"Кузе илет, ялем?" рубрик, 2018 ий, Ага тылзын 11-ше кечыже

Олорышто паша муро йӱк шергылте

Статьян авторжо Ирина Ямбаршева

«Олор – сандалык ор», — мура ик мурыштыжо палыме марий режиссер Василий Пектеев. Мый ты шомак дене пӱтынек келшем. Тиде ой ты яллан да тыште илыше калыклан чот келшен толеш. Олорышто моткоч марий шӱлышан да шке калыкым, пошкудым, ялым пагалыше, йӧратыше-влак илат. Тышечак тӱҥалеш мотор Элнет эҥер.

Тиде ял мылам эше весыланат лишыл. Параньга район Олорышто лишыл йолташем, апшат, кидмастар да художник Н.Г.Тимофеев ила. Мый чӱчкыдын тудын деке мием, тусо еҥ-влакын портретыштымат ятыр сӱретленам. Олорышто кум-ныл гана (рашыжым ом шарне) персональный выставкым эртаренам ыле. Кызыт ты сӱрет-влак Н.Тимофеевын кугу пӧртыштыжӧ аралалтыт.

DSC07807DSC07799Май тӱҥалтыште каныш кечылан мийымем годым весе ӧрыктарыш: ял калык, рӱжге погынен, субботникыш лектын. Чыла ялыште тыгайым от уж таче. Меат йолташем дене коктын тушко кайышна. Кидешем фотоаппаратым нальым. Олор ял шотан илемым вуйлатыше Ю.А.Сидоров да тудлан полшышо чолга еҥ Александр Порфирьевын тыршымыштлан кӧра еҥ-влак шке ялыштым эрыкташ лектыныт. Эрыктышт Кугу Отечественный сарыште лийше-влакым шарныме лӱмеш обелиск верым. Тиддеч тораштак огыл кеҥежым Пеледыш пайремым эртарат, тудымат сылнештарышт. Икте кукшо пушеҥгым руа, весе шорвондо дене эрыкта, кумшо ӱштеш. «Ондак, совет жап годым, субботник кайыме годым семым, тӱрлӧ мурым кугун гына чӱктен шындат ыле, — шоналтышым семынем. – А тыште нимогай муро ок кӱл, паша йӱк мурыла шергылтеш, могай сай».

Тыге келшен илыше, вашла полшышо ялын ончыкылыкшо уло.

Иван Ямбердов.

Авторын фотожо.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: