"Рубрик деч посна", 2018 ий, Вӱдшор тылзын 13-шо кечыже

Чолга студент гыч председатель марте

Статьян авторжо Елена Годунова

Марий Элысе ӱдыр-рвезе-влакын «Вперёд и вверх» форумышт икымше гана мартыште эртаралтын ыле. Тушко ятыр самырык ӱGA8osXeme84дыр-рвезе ушненыт. Иктышт шке возымо проектышт, ыштыме пашашт дене палдареныт гын, весышт кугурак, опытан еҥ-влакым колышташ толыныт. Любовь Темиргалиева дене мый ты форумышто палыме лийынам. Тудо «Здоровая и спортивная молодёжь – сильная страна!» секцийыште участвоватлен. Торгово-технологический колледжыште кумшо курсышто технологлан тунемеш.

Люба Йошкар-Олаште шочын-кушкын. 9-ше класс марте Йошкар-Оласе 19-ше номеран школышто тунемын. Торгово-технологический колледжын эртарыме омсам почмо кечышке миен толмек, ты колледжыш тунемаш пураш шонен пыштен.

- Колледжыште икымше гана лиймеке, тыште тунемшаш ыле манын шоненам. Мыйын чонемлан тыште чылажат лишылла чучын. Тыге 9-ше класс деч вара технологлан тунемаш пуренам. Ты колледжыште сайын тунемаш веле огыл, тыгак активист лияш шонен пыштенам. Икымше курс гычак тӱрлö мероприятийыште шкемым чолган ончыкташ тыршенам. Тений мыйым колледжысе студсоветыш председательлан шогалтеныт. Председательлан кум активист темлалтын ыле. Нунын кокла гыч иктыже – мый. Шкенан нерген докладым ыштыме деч вара студсоветысе активист-влак шукынжо мыланем шке йӱкыштым пуэныт. Тыге председательлан сайлалтынам, ынде идалык мучко ты пашам ышташ тӱҥалам. Вес ийын вара вес еҥым сайлат.

Колледжыште эртаралтше мероприятий, конкурс-влаклан тӱрыснек мый мутым кучем. Сандене чылажат сайын эртыже манын, ответственно пашам шукташ тыршем. Тылеч посна мемнан колледж оласе, республикысе мероприятийлаште чӱчкыдын участвоватлаш тырша. Тылзылан ик гана активист-влак дене погынена да тӱрлö темым лончылена. Студсоветыште 50 наре студент уло: старосто, тӱрлö актив да чолга студент-влак. Тыгак председатель семын туныктышо-влаклан студент-влакын илышышт нерген тӱрлö йодышым решатлаш полшем.

Самырык-влакын форумышкышт Люба опытан еҥ-влак дене палыме лияш толын ыле. Тудо МВД дене наркотик ваштареш кучедалме шотышто кокымшо ий кылым куча. Таза илыш-йӱлам кучымо шотышто патриот улмыжым ончыкта да самырык-влак коклаште тыгай аяр дене аҥыргыше-влак шагалрак лийышт манын тырша. Темиргалиева икымше курс гычак доброволец-влакын школышкышт коштеш. Кызыт ответственность шукеммылан, жап чӱдылан кöра шуэнрак тушто лиеш. Но нунын эртарыме мероприятийышкышт кошташ жапым муаш тырша. Ӱдыр волонтёр пашамат шуко шукта. Колледжын веле огыл, доброволец-влакын школыштыжат волонтёрын сомылжым кумылын ышта.

2017 ий шыже гыч Люба Йошкар-Ола мэрын стипендиаткыже. Сайын тунеммыжлан, колледжын илышыштыже сай пашам шуктымыжлан тудым мэрын стипендиаткыжлан темленыт. Сай пашам ыштыме такшым эре аклалтеш, тачысе кечылан ӱдырын моткоч шуко чапкагаз, тӱрлö семинарыште, конкурсышто участвоватлымыжым пеҥгыдемдыме сертификатше уло. А форум деч вара тудо иктаж проектым возен, илышыш шыҥдараш шона. Лач тыгай шонымашан еҥ-влак сеҥымашке шуыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: