"Ме марий улына" рубрик, 2018 ий, Ага тылзын 14-ше кечыже

Олаште шочын-кушшо марий мыскараче-влак

Статьян авторжо Ирина Степанова

квн1Башкирийыште тений региональный лигашке «Сборная марийцев» лӱман команде икымше гана ушныш. Выступленийшытым социальный сетьлаште шукышт ончен кертыч. А кӧ нуно улыт тиде чолга марий ӱдыр-рвезе-влак? Таче КВН марий командыште модшо-влак дене палымым ыштена.
Максим Тимершин Башкир кугыжаныш аграрный университетын КВН командыжын пашажым вӱда. Тугак шке моштымыжым тӱрлӧ мероприятий, пайрем, сӱан-влакым тамада семын эртарымаште тапта. Алексей Апсатаров Башкир кугыжаныш университетыште тыгаяк пашам наҥгая, тудат шоумен семын палыме. Настя Алимова БашГУшто романо-германский филологий факультетыште шинчымашым пога. Сценысе лӱмжӧ — Глаша. Яра жапыштыже англичан да француз йылмыла дене репетитор пашам шукта. Нылымше модшо еҥ — Ильнур Шайбаков. БГАУ-н студентше, спортсмен-боксёр.
- Марий КВН командым погаш икмыняр ий ончыч Алексей Апсатаров дене коклаштына мутым луктынна. Ме тудын дене студентна годымак КВН модмаште палыме лийынна. Мый шке вузын командыштыже модынам. Алексей — шкенжыныште. Икте-весым сайын пален шуктымо, келшена, — каласкала Максим.
Рвезе-влакын ойлымышт гыч умылышым: моло КВН командыште марий ӱдыр-рвезе-влак эше улыт, но, чаманен палемдаш кӱлеш, шукыштын нунын деке ушнаш кумылышт уке, сценыш лектын, «Мый марий улам!» манын каласаш кажнынант чолгалыкше ок сите. Садлан мый Максимым, Алексейым да Настям тачысе кечылан марий самырык-влак кокла гыч ойыртемынак палемден, нуным талешке тӱшкаш пуртынем.
Максим Нефтекамск олаште шочын-кушкын, Алексей ден Настя — Уфаште. Рвезе-влак йоча жапыштышт чӱчкыдын ава-ачашт дене пырля нунын шочмо яллашкышт миен коштыныт. Максим марла сайын умыла, кутыраш тырша. Алексейлан тидын шотышто нелырак. Настя — марий ялыш мийыдыме, олаште шочын-кушшо кумшо тукым айдеме. Тудын коваже (аважын аваже) эше самырыкше годымак республикын рӱдыолашкыже толын, руш рвезылан марлан лектын.
Марий КВН команде деч ончыч кок чолга рвезе Максим ден Алексей «Юмарийцы» лӱман юмористический дуэтым чумырат. Кундемышкына гастроль ден толшо марий артист-влакын концертлаштышт да тӱрлӧ пайремыште калыкым воштылтат. Посна видеосюжетым сниматлат да «ВКонтакте» да «Инстаграмма» социальный сетьлаште дуэтын блогышкыжо шындат.
- Сценарийым шке возена. Нигӧ гай кояш огына тырше. Садлан шкенан концептшым муна, шкенан корно дене кайынена. Марий семым, шочмо калыкнан культурыжым пагалена. Тиде шонымаш денак программышкына шуко марий семым, куштымашым пуртенна. Икымше выступленийлаште марий калыкынам презентаций семын ончыктенна. Молан манаш гын студент-влак коклаштат чӱчкыдын «Мариец? Интересно, а откуда они у нас?» манмым колалтын. Тиде — икымше задачына. Кокымшо: марий сем ден КВН-ым ушаш лиеш. Тиде шонымаш денак ме программышкына мурызо Сергей Байназовым ушнаш ӱжынна. Мемнан йодмыланна тудо уло кумылын келшыш. Кугу таум каласена, вет тиде марте ме тудын дене шинчаваш ужын-вашлийын огынал ыле, — каласкалат рвезе-влак, — Ончыкылан шонымашна кугу да волгыдо, шке вийланна ӱшанена. Марий предприниматель-влак кокла гыч окса дене полшаш шонышо еҥ лектеш гын, пеш куанена. Шкенан весела кумылан да пашам йӧратыше марий калыкнам уло тӱнялан пырля ончыктена ыле.
Кызытеш марий командын репетицийже-влак рвезе-влакын пашам ыштыме верлаштышт эртат. Республикысе марий культур автономийым вуйлатыше Павел Исадыкович Бикмурзин чолга рвезе-влаклан кидым шуялтен, ончыкыжым полшаш сӧрен.

Елена Газина.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: