"Шинчымаш кугорнышто" рубрик, 2018 ий, Ага тылзын 11-ше кечыже

Палыме лийза: туныктышо-новатор

Статьян авторжо Анастасия Эманова

Морко район Зеленогорск кыдалаш школышто туныктышо-новатор Миральда Александровна Воробьёва пашам ышта. Тудын туныктымо стажше – 33 ий. ИКН уроклаштыже тӱрлӧ йӧным кучылтын, йоча-влакым шке предметшым йӧратен тунемаш кумылаҥда.

Миральда Александровна Весшӱргӧ ялыште туныктышо ешыште шочын-кушкын. Ешыште ныл йоча DSC_7729лийыныт, но лач тудо туныктышо профессийым ойырен налын. «Ачам Александр Михайлович Самойлов Весшӱргӧ школышто директорлан ыштен, биологийым туныктен, а авам Валентина Михайловна Бекешева ты школыштак – математике ден физикым. Чаманен каласыман, ачамын ӱмыржӧ кӱчык лийын. Вич ияш улмем годым тудо колен. Авам шкет ныл йочам йол ӱмбаке шогалтен, туныктен луктын. Туныктышо лиям манын, изинек паленам. Йоча-влак дене пашам ышташ, шуко уым пален налаш тунамак йӧратенам, — ойла М.Воробьёва. — Оршанке педучилищыште тӱҥалтыш класслам туныктышылан тунем пытарымеке, Кожлаял школышто кок ий пашам ыштенам. А вара Зеленогорскысо качылан марлан лектынам. Ынде 31 ий посёлкысо школышто пашам ыштем. Тышке пашаш толмо годым марий йылмым да ИКН-ым туныктен огытыл. 1993 ийыште школышто ИКН-ым туныкташ тӱҥалынам. Тунам шкежат, эше саымырык туныктышо чылажым пален омыл. Тидын годым Крупская лӱмеш пединститутышто тӱҥалтыш классам туныктышылан заочно тунемынам. Школыштына марий йылмым кугыжаныш семын визымше да индешымше класслаште туныктена. Тылеч посна мый туныктымо да воспитатлыме паша шотышто директорын алмаштышыже улам».

М.Воробьёва 2016 ийыште туныктышо-влакын шочмо да руш йылме-влакым туныктымо шотышто Всероссийский мастер-классыштышт участвоватлен да тушто «Туныктышо-новатор» номинацийыште кокымшо верым налын. «Йочам кумылаҥден моштыман. Тӱрлӧ йӧным кучылтам. Туныктышымат огыл, кунар предметым йӧратышт манын шонем. Кызытсе саман дене тӧр ошкылаш тыршем. Всероссийский конкурсышто участвоватлаш йоча ден туныктышо-влак кумылаҥденыт. ФГОС-лан келшыше ИКН дене урокым эртаренам. Тушто информационно-коммуникационный, критический мышленийым вияҥдыме технологий-влакым кучылтынам. Йоча-влакым группо дене пашам ыштыктенам. Нуно пырля филвордым ямдыленыт. Урокын видеофрагментшым Москош колтенам. Жюри пашамым сайын аклен», — каласыш туныктышо.

Миральда Александровна шке пашажым йӧратен ышта. Йоча-влаклан уло чон шокшыжым пуа. Тудын тунемшыже-влак ИКН дене районысо, республикысе олимпиадылаште кажне ийын призовой верым налыт. Ӱдыр-рвезе-влак тунемаш тыршат манеш, но икте кумылым волта: интернетыште ямде мӧҥгысӧ пашам муын, уроклан ямдылалтыт, шонаш ӧрканат.

Кызыт школышто Марий Талешке кечым эртараш ямдылалтыт. Тушто туныктышо-новатор шкешотан викториным ышташ шона. Шкеже кызытсе саманыште Талешкылан Марий тӱвыра рӱдерым вуйлатыше Наташа Пушкинам шотла.

М.Воробьёва школ нергенат каласкалыш. Легенде поснак чот оҥай. Пуйто школым шӱгарла олмышто чоҥымо. Тидлан кӧра йӱдым тӱрлӧ томаша лиеда. Орол-влак кокымшо пачашыште изоклассыште йӱк-йӱаным колыт, тул чӱкталтмым ужыт. «Кызытат тыге ойлат. Чынжым-укежым ойлен ом керт. Мый школышто пычкемышеш кодам гынат, иканат тыгайым шекланен омыл. «Но кастене школым эртен кайыме годым чон ала-молан вургыжеш», – манеш туныктышо.

Зеленогорск школышто 137 йоча тунемеш. Школ пеленысе йочасадыш 40 икшыве коштеш. 18 туныктышо да 2 воспитатель пашам ыштат. Йоча-влакым автобус Весшӱргӧ, Изи Кугунур, Ӱшӱттӱр да Нурӱмбал ялла гыч кондыштара.

Директорын пашажым вич ий чолга ӱдырамаш Елена Гарриевна Александрова шуктен шога. Школышто материально-технический базым уэмдыман, но окса чӱдылан кӧра, чылажым иканаште ышташ огеш лий. Туныктышо-влак, шке оксам поген, проекторым налыныт улмаш. Тыште шке пашаштым палыше еҥ-влак тыршат. Мутлан, биологий ден химийым туныктышо Валентина Александровна Силина 2009 ийыште 100 тӱжем теҥгеаш грантым сеҥен налын. Чаманен каласыман, самырык туныктышо-влак шагалын улыт. 2017 ий сентябрь гыч Юлия Викторовна Мартюшева физкультурым туныкташ тӱҥалын. Тудо Оршанке педколледжыште заочно тунемеш. Шкеже Сыктывкар ола гыч тышке толын. Школышто делопроизводительын родыжо. Тудын денак ила. Юлия Викторовна дене мутланаш шонышна, но тӱрлӧ амаллан кӧра ышна керт.

Школ кугу, класс-влак волгыдо уло. Столовыят сай. Йоча-влаклан кочкаш повар-влак Лидия Яковлева, Галина Смоленцева ямдылат. Нунылан завхоз Галина Дигина, кӱмыж-совлам мушшо Тамара Иванова полшен шогат. 137 тунемше кокла гыч 51 йоча шуко шочшан еш гыч улыт. Нуным школышто яра пукшат.

Вашке 15 майыште М.Шкетан лӱмеш драме театрын коллектившын тыршымыжлан кӧра школышто Марий Эл Республикысе тӱвыран сулло пашаеҥже Юрий Русановлан мемориальный оҥам почыт. Тудо Зеленогорск школышто (школын у зданийжым 1994 ийыште чоҥымо)  9-ше класс марте тунемын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: