"Улам мый Рве-зы-лык!" рубрик, 2018 ий, Вӱдшор тылзын 2-шо кечыже

Йоча-влак дене куанен тырша

Статьян авторжо Анастасия Эманова

Шукерте огыл И.Я.Яковлев лӱмеш Чуваш кугыжаныш педагогике университетыште студент-влаклан «Профессию, которую я выбрал» конкурс-фестиваль лийын. Тушто МарГУ-со Педагогике да психологий институтышто тунемше ӱдыр-влакат участвоватленыт. Нунын коклаште иктыже – Морко ӱдыр Елена Ксенофонтова.

ксенофонтоваЛена Марий Кужер ялыште шочын-кушкын. Кумшо класс марте Марий Кужер школышто тунемын. Тудым петырымеке, Морко посёлкысо 1-ше №-ан школыш каен. Ӱдыр изинек туныктымо аланыште пашам ышташ шонен. Йоча-влак дене модаш, нунылан полшаш йӧрата. Лена «психология и педагогика дошкольного образования» профиль дене нылымше курсышто тунемеш. Кызыт диплом пашам воза. Тылеч посна тӱрлӧ научно-практический конференцийыште участвоватла. А кодшо арнян «Профессию, которую я выбрал» конкурсышто пӱсӧ уш-акылжым ончыктен. «Тиде фестиваль-конкурсышто МарГУ-н кок командыже участвоватлен. «Садовницы» командыште мый да пырля тунемше эше ныл ӱдыр лийынна. Тыгак нылымше курсыштак психологий да социальный педагогике направленийыште тунемше ӱдыр-влакын «Сила педагога» командыже выступатлен. Чылаже 11 команде лийын. Вес республик гыч ме веле толынна. Ик команде Чебоксарысе медицине колледжын лийын, молышт – Чуваш педуниверситетын. Фестивальыште трудым, англичан йылмым, музыкым, математикым туныктышо, воспитатель, филолог, психолог, социальный педагог, историк, правовед, медсестра да моло профессий нерген видеоролик ден презентаций йӧным кучылтын каласкалыме. Кажне команде эмблемым ямдылен, пӱсӧ уш-акылжым интеллектуальный конкурсышто ончыктен. МарГУ-н кок командыже сайын выступатлен. Мемнан «Садовницы» командына «Широкий профессиональный кругозор» номинацийыште ойыртемалтын», — каласкала студентке.

Е.Ксенофонтова творческий шӱлышан ешыште кушкын. Ачаже Морко посёлкысо йоча библиотекыште сӱретчылан пашам ышта, аваже Марий Кужер клубышто – художественный вуйлатышылан. Ӱдыр йоча годсек творчествылан шӱман кушкын. Ялысе клубышто самодеятельный коллектив дене пырля мурен, куштен, тӱрлӧ сценкылаште участвоватлен. Йочасадлаште практикым эртыме годымат занятий-влакым творчески эртара. Ньога-влакым тӱрлӧ модыш дене модыкта, мастарлыкыштым нӧлташ полша. Лена пала: педагог-психолог профессий лач тудын. Кеч пашадар изи, но ты сомыл тудлан куаным конда. А тидыже, студенткын шонымаште, эн тӱҥ.

Нылымше курс деч вара Е.Ксенофонтова магистратурыш заочно тунемаш пураш шона, тыгак Йошкар-Оласе иктаж йочасадыште пашам ыштынеже. «Березка» йочасадыште практикым эртымыж годым пашашке ӱжыныт ыле. «Кызытсе йоча-влак шуко палат, нуно эре ала-мом шымлат. Кажне икшывын чонышкыжо корным муман, тудын дене мутланен моштыман. Йоча воспитатель, туныктышылан ӱшанышаш. Практикым эртыме годым тӱрлӧ ситуаций лиеден. Мутлан, йоча, вес икшыве-влак дене ынеже мутлане, шкенжым ӧрдыжтӧ куча. Тыгай годым кузе лийман? Нигунам икшывым мутланаш, я иктаж пашам виеш ыштыктыман огыл. Тудо ӧрдыж гыч эскерен шогыжо. Вара моло йочан куанжым ужын, шкенжынат кумылжо лектеш. Тӱрлӧ модыш гоч йоча-влак чолгалыкыштым ончыктат», — манеш Е.Ксенофонтова.

Лена ончыкшым сай специалист лияш манын, чыла йӧным кучылтеш. Шуко лудеш,  МарГУ-што англичан йылме переподготовко курсым тунем лектын. Кызыт эше логопедлан тыгаяк курсышто тунемеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: