.

Ончыкыжым Д.Павлов юрист профессийым налаш шона. Полицейский лияш йоча годсо шонымашыжым шуктынеже, коеш. Дималан волгыдо ончыкылыкым да шке шонымашке шуаш тыланем. Илышыште порылыклан, чынлан ӱшаным тек ок йомдаре.

Ирина Александрова.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: