"Кузе илет, ялем?" рубрик, 2018 ий, Ӱярня тылзын 2-шо кечыже

Марий газетым йӧратен лудыт

Статьян авторжо Анастасия Эманова

Параньга район Кугу Пумарий почто связь отделеднийыште кум почтальон паша ышта. Эртыше подписке кампаний жапыште «Кугарня» газетлан эн шуко подпискым ыштыше почтальон-влакым палемдена манын увертаренна ыле. Кугу Пумарий почтын пашаеҥже Надежда Климентьевна Вараксина 72 экземпляр газетлан подпискым ыштен. Редакций пашаеҥ-влак, окса премийым пуаш манын, лӱмын туддеке толынна.

VrknsZsucJcНадежда Климентьевна – пеш тыматле, ласкан мутланыше ӱдырамаш. Почтышто тудо 32 ий пашам ышта. Кумшо ий сулен налме канышыште.«Ялысе ӱдырамаш-влак пашалан  тунемше улына. Мӧҥгыштӧ яра киен, кап нелеммылан чучеш. Мый Памашъялыште илем. Ял гыч Кугу Пумарий марте – кум меҥге. Штрамарий почиҥга, Кугу почиҥга, Памашъялыш корреспонденцийым кеҥежым велосипед дене коштыктем гын, телым йолын коштам. Йӱран, поранан игечым ончыде, газет ден журнал-влакым, тӱрлӧ сатум жапыштыже намиен шукташ тыршена. Еҥ-влак чыла марий изданий кокла гыч «Кугарня» газетым утларак лудыт. Тушто куштылго йылме дене возымо статья-влак савыкталтыт. Икте тургыжландара: газетым кугурак еҥ-влак шукыж годым налыт, 25 ияш марте самырык-влак шагал годым подпискым ыштат», - ойла  Н.Вараксина.

Калык дене вашлийын мутланаш – почтальонлан куан. Адакшым тӱрлӧ уверым тудо эн ончыч пален налеш.

Кугу Пумарий почто отделенийыште лийме годым пӧръеҥ почтальон Ефим Александрович Горбунов дене палыме лийна. Тудо тушто кокымшо ий пашам ышта. Пенсийыш лекмеке, почтыш пашаш толын. Романтике шӱлышан почтальонлан паша чон ласкалыкым пуа. Тудо Кугу Пумарий селасе икмыняр уремыш газетым нумалеш, тыгак Вочарма ялыш кондыштара. «Вочармаш кайыме годым пӱртӱс моторлыкым Ad9Q31EPKc8ончен каяш йӧратем. Тыге кок меҥгым, лачак тынар села гыч ял марте, шижде ошкыл эртем», — каласыш тудо.

Почтышто улмына годым еҥ-влак шукынак толын кайышт. Теве Людмила Харитоновна Мосолова «Аргументы и факты» да «Кугарня» газетым налаш пурыш. «Нине газетлан ятыр ий подпискым ыштем. «Кугарням» икымше лаштык гыч тӱҥалын, мучаш марте лудам. Чылажат келша», - манеш ӱдырамаш.

Нина Степановна Князеват газетнам вучен коштам манеш. Тудлан еҥ-влак нерген лудаш келша. Н.Князева ойла: «Могай пашам ыштат, кузе илат, могай талантышт уло. Тыгай еҥ-влак нерген эре палыме шуэш. Газетыште савыкталтыныт гын,  тугеже нуно ушан-шотан, чолга, самырык тукымлан пример улыт манын шонем. Мый тӱрлӧ рецептым эн ончыч ончем. Пале-шамычым эреак лудам. Вара йолташ, пошкудо-влак дене вашлийме годым а те тидым паленда мо йодам. Газетыште теве тыге возымо манам».

Кугу Пумарийыште пеш чолга калык ила. Тысе клубышто аккомпаниаторлан ыштыше Лариса Николаевна Горохова денат почтышто палыме лийна. Усталык шӱлышан ӱдырамаш спортым йӧрата. Кастене школысо спортзалым почеш да тушко чыла ийготан еҥ-влак мини-футболла, волейболла, баскетболла модаш погынат. «Спортзалым олмыкташ кӱлеш. Газетдам лудын, ала иктаж спонсор лектеш гын, сай ыле», — каласыш тудо.

Л.Гороховам мыскарам ыштен моштымыжлан шукын пагалат. Тудо весела шӱлышым пуртен мошта, санденак тӱрлӧ пайремыш эреак ӱжыт. Лариса Николаевна, тендам «Воштылаш, товатат, сулык огыл!» мыскара фестиваль-конкурсын отборочный турыштыжо чапле номер дене вучена.

Газетнан тыгай йолташыже-влак улмылан ме моткоч йывыртена. Лийза ончыкыжат мемнан дене эре пырля.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: