"Рубрик деч посна", 2018 ий, Вӱдшор тылзын 20-шо кечыже

Мотор тувыраш – пöртын ик тӱҥ ужашыже

Статьян авторжо Елена Годунова

иванщербаковШуко еҥ чапле пöртым чоҥа, пачерым налеш, кызытсе илышлан келшыше ремонтым ышта. А илыш вашталт толмо дене ремонт ожнысо деч ятырлан ойыртемалтеш. Пытартыш жапыште пластик окна, натяжной манме тувыраш (потолок), шокшо кӱвар да тулеч моло у шомак-влак лектыныт. Чылажым паленат шукташ ок лий. Таче ме натяжной манме тувыраш шотышто специалист Иван Щербаков дене мутланена.

Иван Кужэҥер район Шӱдымарий ялыште шочын-кушкын. Кужэҥер посёлкысо профессиональный училищыште трактористлан тунем лекмек, армийыш каен. Налме профессий дене пашам ышташ логалын огыл. Ик жап Москош вахте йöн дене пашаш кудалыштын, вара Йошкар-Оласе тувырашым шупшшо ик компанийыш пашаш пурен. Компаний пашаеҥ-влакым Москошко лӱмын туныкташ колтеден. Иванат шинчымашыжым тушто нöлтен. Вич ий компанийыште пашам ыштымек, шканже шке пашам ышташ тӱҥалын. Кызыт еҥ-влакын йодмышт почеш, чапле, мотор тувырашым ышта.

- Иван, натяжной манме потолокым кузе умылыман? Кузе тудо ышталтеш?

Фотопечать3Д

- Натяжной тувырашым ышташ тунеммем годым олаште ик-кок тыгай фирме-влак веле ыле. Тачысе кечылан моткоч шуко компаний уло. Тыгодым натяжной потолоклан материалым темлыше фирме-влакат шагалын огытыл. Производитель-влак матовый, глянцевый, цветной полотно дене ыштыме, 3Д-фотопечатян, шуко уровенян тувырашым темлат. Ме шукыж годым ПВХ-плёнко (глянцевый) але ткань (матовый) дене ыштыме материалым кучылтын, тувырашым шупшына. Ткань ден ПВХ икте-весыж деч шуко молан ойыртемалтеш. Но тидыжымат, тудыжымат синтетике материал гыч ыштат.

Плёнко гыч шупшмо тувыраш яклака, глянецевый, матовый, сатиновый ӱмбалан лиеш. Матовый ош потолок классикылан шотлалтеш. Тудо водоэмульсионный чия дене ошемден чиялтымыла коеш. Полотно гыч шупшмо чиялтыме деч тöррак лиеш. ПВХ полотно гыч шупшмо глянцевый потолокышто воштончышто гай арвер-влакын сынышт сайын коеш. Тыгай потолок пöлемым кугуракым да волгыдыракым ышта.

Материалын качествыж нерген ойлаш гын, производительын кузе пашам ыштымыжым шотыш налына. Сайын ыштыше фирме материалым нигунам шулдын ок темле. Садлан шулдо аканым кычалыда гын, качествым шотыш налаш ида мондо.

Тувырашыш материалым шупшаш тӱҥалме деч ончыч пырдыжышке кузе шупшмо шотышто точкым пӱтырен шындат. Вара тудын почеш полотном шупшыт. Натяжной потолокым шупшаш префараторым, шуроповёртым, газ балоным, пушкым кучылтыт.

- Натяжной потолокым шупшаш специалистым шӱдымö деч ончыч мом ыштыман?

- Оза тидлан пырдыжым ямдылышаш. Пырдыж шпаклеватлыме, тöремдыме лийшаш. Обойым пижыктыме деч ончыч ӱжыктат гын, сайрак, конешне. Пырдыжым шӱткалыме годым пижыктыме обойыш пурак, лавыра шинчын кертыт. Тыгай годым пуракым пылесос дене эрыктен налаш лиеш. Ме гын тыгеат ыштена: ончыч каркасым погена, вара озан обойым пижыктымыжым вучена да потолокыш полотном шупшын кодена. Каркасым алюминий профиль але пластик гыч погат. Профиль саморез дене тувырашыш пижыкталтеш. Ме каркаслан алюминий профильым кучылтына. Тудын акше пластик деч шергырак, но тыгай профиль дене потолок тöр лиеш. Кок пöлеман пачерлан каркасым погаш ик кече кӱлеш, тыгак ик кече — полотном шупшаш. Но тыгодым могай люстрым, светильникым, гардиным ыштынешт, шотыш налман.

- Кок уровенян тувырашым ышташ йодшо-влак шукын улыт. Тудо кузе ышталтеш?

- Эн ончыч тыгак тӱҥ каркас погалтеш. Вара заказым ыштыше еҥын йодмыж почеш толкын, квадрат але круг форман каркас келыштаралтеш. Каркас ямде лиймек, ончыч ик уровеньым полотно дене шупшына, вара — вес уровеньым.

- ПВХ ден тканевый полотнон сай да уда могырыштым палаш оҥай ыле.

- Натяжной тувырашым шупшмо годым тудын сайжым да удажым палыман. ПВХ полотно гыч ыштыме потолок 15 ий наре шке моторлыкшым ок йомдаре, ик квадрат метр 100 килограмм марте нелытым чыта (шуко пачашан пöртыштö кӱшыл пачашысе пошкудын вӱд пучшо шӱтлен гын, полотно вӱдым кучаш тӱҥалеш, люстрым сакалтыме вер гыч вӱдым поген налаш лиеш). Акше шулдо, писын ышталтеш, могай кӱлеш, тугай тӱсым ойырен налаш лиеш. Монтаж системым ӱшанлым да качественныйым ойырен налат гын, тӱрлö экшык, пунышкымо деч аралтышым ышташ лиеш. Удаже: пӱсö арвер дене йоҥылыш шӱтен колташ лиеш, олтыдымо пöртлан келшен ок тол, йӱк-йӱан шокта, шокшым сайын ок кучо.

Тканевый полотнон сай могыржо: пӱсö арвер логалеш гынат, ок шӱтлö, ок удыралалт, 20-25 ий марте шке сынжым ок йомдаре, пуракым ок пого, йӱштö, шокшо температурым чыта, полотном шупшмо годым ырыктен толашыман огыл, шкеак шарла, йӱк-йӱан пешыже ок шокто, шокшым аралаш полша. Удаже: тыгай полотно матовый веле лиеш, тудым вашталташ огеш лий (вес тӱрлым ышташ шонеда гын, уэш чыла вашталтыман), вӱдым колта (тидын дене шке моторлыкшым йомдара, шукырак логалеш гын, профильыш пижыктыме гынат кушкедлен кертеш).

- Натяжной тувырашым кузе эрыктыман?

- ПВХ полотно гыч ыштыме тувыраш вӱдыжгö деч ок лӱд. Садлан тудым вӱдыжгö салфетке дене ӱштын налаш лиеш. Лавыра койынак палдырна гын, мушмо средствым кучылтын, ночко лапчык дене мушман. Тидын годым полотном чот тазан йыгыман огыл. Изирак лавырам кукшо салфетке дене йыген налман. Глянцевый потолок ондакысе семынак йылгыжше манын, нашатырный спирт, полироль але яндам мушмо средство дене эрыктыман. Тканевый полотно гыч ыштыме потолок вӱдым ок йöрате, сандене тудым лӱмын щётко але пылесос дене гына эрыктен налман.

- Лудшына-влаклан ала иктаж темлымашда лиеш?

- Эн ончыч, мутат уке, ӱшанле специалист-влак деке кайыман. Нунын кузе пашам ыштымыштым паледа гын, качество шотышто тургыжланаш огыда тӱҥал. Могай полотно дене потолокым ыштышашым клиент шке ойырен налеш, садлан тидын шотышто ончылгоч полотно-влакым шымлыман. Люстрым, светильникым, лампым кушто вераҥдаш шонеда, тыгак ончылгоч шоныман.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: