"Воштылаш товатат сулык огыл" рубрик, 2018 ий, Вӱдшор тылзын 6-шо кечыже

Мыскара илышым койдара веле огыл…

Статьян авторжо Ирина Ямбаршева

Теният 1 апрельыште ме, «Кугарня» газет редакций, М.Шкетан лӱмеш Марий драмтеатрыште «Воштылаш, товатат, сулык огыл!» конкурсым эртарышна.

DSC_6070Мыскараче-влакын кумылын ушнымышт куандарыш. Эн ончыч тыгаяк мыскара конкурс-влак Шернурысо, Волжский район Приволжскийысе да Моркысо тӱвыра пӧртлаште лийыч. Ондакысе ийла дене таҥастарымаште, ты гана шукырак тӱрлӧ жанр дене выступатленыт. Конкурсна моло деч ойыртемалтше манын, ты гана гармонь да моло семӱзгар дене мыскара муро-влакым иквереш ончыкташ тыршыме.

Ий гыч ийыш мыскарачына-влак илышыште вашлиялтше пӱсӧ умдан койдарчык-влакым кычалыт. Кажне гана 1 апрельыште сценышке палыме да палыдыме еҥ-влак шке мыскарашт дене толыт. Теве Морко калык театр поро йолташышкына савырнен. Тудым вуйлатыше Анна Якушева режиссёр пашам шукта. Ты гана 29 мартыште Морко тӱвыра пӧртыштӧ эртыше концертлан тудо ныл номерым ямдылен. Нунын кокла гыч иктыжым — «Покто веле, корно сай» сценкыжым – ойырен налме. Анна Васильевна шкеже Шеҥше кундем гыч, сандене ялысе лавыран корнын чоныш витарымыжым, ик ӱдырамашын ял гыч Татарстаныш шумеш тувыртышым кочкаш каяш тарванымыжым, мотоцикл дене пижын шичмыжым ончыкташ тыршен. Тидыжым Евгений Губернов ден Наталья Алексеева действий-влак дене пантомиме семынрак ончыктышт. Жюри ты номерлан икымше верым пуыш. Евгений тӱвыра аланыште пашам ышта гын, Наталья — медицине сферыште. Кӧ ала шарналта: Наталья икана ты конкурсышто пӧртым мушмо тоя дене ончыктымо сценкыжлан призовой верым налын ыле.

Кокымшо вер Волжский район Корамас кундемын чолга ватыже-влаклан логале. Культорганизаторлан пашам ыштыше Алевтина Ильина ден пенсионерке Алевтина Иванова «Ушкал-влакын диалогышт» сценкым темленыт. Кок «ушкалын» вашлийын мутланымыштым колышташ моткочак оҥай ыле. Иктыже — Волжский районысо «Москва» озанлыкын ушкалже лийын, весыже – пошкудын. Нуно суртвольыкын илышыжым чо-о-т келыштарен моштышт. Мо куандара: тыште «Чоткар тукым» фольклор ансамбль уло. Отборочный турышко икмыняр номерым конденыт ыле, чыла сценкыжымат тӱшкан шонен ямдыленна, маньыч.

DSC_6123Кумшо верым Марий самырык театрын самырык актрисыже-влак Галина Соловьёва ден Наталья Николаева сеҥен нальыч. Таки ден Плаги марлан кайыдыме шоҥго ӱдырамаш-влакын кузе коймыштым ончыктыльыч. Нуно Россий телевидений дене ончыктымо кумдан палыме «Русские бабки» манме дуэтым ушештарат да шкешотан «Марий вате-влак» улыт. Актрисе-влаклан нине образ-влакым кажне ийын келгемдаш тыланена да ончыкыжымат конкурсыш толаш ӱжына.

Жюри нылымше верым але ончышо-влакын призыштым пуаш кутырен келшыш. Тидлан посна спонсорна ыле – мебельым ыштен лукшо «Амарис» фирмын озаже Ольга Аптышева. Тудо призым Кужэҥер посёлко гыч толшо, тусо «Воштончыш» калык театрын участницыже Эльвира Егоровалан кучыктыш. Мыскара кумылан ӱдырамаш сценыш пӧръеҥ вургемым чиен лектын да тудын койышыжым почын пуаш тыршен. Удан огыл лектын, ончышо-влакын кумылыштым савырен кертын.

Тенийысе мыскара конкурсын ойыртемже – семӱзгар дене шоктышо-влакын шкешотан таҥасымашыштым эртарымаш. Шукынжо гармонь дене мыскара мурым темленыт. А Морко район Тыгыде Морко тӱвыра пӧртын «Йорга каче» группыжо тӱрлӧ семӱзгар дене артистла койын: мурен, куштен, семӱзгарым шоктен, перкален, мурыктылын. Ты группым тусо тӱвыра пӧртым вуйлатыше Вениамин Николаев чумырен, тудак номер-влакым ямдылен. Сценыште Вениамин Николаев, Андрей эргыже, тыгак Александр Никитин, Эдуард Крижановский марий койышым кӱлеш семынак ончыктышт, сандене ончаш толшо еҥ-влак совым рӱж кырен вашлийыч да ужатышт. Жюри член-влак ик еҥ семынак нуным сеҥышылан шотлышт да икымше степенян дипломым кучыктышт.

Кажне ийын «Воштылаш, товатат, сулык огыл!» конкурсыш ятыр мыскараче толеш, шке пайдале жапшым номерым сценыш лукташ ойыра. Кажне гана марий артист-влакым концерт программым сӧрастараш ӱжына. «Кугарня» газет редакций тыланда кугу таум каласа да мастарлыкдам нӧлташ, творческий пашаштыда сеҥымашке шуаш тылана. Ончыкыжымат чолга да мыскараче еҥ-влак ынышт шагалем ыле. Сеҥыше радамыш логалдыме артистна-влакын кумылышт ынже воло. Ончаш толшо калык ятыр гана сценыш лекше мыскарачым вуча, пӱсӧ мыскара номерым ончыкта манын ӱшана. Сандене кажныдам вес ийын 25-ше гана лийшаш конкурсыш вучена.

Эльвира Терентьева.

И.Речкинын фотожо-влак.

DSC_6177

DSC_6225

DSC_6164

DSC_6239DSC_6237DSC_6267DSC_6328DSC_6344DSC_6363DSC_6390DSC_6414DSC_6440DSC_6538DSC_6476DSC_6289

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: