"Рубрик деч посна", 2018 ий, Ӱярня тылзын 13-шо кечыже

Пеледыш гыч моторлыкым шочыкташ — пӱрымашыже

Статьян авторжо Елена Годунова
Диана Березина

Диана Березина

Пеледыш! Ик мут тынар шижмашым луктеш манын отат шоналте. А вет кажне пеледышын тӱсшö шкешотан, ойыртемалтше. Мутлан, йошкар тӱс – йöратымашым ончыкта, ошо – ныжылгылыкым, кына – яндарлыкым, нарынче – поянлыкым, оксам, тыгак кечын волгыдыжым ончыкта гын, канде – ласкалыкым. Тидым ӱдыр, ӱдырамаш-влак шукертак шижын шуктеныт, очыни. А Йошкар-Оласе Сомбатхей микрорайонышто верланыше «Диана» пеледыш салоным вуйлатыше Диана Березина пеледыш нерген чыла гаяк пала. Тудын дене бизнес пашаже да пеледыш нерген мутланена.

Диана — Кужэҥер район Изи Лаждӱр ялын ӱдыржö. Марий кугыжаныш университетыште марий да англичан йылмылам туныктышылан тунем лекмек, Йошкар-Оласе ик йочасадыште воспитательлан кок ий пашам ыштен. Но шуктымо пашаже Дианалан куаным конден огыл. Тидын нерген тудо тыгерак мане:

- Кажне айдеме шке илышыштыже Юмын пӱрымö пашам шуктышаш. Сандене мыйынат тидын шотышто ятыр шонкалымаш лийын. Паша эн ончыч куаным кондышаш. Йочасадыште ыштымем годым флористке ӱдырамаш дене палыме лийынам. Тудын пеледыш салонжо лийын. Мыйым салоныштыжо полышкалаш йодын. Мый тудын йодмыжым кумылын шуктенам. Тудо пеледышым ончаш, тӱрлö композицийым погаш туныктен. Паша келшен, чонемлан лишылла чучын, сандене йочасад гыч каенам. Идалык утла тудын салоныштыжо пашам ыштенам. Йоча шочмек, ик жаплан пашам кодаш логалын. Декрет отпуск деч вара тудын салоныштыжак тыршенам. Вара ямде бизнесым налаш йöн лекте. Тыге Сомбатхей микрорайонышто верланыше пеледыш отделым вуйлаташ тӱҥальым. Бизнес пашам тӱҥалаш куштылгыжак огыл. Мылам тидын шотышто изам чот полшен, кызытат тӱрлö документаций дене полышкала.. Тудак салоным «Диана» манын лӱмдаш темлен.

Дианан ыштыме букетше-влак

Дианан ыштыме букетше-влак

pgDHlnOwY1Y zxVm8sWDSWwМыланна, тыглай еҥ-влаклан, бизнесмен-влакын тӱрлö нелылык дене «кучедалмышт» пале огыл. А вет йол ӱмбаке пеҥгыдын шогалмешке, мыняр тыршыман, умбакыже пашам вораҥдараш корным кычалман. «Диана» салон почылтмо годым моло семынак тыште розам, хризантемым, гвоздикым, лилийым, тюльпаным да пöлемыште куштымо пеледыш-влакым налаш лийын. Кызыт тыште чонлан келшыше тӱрлö пеледышым ужалат. Пеледыш эре уэмдалтеш. Тугеже еҥ-влак пеледышым наледат.

- Пеледышым кеч-могай жапыште налаш лиеш, — умбакыже мутланымашым шуйыш Диана. — Ты сомыллан флористкын туныктымыжо бизнесым почмаште чот полшен. Но нелылык дене тӱкныде пашам вораҥдараш, очыни, огешат лий. Сандене бизнесыште тӱрлыжат лиеда. А пеледыш шке моторлыкшо дене куаным конда, кумылым нöлта. Кузе вара тыгай сомылым ышташ кумыл ок лек? Мутат уке, тудо шуко вийым да жапым йодеш. Но налше еҥ-влакын тауштымо шомакышт пашам ышташ эшеат кумылаҥда.

Диана флорист-влаклан эртаралтше тӱрлö курсышто шинчымашым налын огыл. Изинек шке кид дене тӱрлö сувенир-влакым ышташ йöратен. Адакшым туныктышыж пелен пашам ыштымыже кугу опытым пуэн. Тудын ойлымыж почеш, пеледыш гыч моторлыкым шочыктымо паша — пӱрымашыже. Кузе уке гын, вет чыланжак огыл пеледыш гыч тӱрлö композицийым ямдылен сеҥат? А ты ӱдыр тидым моткоч куштылгын шочыкта.

- Кеч-могай аршашым, композицийым ямдылаш тӱҥалме деч ончыч тудо ушышто шочшаш, шинча ончылно ужаш кӱлеш.. Ямдылыме деч ончыч кöлан, могай пайремлан, мыняр ияш еҥлан пеледыш аршашым ыштымым, шотыш налам. Авалан, пелашлан, туныктышылан, але йолташлан — палыман. Адакшым могай тӱсым да пеледышым йöратат, йодман. Кажне пайремлан шке сынан композиций келыштаралтеш. Мутлан, шыжылан келшыше композицийыште утларакшым нарынче, йошкарге, тӱкö тӱс-влакым кучылтам. Тыгак — тыгыде олмам, пызлыгичкым, лышташым. А У ийлан келшыше композицийыште — кож укшым, пӱгыльмым, у ий модышым. Йöратымаш кечылан гын шӱм деч посна келыштараш нигузе ок лий, а 8 Мартлан чыла гаяк пеледыш сайын ужалалтеш. Но йодшо еҥын кумылжо, мутат уке, ончыл верыште. Сандене могайым йодыт, тугайым ыштем, — мане Березина.

«Диана» салонышто пöлеклан келшыше чыла гаяк арверым: оксам пышташ конвертым, тӱрлö сувенирым, кид дене ыштыме шоколадым, мотор открыткым, вазым да тулеч молымат налаш лиеш. Пеледышым шукыж годым Голландийыште, Эквадорышто, Российыште куштат. Ты салонышто нине эллаште куштымо пеледыш-влак ужалалтыт. Вуйлатышын ойлмыж почеш, Голландийысе пеледыш эн чапле. А пеледышым салонышто кузе аралат йодмемлан Диана тыге мане:

- Салонышто пеледыш холодильникыште аралалтеш. Тушто южын температуржо куд градус наре. Тидыже пеледышлан келшыше температур. Мый вӱдыш нимом ешарымаш уке гаяк. Налше еҥ мöҥгыштыжö вӱдым кажне кечын вашталтышаш. Тыгак вӱдыш сакырым але аспириным ешарен кертеш. Тыге пеледышын илышыже кужурак лиеш. Лывыжгаш тӱҥалше пеледышын пел вургыжым пӱчкын, вашталтыме вӱдыш шогалташ гын, тудо, уэш ылыжын, икмыняр кече моторын шогаш тӱҥалеш.

Лишыл да йöратыме еҥ-влаклан пеледышым пöлеклаш тыршыза! Вет тудо чон шижмашдам почын пуаш, кумылым нöлташ да куаным кондаш полша!

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: