"Ӱдырамаш тӱня" рубрик, 2018 ий, Ӱярня тылзын 19-ше кечыже

Вичкыж чонан да йºным муын моштышо

Статьян авторжо Иван Речкин

женщинаМарий тӱням арален кодышо, вичкыж чонжо дене нимогай аралтыш деч посна илыше, ок лий годымат илен кертше…

…Концерт. Ик ялысе ансамбльын мотор ватыже-влак вургемыштым чият, сценыш лекташ ямдылалтыт. Колам: «Мӧҥгӧ йыҥгыртышым, ыш вашеште, — ойла ик ӱдырамаш весыжлан. — Адакат, витне, йӱын. Кодшо гана суртышкем толын пурышым: пӧрт йӱштӧ, вольык пукшыдымо шога, а тудо йӱшӧ, мушкындым чумыртылеш. Тачат тидак вуча дыр… Ай, ом ойгыро, тыште мурем да куштем, чонем кана. Вольыкым йӱдымат пукшем, кызыт вӱташте тул уло. Вес гана адак ом колто манаш тӱҥалеш гын, шотышкат ом нал». Тиде веселан шыргыжше шӱлыкан шинчан ӱдырамашым ужын, чонем ишалте.

…Илалше ӱдырамаш икшыве-влакым куштен, ош тӱняш луктын колтен. Тыгодым эре гаяк нунылан полшен шога: икте пачерым налын, весе — машинам, кумшо эргыжым тора олаште туныкта… Изи пенсий чылалан сита. Вӱта тич вольык, пакча тич саска. Мӧҥгӧ гыч яра кидан кайыше уке. Шоҥгыеҥын телевизоржо пудырген. Налын весым, кугум, чаплым: «Э-э, кредитым эркын тӱлем тудо! Молан тылат тыгай телевизоржо?! Йоча-влакем шуым шогалтеныт. Шке оксам дене налынам вет, нунын деч йодын омыл! Мом ойгырем. Теве кастене шинчам да кугу экран дене кином канен ончем. Куанемжат тидак веле огыл мо?» — ӱмбакем туге гынат титаканла ончалеш.

…Ӱдырамаш у тувырым налын. Пашаште премийым пуэныт. Ешыште чыла рожым петырен от шукто! Воштончыш ончылно куанен пӧрдеш. «Кузе вара?» — тыматлынракак марийже ӱмбаке ончалеш. «Шоҥго вуешет ынде тыгай чевер тӱсаным налын пыштенат! Чияшет уке мо, лучо машиналан теле шиным налына ыле», — йӧрышӧ шӱдыр гай шинча воштончыш гыч онча…

…Ава чапле эргыжым тора-торашке, поян суртышкыжо, поро ешыж деке ужата. Машинашкыже тидым-тудым опташ тӧча. Шке сурт велышкыже ончалашат лӱдеш: тыгай яра, тыгай йӱштӧ тудо!. Ах, «Айда пеленем!» манеш гын, машина почешак чоҥешта ыле. Но огыт ӱж, тушто – вес еш, вес илыш. Тыште шкет илыш. Юмо пала кунар! Аван кидше ӱҥгыргышӧ кайыкын шулдыржыла кечалтын…

8 Март йӱд. Чылан ласкан малат. Пайрем сайын эртен: эр годсек коҥга воктене пӧрдмӧ, чесым погымо, пӧлекым налме, пеледышым. Мотор шомакым колыштмо. Молан вара омо ок тол? Можо вара чонлан йокрок? Але пӧлек шукертсек шонен коштмо огыл да?.. Але адакат йӧратыме пеледыш аршашым кидыш кучымо огыл да: розам огыл, мимозам вучымо… Але пайрем сомыл дене ноялтын? Але вучымо пайрем вашке эртымылан кӧра?.. «Ай, кычалтылат», — вудыматен, ӱдырамаш коргыктен малыше пелашыж воктеке пурен возеш. Омешыже адакат, адакат нарынче, лӧза мимозо конча, тудын кочырак ӱпшыжӧ нерым чыгылта. Кочын чучеш…

Марий ӱдырамаш ышташ лийдыме годымат илен кертмыж дене ойыртемалтеш…

Альбертина ИВАНОВА.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: