"Олимп" рубрик, 2018 ий, Ага тылзын 25-ше кечыже

Модын илаш сайрак

Статьян авторжо Ирина Ямбаршева

18 майыште «Кугарня» газет редакцийын пашаеҥже-влак Унчо селашке мийышна. Тыште, Морко кундемын ик сылне лукыштыжо, уна-влакым вашлияш эре ямде улыт.

DSCN3894«Мелнам тамлен, пурам подылын, Унчо кундемын ямжым налза», – каласыш мемнам вашлияш лекше, тысе книгагудым да «Кӱдыроҥгыр» ӱдырамаш клубым вуйлатыше Лидия Ямнеева. Тиде клубышко сулен налме канышыш лекше коло наре ӱдырамаш коштеш. Нуно тӱрлӧ мероприятийыш кумылын ушнат, марий кочкышым ямдылат, мурымат муралтат. Мемнам вашлийшыла, уста гармонист Юрий Ивановын семже почеш вате-влак сылне мурым йоҥгалтарышт, кумылнам тарватышт.

Книгагудышто погымо чесым тамлымеке да икте-весе дене чон почын мутланымеке, чыланат школ велыш тарванышна. Школ кудывечыште кокшӱдӧ наре тунемше погынен, йоча-влак мемнана дене пырля марий модыш дене модаш ямдылалтыныт.

Тиде кечын школ стадион гӱжлен гына. Кажне класслан тӱрлӧ модыш палемдалтын: «Вараш ден чыве», «Кол ден колызо», «Сокыртага», «Кулай-кулай», «Лапта», «Агытан кучедалмаш», «Йыдал дене ӱчашымаш», «Вӱдвара дене куржталмаш» да молат.

«Мый шке чывигем-шамыч верч ойгырем, нуным аралем, варашлан кочкаш ом пу», – шыргыжале 1-ше классыште тунемше Оля. А 8-ше класс гыч Саша Петров «Лапта» дене модаш мемнамат туныктыш, «Чот перет гын, кум гана почела куржат», – мане тудо. Могай тушто чот пераш, тунемме деч посна тоя дене мечышкыжат от логалте!

DSCN4061Ӧрдыж гыч ончетат, куштылгыла чучеш, но кажне модышышто мастарлык да чолгалык лийшаш улыт. Тидланже модмо годым веле тунем кертат. Вуят пашам ышта, капкылат пеҥгыдемеш, койыш-шоктышат шуаралтеш. Теве 2-шо класс ӱдыр-рвезе-влак пелйола тӧрштылын, йолташым палемдыме вер гыч ваче дене шӱкен луктын модыч. Пуйто агытан-влак кредалыт. Тиде модмаш эн ончычак йочан йол вийжым пеҥгыдемда. «Сокыртага» гын чулым лияш туныкта. Адакшым шинчам петырен модмаш вуйдорыклан моткоч пайдале.

Тӱшка (команде) дене модмо годым йоча-влак ик шӱлышан лияш, йолташ верч мутым кучаш тунемыт. Тидыже вӱдвара дене вӱдым нумалме годым поснак шижалте. Тыште «Кугарня» газет редакций пашаеҥ-влакат вийыштым тергеныт, туныктышо ден тунемше-шамыч дене таҥасеныт. Кӧ сеҥен маныда? Мутат уке, келшымаш!

Шижалтеш, тиде ялысе школышто йоча-влак марий шӱлышан улыт, шке коклаштыштат шочмо йылме дене мутланат, эсогыл модмаш пайремышкат марий вургемым чиен толыныт. Чыла тидыже туныктышо да ача-ава-влакын суапышт.

Кугарня кечын Унчо кундемыште модын каналтымына нигунамат ок мондалт. Газетнан лӱмжӧ дене тыште илыше калыклан чон почын тауштена. Пашада ушныжо да лектышан лийже!

Алёна ЯКОВЛЕВА.

Иван Речкинын фотожо-влак.

DSCN4037DSCN4082DSCN4088DSCN4107DSCN4158 DSCN4161 DSCN4182DSCN4210DSCN4220 IMG_0137IMG_0154IMG_0170

DSCN4066 DSCN4068 DSCN4070 DSCN4079

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: