"Рубрик деч посна", 2018 ий, Вӱдшор тылзын 13-шо кечыже

Салтакыш 600 наре еҥым налыт

Статьян авторжо Светлана Кушакова

2 апрельыште элна мучко Россий Вооруженный Вийыш шошымсо призыв тӱҥалын. Призыв комиссий-влакым республикысе чыла олаште да районыште ыштыме. Тудлан район вуйлатыше-влак вуйын шогат.

1Россий армийыш 18 ийым темыше, но 27 ий деч кугу огыл, пеҥгыде тазалыкан рвезе-влакым служитлаш налыт. Служитлыме жап — 12 тылзе. 2017 ийыште шошо призыв годым Россий мучко 140 тӱжем утла самырык еҥ салтак лийын. Теният тынарак служитлаш колташ шонат. Мемнан республикыште 600 наре еҥ салтак радамыш логалшаш. Шошо призыв кузе эрта, могай вашталыш-влак пурталтыныт, тыгак контаркт почеш служитлыме нерген республикысе военный комиссар Сергей Сидоркин да военный комиссариатын пашаеҥже-влак пресс-конференций годым каласкаленыт.

Ӱмаште «О воинской обязанности и военной службе» федеральной законыш вашталтышым пуртымо. Тудын почеш тазалыклан кӧра тылеч ончыч служитлаш йӧрдымылан шотлымо еҥым эмлалтме деч вара призыватлен кертыт.

Кажне призывник призывной комиссийым эртыме радамым палышаш. Икымше этап — медицине тергымаш. Тылеч вара комиссий погына, да ты рвезе служитлаш йӧра але укем палемдат. Тыгак могай войскаш каыме, отсрочкым налме амал ончалтыт.

Ӱмаште вашталтышым пуртымо деч вара самырык-влакым психике шотышто тергаш тӱҥалыныт, психологический состоянийыштым саемдаш манын, паша ышталтеш. Россий обороно министерстве призывник-влакын уда койышыштым пален налме шотышто лӱмын методикым ямдылен. Призывной комиссийым годым самырык еҥ тестым эрта. Вара призывникын службылан йӧрымыжым але укем палемдат.

Салтаклан сборный пунктышто личный гигиене арвер-влак, кукшо паек, телымсе да кеҥежымсе формо пуалтыт. Кажне салтакын шке электронный картыже лиеш, «МИР» тӱлымӧ системе банк карте пуалтеш.

Профессиональный кыдалаш але высший образованиян еҥ-влак контракт почеш служитлаш каен кертыт. Контракт службым чыла призывник кокла гыч 90 еҥ ойырен налын.

Призывник-влакым эшелон дене наҥгайыме годым вагон-рестораныште пукшат. Тений кум еҥ альтернативный службым ойырен налын, а 2003 ий годсек тыгай службым 64 еҥ эртен. Нуно тӱҥ шотышто эмлыме верлаште пашам ыштат. А альтернативный службым кушто эртен кертме шотышто спискым Россий правительствын пунчалыштыже ончыктымо. Альтернативный службым эртыме жап – ик ият индеш тылзе.

Могай войскашке служитлаш колтымым ончалаш гын, тений тӱҥ шотышто сухопутныйыш логалыныт.

Молгунамсе семынак военный службын престижшым нӧлтымӧ паша кая. Армийыште служитлыдыме еҥ-влакым кугыжаныш да муниципальный службыш пашаш огыт нал. Да салтакыш кайыме деч шылаш шонышо-влакат кажне ийын шагалемыт. Россий обороно министерствын вузлаштыже тунемаш пурышо-шамыч, направленийым йодын, молгунамсе деч утларак толыт. Ик верышке 30-40 еҥ погынат. Тений 300 еҥ лийын.

Кызыт рвезе-влак контракт почеш служитлаш утларак кумылаҥыт. Тидыже военный службын престижше кушмо дене кылдалтын. Военный лияш шонышо-влак эреак ешаралтыт. Сай пашадар тӱлалтеш. Служитлыме жапым, верым, должностьым, званийым шотыш налын, пашадар эреак ешаралтеш. Ик ий кок ий семын шотлалтеш. Садлан 10 ийым служитлымеке, пенсийыш лекташ лиеш. Военный-влаклан кугыжаныш ипотеке дене илыме верым налаш полша. Тидлан кажне ийын 260 тӱжем теҥге утла окса (тылзыште 22 тӱжем наре лектеш) пуалтеш. Илаш нигушто гын, служебный пачерым пуат. Моло семынат куандарат.Медицине тергымашым яра эрташ лиеш. Канаш кайыме годым корно роскот тӱлалтеш. Военныйын илышыжым да тазалыкшым страховатлат.

25 апрельыште Марий Эл Республикын военный комиссариатшын Сборный пунктшо гыч шошымсо призывын икымше тӱшкаже армийыш служитлаш кая.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: