"Рубрик деч посна", 2018 ий, Вӱдшор тылзын 13-шо кечыже

Мурызо лияш изинек ямдылалтын

Статьян авторжо Светлана Кушакова

Анна Фомичёва Э.Сапаев лӱмеш опер да балет театрыште кумшо тургым пашам ышта. Сопрано йӱк дене мурышо артистым ятыр постановкышто ужаш лиеш. Анна консерваторийыште тунеммыж годымак опер студийын шындыме «Ночь перед Рождеством», «Зори здесь тихие» спектакльлаште мурен. Палыме мурызо ден туныктышо Галина Писаренкон, Элизабет Байсын мастер-класслаштышт лиеден. 2007 ийыште «Молодые голоса 2007» республикысе конкурсышто кокымшо вер дене палемдалтын. 2015 ийыште «Sforzando» тӱнямбал конкурсын дипломантше лийын.

фомичева- Анна, театрын сайтыштыже Озаҥ олаште шочында манын возымо. Ты олаштак консерваторийым тунем пытаренда. Шуко шоненда мо могай олаште пашам ыштыме нерген?

- Мый шочмо олалан Йошкар-Олам шотлем. Тыштак йоча пагытем, студент жапем эртеныт.

Тошто театрыш спектакльым ончаш чӱчкыдын коштынам. Тусо артист-влак дене палыме лийынам. Э.Сапаев лӱмеш опер да балет театрыште 2015 ий годсек, ынде кумшо тургым пашам ыштем. Иктаж-могай вес олашке пашам ышташ каяш шонымаш лийын огыл. Чынак каласышда, Озаҥ олаште шочынам. Ачам военный, садлан мыланна илыме верым икмыняр гана вашталташ логалын. Йоча пагытем Йошкар-Олаште эртен. Авам Елизавета Александровна Поволжский кугыжаныш технологический университетыште пашам ышта.

- Изи ӱдыр-шамыч мурызо лияш чӱчкыдын шонат. Тендан тыгай шонымашда лийын мо?

- Чынак, тыгай шонымаш изиэм годымак ыле. Авам каласкала ыле, кум ияшем годымак мураш йӧратенам манеш. Эреак мурен коштынам. Кушкын шумеке, академический муро деке утларак шӱмаҥынам. Авамат опер искусствым йӧрата. Тудошке жапыштыже мурызо лияш шонен, но шонымашыже шукталтын огыл. Садлан ӱдыржӧ-шамычым музыкальный школыш тунемаш колтен. Тидлан авамлан кугу таум каласем. Тыгодым мемнан кумылнамат шотыш налын. Алена музыкальный школышто хореографий пӧлкаште тунемын. Кызыт йоча хирурглан пашам ышта.

- Те Палантай лӱмеш тӱвыра да сымыктыш колледжым тунем пытаренда. Кузерак студент пагыт эртен? Вет музык талантым веле огыл, чытышымат йодеш…

- Колледжыште южшак искусство дене темше. Тудым мыят, пырля тунемме йолташем-влакат шочмо пӧртлан шотленна. Ме тушто эр гыч тӱҥалын кас марте заниматленна, тунемынна, усталык шӱлыш дене авалтынна. Кажныже артист лияш шонен. Мый туныктышем Владимир Фёдорович Ромашкинлан тауштем. Тудо музыкым йӧраташ, шижаш туныктен. Шкежат уло чонжо дене пашаж верч йӱла. Владимир Фёдорович музык тӱняште кумдан палыме мурызо-влак дене палдарен, вокал искусствын историйже нерген каласкален, чапле фонотекыже, нотный билиотекыже улыт. Кажне студентлан эреак полшен шоген.

- Палем, Озаҥ олаште Жиганов лӱмеш кугыжаныш консерваторийыште тунеммыда годым опер мурызо, профессор Галина Трофимовна Ластовкан курсышкыжо логалында.

- Тидымат пеш кугу пиаллан шотлем. Галина Трофимовна — шке пашажым палыше, уста туныктышо. Туддеч койыш-шоктышем вияҥдаш, пеҥгыдемдаш тыршенам, артист семын йол ӱмабк шогалынам. Театрыште паша ойыртемалтше. Галина Трофимовна, нимом ончыде, кӧргӧ виян лияш, шкалан ӱшанаш туныктен. Тудо кеч-могай неле чоныштет лиеш гынат, шке пашатым мучаш марте достойно шуктышаш улат манын ойлен. Артист эн ончыч ончаш толшын кумылжым налын моштышаш. Коллективыштат ответственный лийшаш. Молан манаш гын, спектакль — тӱшкан ыштыме паша. Галина Трофимовна шке деке критичный лийман манын ойлен, тидыже артистлан кушкаш да эреак шке дене пашам ышташ полша.

- Опер мурызын паша инструментше – йӱк. Йӱкда ынже йом, ынже локтылалт манын, иктаж-мом ыштеда мо?

- Йӱк гигиене манме умылымаш уло. Кузе каласышда, мурызо-влакын паша инстурментышт — йӱк. Ты инструментым нигузе весе дене алмашташ але ум налаш огеш лий. Черланымеке, кок изи йӱк связке локтылалтеш. Садлан кылмен черланаш лӱдыкшӧ. Кажне мурызын, очыни, шке йӱкшӧ дене пашам ыштыме йӧнжӧ уло. Спектакль кечын утыжым ом муро, йӱклан канаш пуэм. Шкежат канем.

- Оҥай пален налаш: кечыште мыняр шагат муреда?

- Кажне кечын тӱрлӧ семын. Кажне арнян зритель-влаклан ала-мом гынат темлена. Садлан паша ятыр. Репетиций-влак лиедат. Шкежат йӱк дене пашам ыштет. Очыни, кум-ныл шагатше погына.

- А тыглай музыкым колыштыда?

- Мутат уке, колыштам. Студент годым рок музык келшен. Кызытат колыштам. Неле рокым йӧратем. Каныме семын поп мурымат колыштам. Музыкын кажне направленийже оҥай. Академический, инструментальный, симфонический музык эн лишыл.

- Яра жапдам кузе эртареда?

- Яра жап шагал гынат, тудым пайдалын эртарем. Ола мучко йолын кошташ, пӱртӱсыш лекташ йӧратем. Мемнан кундем, олана пеш сылне. Тыгак тӱрлӧ книгам лудам. Йолташем-влак дене вашлиям.

- Оперлаште могай партий тыланда эн йӧратыме?

- Чаманен каласаш логалеш, але марте тӱҥ партийым мурен омыл. Шонем: чылажат ончылно. Театрын репертуарже поян. Мыланем Бизен «Кармен» оперже келша. Тушто Фраскитан партийжым мурем. Тиде опер – шедевр. Тушто нимом утым шонкалыман огыл, музык чыла почын пуа. Кок самырык еҥын йӧратымашыже чыла нелылыкым сеҥаш полша.

- Мурызын йӱкшӧ веле огыл лийшаш. Эше пӱсӧ ушыж дене ойыртемалтшаш, очыни. Мутым монден колтеда, тыгай лиеда?

- Меат вет айдеме улына. Кажне гана сценыш лекмеке, чыла сайын эрта манын ӱшанена. Ик тыгай случай мый денем лийын. Мутым мондымемлан кӧра шке семынат шонен луктын мураш логалын. «Здравствуйте, я ваша тётя!» опер ыле. Йӧра, ончышо-влак нимом шижын шуктен огытыл, но коллегем-влак спектакль деч вара пеш воштыльыч. Мыланна оперым оригинал йылме денат мураш логалеш. Тений кок оперым: «Карменым» француз йылме, «Травиата» итальян йылме дене — шындена. Тидланат чот ямдылалтман. Мурызо-влак дене нине йылмылам туныктышо-влак заниматлат.

-Кажне еҥ чонлан келшыше пашам ышта гын веле пиалан улеш. А тыланда тендан пашада мо дене шергакан?

- Кажне пашаште сайжымат, удажымат палемдаш лиеш. Мый тыге каласен ом керт. Молан манаш гын хобби ден паша мыйын иктыш ушненыт. Кажне гана сценыш лектын, эн ончыч шке нергенем эреак уым пален налам. Тидым тӧрлаташ, тыште кушкаш кӱлеш манын, иктешлымашым ыштем. Тидыже личность семынат, артист семынат вияҥаш полша.Кажне кечын ончылнем тӱрлӧ задачым шындем да тыге шонымашкем эркын шуаш тыршем.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: