"Олимп" рубрик, 2018 ий, Ӱярня тылзын 2-шо кечыже

Спортыш ачаже конден

Статьян авторжо Анастасия Эманова

Марий ӱдыр Мария Макарова ече да куштылго атлетике дене Марий Эл Республикын чемпионкыжо ик гана веле огыл лийын. Тудо ик кечат спорт деч посна илен огеш керт. Яра жапше годым уремыш куржталаш эре лектеш.

макароваШернур район Шӱдымарий ялын шочшыжо шуко моло йоча семынак  спортлан школышто тунеммыж годым шӱмаҥын. «Ачам Геннадий Аркадьевич Шӱдымарий школышто физкультурым туныктен, а кызыт Мустай школышто пашам ышта. Куд ияш улмем годым ечым налын пуэн. Тудын дене пырля мунчалташ курыкыш коштынам. 4-ше классыште икымше гана ече дене районысо таҥасымашке миенам. 5-6-шо класслаште ты спортым утларак йӧратен шынденам. Тренировкыш чӱчкыдын коштынам. А шошым да шыжым куржталынам. Кызытат ече спорт, куштылго атлетике мыланем лишыл, тӱрлӧ таҥасымаште вием тергем. Идалык мучко ятыр чемпионатыште участвоватлем. Наградемат ситышын. Ече дене олимпийский резерв спорт школын тренерже Евгений Григорьевич Рыбаковын группыштыжо ямдылалтам, тыгак МарГУ-што тренерем – Дмитрий Владимирович Сергеев. Коктынат опытан спортсмен да туныктышо улыт.  Евгений Григорьевичын ятыр тунемшыже спорт мастер. Дмитрий Владимирович – ече дене спорт мастер, воспитанникше-влак эре сай лектышым ончыктат, — каласкала Мария. – Турнирыште тӱрлыжат лийын кертеш. Поснак команде дене куржмаште, мутлан, спринтыште але эстафетыште. Кажне таҥасымашлан чот ямдылалтам, но командыште куржталме годым ответственность кугурак, йолташ-влакым йӧндымыш лукмо огеш шу.

Кок гана, кеҥежым Нововоронежыште да телым Новосибирскыште, ялысе модмаште участвоватленам. Шукерте огыл лийше таҥасымаш-влак нерген ойлаш гын, «Российын ечыгорныштыжо» кокымшо верым налынам, Волжскышто эртыше республикын чемпионатыштыже кумшо лийынам, а Шернур районысо таҥасымаште – икымше. Йошкар-Ола воктенсе «Корта» ече базыште «Динамо» спорт обществын таҥасымашыже эртаралтын. Тушто силовой структурышто ыштыше спортсмен-влак участвоватленыт. Мый МЧС системыште пашам ыштем. Ты турнирыште кумшо верым налынам».

макарова1Маша МарГУ-со «Рекреация да спортивно-оздоровительный туризм» направлений дене бакалавриатым тунем пытарен, кызыт магистратурышто «технологии спортивной подготовки» направлений дене тунемеш.

Ӱдыр – ече да теле полиатлон дене спорт мастерыш кандидат. Спортым коден кайымет шуын мо манын йодым. «Южгунам тыгай шонымаш лиеден. Но мый тынар ий спорт дене заниматлем, садлан кызыт тиддеч посна ом керт. Яра жап улмо гынат чон куржталаш ӱжеш. Мый фотоаппартат дене пӱртӱсын моторлыкшым войзаш йӧратем. Ондак сӱретлем ыле. Но кызыт тидлан жапем уке», — ойла спортсменке.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: