"Воштылаш товатат сулык огыл" рубрик, 2018 ий, Ӱярня тылзын 22-шо кечыже

Немыч, итальян да япон рвезе-влак ну куандарышт вет!

Статьян авторжо Ирина Ямбаршева

Кодшо кугарнян, 16 мартыште, Шернур тӱвыра пӧртыштӧ ««Воштылаш, товатат, сулык огыл!» конкурсын отборочный туржо эртаралтын.

Ме эше ик гана умылышна: мыскарам палыше да йӧратыше-влак чыла кундемыште улыт. Шернурышко мыскара номер дене выступатлаш да тыгак мыскараче-влакым ончаш тӱрло район гыч толыныт ыле.

DSCN9150Касым Шернур клуб системе вуйлатышын алмаштышыже Виктория Мамаева вӱдыш. Ончаш толшо-влак кажне гаяк номерым совым кырен вашлийыныт, чон канен воштылыныт. Сценыш лекше-влак мемнан илышнам койдарен моштымышт дене ойыртемалтыныт.

Эн ончыч икымше номер дене выступатлыше участник-влак нергенак ойлыман. Параньга район Усола тӱвыра пӧртын пашаеҥже-влак Светлана Ларионова ден Нина Григорьева Йошкар-Олаште эртарыме мыскара конкурсышто ондакат тӱрлӧ койдарчык дене куандареныт. Ты гана кум сценкым модын ончыктышт, пенсий нерген мурым мурышт. Кертыт! «Номер-влакым изиш тӧрлатыман да рӱдоласе мыскара конкурсыш ӱжман!» — икоян шонымашым темлыш ты конкурсым тергыше жюри.

Кутырен келшымеке, раш лие: «Пазарыште» манын лӱмдымӧ сценкым 1 апрельыште Шкетан лӱмеш Марий драме театрыште ончыктат. Ты сценкым тӱвыра пашаеҥ-влак дене пырля кум йоча келыштара: Алексей Андышев, Никита Николаев да Линар Сибагатуллин. Параньга пазарышкет нуно немыч, итальян, япон рвезе лийын лектыныт ыле. Усола школышто 8-9 класслаште тунемше-влакын мастарлыкыштым ий еда нӧлтен шогыманак! Вет тыгай изи-кугу мероприятий жапыштат марий самырык тукым марий сымыктышлан шӱмаҥеш да шкем калык ончылно кучаш тунемеш. Тыгай койыш кеч-могай профессийыштат кӱлешан!

Кужэҥер тӱвыра пӧртысӧ «Воштончыш» калык театрын (вуйлатышыже – Ольга Сергеева) участницыже Эльвира Егорова поснак чот воштылтен керте. Тудын монологшым оҥайын лӱмдымӧ — «Трусик Васлий». Сюжет оҥай: саде Васлий ӱдырамаш мончаште «лифтёрлан» пашам ышта, а еҥгавате-влак дене шотым ок му. Молан? Пелашыже пашашке рожын йымалвургем дене гына луктын колта… Уым огеш нал, шонеда? Кажне пайремлан! У ийлан, Коҥга пайремлан, 23 февральлан, 8 Мартлан, шочмо кечылан пӧлек шотеш эре носки ден трусикым налеш. Шкаф тич носки ден йымал вургемже кият… Эльвира сценыште шкенжым моткоч чолган кучен мошта: шонет, ик вереат огеш тӱкнӧ, чыла ситуаций гыч лектын сеҥа, пуйто ӱмыржӧ мучко артист пашам шуктен ила. Тудым ончымет да умбакыже мо лиймым колыштмет веле шуэш!

DSCN9186Вес участник-влак Параньга район Памашъял гыч толыныт ыле. Кидыш гармоньым налын, Артур ден Максим Вараксинмыт марла такмак-влакым шергылтарышт. «Оя-ояра! Таче кече ояра! Таче кече деч вара йолташ мыйым йӧрата», — тыге йытыран муралтыше рвезе-влакым ӱдыр-влакланат йӧратен шындаш лиешыс. Но! Йолташ-влак кокла гыч иктыже гына яра – Максимже, а Артур «пелашан улам» манеш. Артур кызыт МарГУ-што 4-ше курсышто тунемеш, а Максим омсам ямдылыше ик фирмыште пашам ышта.

Муро тӱняште пӧрдшӧ Галина Почелинам шукынжо ужын шуктенда докан. Тудат ты мыскара касым шке весела кумылжо да койышыж дене сымыстарыш. Сценыш лектеш да мыскаражым каласкала, вара гармоньым кучен, шке сынан такмакше-влакым «кечшудыла шӱгынчеш», тыгодымак тавалташат ок мондо. Теве тыгай тале марий ӱдырамаш!

Советский район Кодам ялыште илыше Илья Секретарёв колхоз председательын илышыжым почын пуаш тыршыш. Каласкалымыжым такмак дене келыштараш кидыштыже гармонь ыле. «Койышан вате — еҥгавате» темым ойырен налын У Торъял район Тошто Торъялыште илыше Анатолий Никитин. Тудо, сценыш марий тувырым чиен лектын, еҥгавате нерген каласкален веле огыл, тудым шке модын ончыктыш, тыгай еҥ-влакын яжар койышыштым руден пуыш.

Шернур район тӱвыра пӧрт пеленысе «Кумыл» ансамбльыш коштшо Николай Танеров мыскара конкурсышко ушнаш кумылан улмыжо куандара. Тудат – гармоньчо. Эн ончыч сценышке мыскараж дене шкетын лекте, такмак-влакым муралтыш. А вара йолташыже Илья Канаев дене пырля лудыш муро-влак дене «сийлышт».

«Тиде лийын. Но кунам да кушто?

Лийын огыл гын, тугеже – тушто!

Кушкын шуын эргеик марийын…

Шыжым темыш каче  20 ийым.

Эше иктым  палемдаш кӱлеш:

«Лийын эрге изишак пеле…», -

DSCN9205тӱҥале каласкалаш конкурсын эше ик участникше Леонид Таныгин. Тудо калыклан мыскараче шӱлышан поэт В.Дмитриев-Озин «Туныктен» басньыжым сценылан шке келыштарен. Такшым поэзий кумылан Леонид Иванович кызыт сулен налме канышыште, но ӱмыржӧ мучко тӱрлӧ вуйлатыме сомылым шуктен, сӧсна комплекс начальниклан, Шернур СПТУ-што учхоз вуйлатышылан да кужу жап зоотехниклан пашам ыштен.

Нине номер-влакым саемдыме шот дене Шернурысо отборочный турышко «Воштылаш, товатат, сулык огыл!» конкурслан номер-влакым сайынрак ямдылаш полшаш манын, Марий Эл Республикын сулло артистше, драматург Валерий Григорьев миен ыле. Тудо режиссёр пашам сайын пала, сандене чыла участник-влак дене пашам ыштен, кажнылан могай экшык улмым, ой-каҥашым ойлен, а рӱдолаште выступатлаш налме номер-влакын озаштлан икмыняр тӧрлатымашым пурташ каласен.

Конкурс мучаште Шернурыш мийыше мыскара кумылан участник-влаклан «Кугарня» газетын тӱҥ редакторжо Эдуард Иманаев шарнен илаш пӧлекым кучыктен.

Эльвира Терентьева.

Э.Иманаевын фотожо-влак.

DSCN9182   DSCN9216DSCN9196

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: