"Сылнылык тӱня" рубрик, 2018 ий, Вӱдшор тылзын 2-шо кечыже

Актёр-влак илыш нерген шоналташ таратат

Статьян авторжо Эльвира Терентьева

Марий самырык театр «Театральный Йошкар-Ола» фестивальыште А.Чеховын повестьше почеш шындыме «В овраге» спектакльым ончыктыш. Сценылан тудым режиссёр Эрвина Гордеева ямдылен. Ты пашам жюри кӱкшын аклен да кокымшо планан роль-влакым модшо актёр-влак Ольга Федотова ден Алексей КудрявцевКудрявцевлан Йыван Кырла лӱмеш национальный премийым кучыктеныт.

2016 ийыште Ольга Федотова ден Алексей Кудрявцев «И с нами голуби» спектакльысе пашаштлан Олык Ипай лӱмеш премийын лауреатше лӱмым сулен налыныт. Тунам актрисын тӱҥ рольым – Олям – модмыжым куанен ончышна. Алексеят Сашан образшым ӱшандарышын чоҥыш. А кызыт вес сеҥымаш. Александр — кугурак эргын, Анисимын, образшым устан чоҥен гын, Ольга – Липан, тудын пелашыжым.

Ольга Федотова театрыште 2004 ий годсек пашам ышта. Рольжат ятыр погынен. Ӱмаште икымше бенефисшым эртарен ыле. Алексей 2012-2016 ийлаште Тӱвыра да сымыктыш колледжыште тунемын. Студент пагыт годсек театрын сценыштыже модеш.

Йолташыже-влак артист лиймыжлан ӧрыт

Йошкар-Олаштекушшо Алексей Кудрявцев ала-мо гутлаште режиссёр лияш шонен пыштен. Но 9-ше классым тунем лекмыж деч вара колледжыште тидлан туныктен огытыл, сандене актёр корныш шогалын. МЧС системыште пашам ыштыше ачаж ден исправительный колонийыште ыштыше аваже шочшыштым чарен огытыл. «И с нами голуби» спектакльын премьерышкыже толмеке, Алексейын сценыште модын кертмыжлан ӱшаненыт. Лач пырля модмо да оласе 23-шо №-ан школыш куржталме йолташыже-влак гына театрысе пашам кызытеш огыт умыло. Мутат уке, тидлан жап кӱлеш.

Алексей театр-рӱдерыш толын, марла спектакльлаштат модеш, йылмым тунемаш шона. Тунеммыж годымат тӱрлӧ сценкыште да постановкышто рольым марла модаш темленыт. Тунам «Кай, кай Йыванлан” спектакльлан марий мурым да кушташ уло кумылын тунемын.

Ик жап гыч Алексейым армийыш нальыч. Архангельск областьысе Мирный олаш, «Плесецк» космодромышто служитлен. Ынде самолёт ден ракете-влак шотышто ятыр пален налын, вет рядовой Кудрявцевлан армийыште космический назначениян «Союз-2» ракетым обслуживатлаш логалын. Кызыт «И с нами голуби» спектакльысе рольжымат угыч сылнештараш ямде. Вет тушто Сашалан самолёт дене модмым шарналташ кӱлын. Тидлан вуйушыж дене йоча жапым шарналтен, кеч йӧратыме модышыжо робот ден супергерой-влак лийыныт. Иктаж кум репетиций деч вара Саша самолёт дене модаш тунем шуын… А вара пӱрымашак, очыни, артистым космический войскашке «колтен».

Пӧртылмекыже, «В овраге» пьесе почеш (А.Чехов) «Коремыште» постановкышто модмыжым ужна. Анисимын рольжым уло кумылын модо. Сылнын келыштарыш! Вет тиде образым Алексей курсовой спектакльыштыжат чоҥен. Кызыт жюри тудым ужын да аклен. Шкежат ты пашам кӱлеш семын ыштен моштымыжлан шотла.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: