"Олимп" рубрик, 2018 ий, Ага тылзын 21-ше кечыже

Каныш кечыштат яра ок кий

Статьян авторжо Анастасия Эманова

11-13 майыште Татарстанысе Альметьевск олаште «Татнефть» ПАО-н призше верч греко-римский кучедалмаш дене Российысе таҥасымаш лийын. Тушто Марий Элын чапшым ныл спортсмен арален. Иктыже – Киров олан шочшыжо Роман Казаков.

SOuiSsEnm6UРоман изинек спортлан шӱман кушкын. Шкеж нерген тудо тыге каласкала: «Кок-кум ияш годым ковамын пулвуйышкыжо шинчам ыле да шке семынем боксерла кид дене лупшкедылынам. Йочасадыш коштмо годым греко-римский кучедалмаште вием терген онченам. Варажым футбол секцийыш коштынам, ече дене таҥасымашлаште участвоватленам. Но ала-молан тиде мылам куаным конден огыл. 11 ияш улмем годым спорт дене профессионально заниматлаш тӱҥалынам.  Кировышто греко-римский кучедалмаш дене залым почыныт да тушко кошташ тӱҥалынам. Икымше тренерем Владимир Анатольевич Погодин лийын. 2016 ийыште Йошкар-Оласе олимпийский резерв училищыш тунемаш пуренам. Тушто мыйым таҥасымашлан Игорь Витальевич Калинин ямдыла. Шочмо гыч кугарня марте кечеш кок гана тренировко лиеда. Эрдене училищыште прием-влакым чын ышташ тунемына, а кастене «Юбилейный» спорт комплексыште физический вийнам шуарена. Каныш кечыштат яра ом кий. Куржталаш лектам, бассейныш коштам. Конешне, южгунам ны вий, ны кумыл тренировкыш каяш уке. Но кайыде ок лий. Кажне турнирлан кыртмен ямдылалтам. Альметьевск олаште лийше таҥасымаште сайынжак выступатлен омыл. Амалже – черланенам ыле. Такшым греко-римский кучедалмаш дене тӱрлӧ Всероссийский да тӱнямбал турнирыште сеҥыше да призер радамыш ик гана веле огыл логалынам. Кок гана Россий первенствыш отборым эртенем. Юл кундем федеральный округышто единоборствын ты видыштыже призер лийынам. Греко-римский борьба дене Марий Элын да Киров областьын сборныйыштышт выступатлем. Спорт мастерыш кандидат улам. Ончыкшым Олимпийский модмашке логалаш шонем. А сеҥымашке шуаш мыланем лишыл еҥем-влакын полышышт да сай музык полшат. Шкем формышто кучаш тыршем. Мом кочмем эскерем. Мастарлыкем нӧлташ манын, кумдан палыме спортсмен-влак Роман Власовын, Артём Сурковын бойыштым эреак ончем. Спорт увер-влакым эскерен шогем».  

Рвезын альбомжо гыч налме фото.  

 

 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: