"Рубрик деч посна", 2018 ий, Вӱдшор тылзын 6-шо кечыже

Курыкмарийыште канен моштат

Статьян авторжо Елена Годунова

_At5mUyGAIMКурыкмарий район Йынгы Парнингаш ял ныл уреман. Тыште руш, олык, курыкмарий-влак, чылаже шӱдö наре еҥ ваш келшен илат. Нуно мланде пашам йöратат. Шукышт пакчасаскам (пареҥгым, ковыштам, кешырым, кабачокым, чеснокым), мöрым ончен куштат да ужалат.

Ялыште ны школ, ны кевыт, ны почто, ны клуб уке. Йоча-влакым Эман селасе школыш автобус кондыштара. Тӱрлö сатулан пошкудо Усоласе кевытыш коштыт. Кевыт ваштареш йо»нан вер уло, тушто Йынгы Парнингаш да Усола ялласе калык, пырля погынен, тӱрлö пайремым эртара. 2015 ийыште У ий пайремым вашлияш икымше гана погыненыт, а тений гыч Роштом, Ӱярням пырля пайремленыт. Пайрем-влакын тӱҥ организаторжо — Йынгы Парнингаш ялысе самырык ӱдыр Анна Федосеева. Тудо шкеак сценарийым келыштара. Тидын нерген тыгерак мане:

- Ялысе еҥын ыштышаш сомылжо эре шуко. Лач пашам ыштен илаш веле ок лий, каналташат кӱлеш. Чаманен каласыман, мемнан ялыште клуб уке. А вет самырыкшат, илалшыракшат чон канен пырля муралтынешт, кушталтынешт. 2015 ийыште пырля погынен, У ий пайремым эртарышна. Сценарий почеш Йӱштö кугызат, Лумӱдырат, тӱрлö герой-влакат лийыныт. Кажныжлан костюмым прокатыш налынна ыле.  Ӱмаште уло ял дене оксам погышна да Лумӱдыр дене Йӱштö кочан костюмжым нална. Ынде костюм шкенанак уло. Пайремыш шкенан ялысе, тыгак пошкудо Усоласе еҥ-влак погынат. Оксам поген, уремыште чапле ӱстелым погена. Озавате-влак когыльым, перемечым, мелнам кӱэштын кондат, моло йöрваржым погымо окса дене кевытыште наледена. Икмыняр гана район вуйлатыше мемнам саламлаш толын ыле. Сценарий почеш тӱрлö конкурсым эртарена. Тидыже кумылым утларак  нöлта, еҥ-влакынат веселаҥмышт шижалтеш. Йоча-влаклан ялыште лӱмын модаш площадке уке. Садлан нунылан чапле кугу курыкым телым ыштена. Тушто нуно веле огыл, кугыеҥ-влакат ватрушко, олым мешак дене мунчалтат.

Мемнан дене калык сайын канен мошта. Ик ситыдымаш уло – чыла пайрем уремыште эрта. Тидын шотышто район вуйлатыше дек йодмаш дене лектынна ыле. Клубым Троицкий Посадыште чоҥаш палемденыт, но тушко каяш мемнан деч пеш тора, сандене еҥ-влаклан кошташышт каныле ок лий.

Каласыман, ялысе калык тыгак оксам поген, тыште илыше Владимир Ильич Антоновлан велосипедым пöлеклен. В.Ильич сулен налме канышыште гынат, пайремым эртарымаште пеш полшен шога. Электричествым, вӱдым шупшеш. Икманаш, иктаж паша лектеш гын вуйым ок шупш, чылажымат яра ышта. Тыгак фотограф семын тырша, вара фотокартычкым печатлен, чылаштлан яра пуэда.

Йынгы Парнингаш ял калык вес пайремым 1 Майлан эртараш шона. Кызыт Анна тидлан сценарийым воза. А илен-толын, тысе весела, икоян ял калыкын шке клубышо лиеш манын ӱшаныме шуэш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: