"Олимп" рубрик, 2018 ий, Ӱярня тылзын 20-шо кечыже

Светлана — виян каратисткына

Статьян авторжо Эльвира Терентьева

Тиде фотошто Козьмодемьянскысе талантан йоча-влаклан музыкально-художественный направлениян школышто тунемше Света Дацыкова ден тренерже И.Н.Капустиным ужыда. Тудо тений 18 февральыште Йошкар-Олаште всестилевой каратэ дене Марий Эл Республикын открытый чемпионатыштыже да первенствыштыже 14-15 ияш ӱдыр-влак коклаште кокымшо верым сеҥен налын. Шукерте огыл Всестилевой каратэ дене Европын икымше кубокыштыжо вийым тергаш да Марий Элын чапшым аралаш колташ пеҥгыдемденыт. Кубок 23-25 мартыште Латвийыште Рига олаште эртаралтеш. Но Россий спорткомитет ты таҥасымашым шке планышкыже пуртен огылат, ӱдырлан визым пуэн огытыл.

света с тренером

Апрельыште Света 16 ийым тема. Но ӱмаште тудлан, Сочи олаште тунемше-влакын всероссийский спартакиадыштышт кокымшо верым сеҥен налмеке, I спортын кугыеҥ-влаклан разрядшым пуэныт.

Тренер И.Н.Капустинын мутшо почеш, Светлана тыматле койышан да южгунам вожылшырак гынат, шкенжым спортышто чолган ончыкта, икымше лияш тырша. Кызыт Игорь Николаевич 70 воспитанникым шкетын кушта. Шукерте огыл тудын ончычсо тунемшыже да ПГТУ деч вара тренерлан пашам ышташ миен улмаш. Но А.С.Иванов, самырык специалистлан полыш укем шижын, Крым Республикыш контракт почеш служитлаш каен. Сандене Козьмодемьянскыште каратэм вияҥдымылан Игорь Николаевич мутым куча, всестилевой каратэ дене отделенийым вуйлата. Да ты сомылым удан огыл шукта. Вет ты пашаште 1999 ий годсек, ынде опытымат поген шуктен. Февральыште эртыше республикысе таҥасымаште 21 награде гыч лач визытше тудын тунемшыже-влакын лийын.

Йоча-влакым кок тӱшкалан шелме. Нунылан шагатат пеле шуйнышо занятийым арнялан кум гана эртара. Светам тренерже ӱшанле спортсмен семын кӱкшын акла, «Шукырак тунемшем тудын гае лийышт ыле» мане.

Кажне кеҥежым ӱдыр Яльчикыште «Олимпиец» йоча лагерьысе сборышко коштеш. Тыгак ятыр гана всероссийский сборыштат лийын. Тудыжо Татарстан Республикысе Балтаси олаште эрта.

Кызыт С.Дацыкован каратэ дене ужар ӱштыжӧ уло, уровеньже — 3 кю. Лишыл жапыште кӱрен ӱштан лияш шона. Российысе всестилевой каратэ дене Марий Элысе пӧлка тудым спорт мастерыш кандидатлан документым поген колтен. А ӱдырын сеҥымашыже шагал огыл: тудо ик таҥасымаш гычат призан вер деч посна пӧртылын огыл.

Творческий кумылан ӱдыр школышто сайын тунемеш, йот йылме да изосымыктыш дене конкурслаште шке мастарлыкшым ончыкта. Но кӧ лийнеже эше пеҥгыдын каласен ок керт, лач спорт дене ончыкыжымат заниматлаш тӱҥалмыж нерген ӱшанлын ойла. Тек волгыдо шонымашыже-влак шукталтыт, а каратист-влак манмыла, «Осу!». Тиде япон шомак чыташ, кертме семын да уло вий дене заниматлаш манмым ончыкта. Тыгак «осу» манше еҥ заниматлаш келшымыжым да ямде улмыжым пеҥгыдемда.

Э.Терентьева.

Фотошто: тренерже И.Н.Капустин дене пырля.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: