"Сылнылык тӱня" рубрик, 2018 ий, Ӱярня тылзын 19-ше кечыже

Хромко дене «Тывырдыкымат» куштыкта

Статьян авторжо Иван Речкин

Васли Ольош, а документ почеш тудо Алексей Васильевич Ибулаев, шочын-кушкын да кызытат ила Пошкырт кундем Караидель районысо Шопкер ялыште. Пашаш кудалыштеш пошкудо районысо Мишкан селашке. Тыште Марий историй да тӱвыра рӱдерыште тӱҥ специалистлан ышта. Кажне кечын ик могырыш 44 меҥгым эртыман.

Такшым тудо ача-аваж семынак туныктышо лияш шонен да Благовещенскысе педколледжым, Бирск оласе социально-педагогический академийым тунем лектын. Ик жап академийыштак пашам ыштен, вара шочмо ялысе клубышто художественный вуйлатыше лийын. Кызыт – Мишканыште.

TPLLqe3nyGY- Ольош, тый мурымо деч посна тыгак тӱрлӧ семӱзгарым шоктен моштет…

- Тӱвыра рӱдер пелен «МуроЭм» мурышо ансамбльым погенам. Коллективна профессиональный огыл, садлан чот кугу кӱкшытыш шушашна уке гынат, садак шочмо кундемнам да калыкнам республикыштына чапландараш тыршена. Ансамбльыште шкеак аккомпаниатор улам: баян дене шоктем. Тыгак изиш шӱвырым «ызгыктен» кертам, шиялтышым коклан шокталтем, тӱмырым пералтем, хромко дене «Тывырдыкымат» куштыктен кертам. Южо семӱзгарым шкеак ыштем: шӱвырым, олымшӱвырым, пучым, ковыжым. Олымшӱвырым ыштыме шотышто мастер-класс-влакым эртаренам.

 

- Йошкар-Олаште лийшаш концертет мо дене кылдалтын?

- Такшым нимо денат кылдалтын огыл. Амалже куштылго маншаш – шке вийым Йошкар-Олаште терген ончынем. Тусо марий калыклан эрвелмарий койышым ончыктынем. Тиддеч ончыч Йошкар-Олаште ик гана веле огыл кугу сценыште лийынам. Вӱдышӧ семынат, мурызо семынат. Мутлан, Марий Эл радион концертыштыже муренам, а поро йолташем Александр Речкинын шоуштыжо вӱдышӧ лийынам.

- Шочмо велне шке концертетым эртаренат мо?

- Усталык касым 2016 ийыште ыштенам. Лӱмжӧ тыгай лийын: «10 ий коклаште». Молан 10 ий коклаште? Икымше гана 2006 ийыште «Яндар йӱк» конкурсышто вием тергенам. А такшым изинекак муренам. Утларакшым шке шонымо мурем-влакым мурем. Тыгак — калык мурым. Туддеч посна нигузе ок лий. Шукыж годым мутшымат, семжымат шкеак шонен луктам. Каҥашым пуышо сай йолташем уло – Башкортостан Республикысе культурын сулло пашаеҥже Валерий Садретдинов.

Муро утларакшым чон йодмо почеш шочеш. Мураш – мыйын хобби веле, профессионал артистлан тунемын омыл. Мураш йӧратыме кумыл ковам-влак да авам деч куснен дыр.

Васли Ольошын мурыжо-влак содержанийышт дене ойыртемалтше улыт да шонаш таратат. Мутлан, «ХХI курым – компьютер чыла. А ме ялыште шудым кид дене солена» мурыжым кызытат шыргыжал колыштына. А мыняр тушто чынже!!! Моло мурыжым колнеда гын, концертышкыже мийыза. Пошкырт кундем гыч 800 меҥгым толшо мурызым ончалаш кӱлешак!

Ирина Степанова.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: