"Кузе илет, ялем?" рубрик, 2018 ий, Ага тылзын 28-ше кечыже

Таче практикант — эрла яллан чапле специалист

Статьян авторжо Ирина Ямбаршева

Тений 13-15 февральыште Москваште ВДНХ-ште эртыше «Наставник» всероссийский форумышто Россий президент В.В.Путин предприятий, бизнес корпораций, федеральный да региональный кучем, коммерческий огыл организаций да образовательный учреждений-влакын наставникыштлан наставничествын профессиональный могыржым вияҥдыме нерген ойлен. В.В.Путин палемден: айдеме ойырен налме шке профессийжым йӧратыде ышта гын, пашаштыже кӱкшӧ результатыш ок шу. Сандене тунем лекше самырык еҥлан тиде койышым шуараш предприятийласе наставник-влакын полышышт тӱҥалтыш жапыште пеш кӱлешан.

01Теве Йошкар-Оласе аграрный колледжыште автомеханиклан тунемше индеш студент, Германийыште стажировкым эртымеке, Медведево район «Пригородный», Советский район «У илыш» да Марий Турек посёлкысо «Росагро» озанлыклаште диплом деч ончычсо практикым эртат. Кажныштлан посна техникым ойырымо, озанлыкысе кугу опытан механизатор-влак кокла гыч наставникышт улыт. Тидын годым стажер тӧр праван специалист лийын кодеш.

Чыла тидым шке шинча дене ужаш манын, колледжын директоржо Г.В.Богданов дене Советский район «У илыш» СПК-шке миен толна. Мемнам озанлыкын вуйлатышыже И.Н.Баранов, тӱҥ агроном Н.И.Богачук Кӱшнур ял воктенысе пасу тӱрыштӧ вашлийыч. Нуно студент-влак нерген моктен веле ойлышт. Техникым йӧратыме, тудым моштен обсуживатлыме нергенат сайым веле колалте. Тидыже чоным путырак куандара.

Практикант-влаклан илаш да пашам ышташ тыште кӱлеш йӧным ыштыме: илыме верым ойырымо, сайын пукшат. Паша кечеӱдымӧ пагытлан келыштарыме семын 5 шагат эрдене тӱҥалеш да 6 шагат кас марте шуйна. Пашадарым, озанлык вуйлатышын ойлымыж почеш, моло механизатор-влак семынак иктӧр тӱлаш ыштыме. Мутланымына годым мемнан воктеке Марий Эл правительстве председательын алмаштышыже Ю.Н.Сидыганов миен шогале. СПК-н вуйлатышыже да тӱҥ агроном дене пасу паша кузе кайыме нерген мутланаш тӱҥале.

Тидын годым куралмым тӧремдыше агрегатым йӧнештарыман МТЗ-80 трактор дене практикант-влак кокла гыч иктыже, Виталий Данилов, лишкына толын шуо. Колледж директорым ужын, тудо куанен шыргыжале. Весела рвезе практике кузе кайыме нерген ойлыш да, «Шошо кече идалыкым пукша» калыкмутым шарнен шогышо кугыеҥ семын тракторышкыжо шинчын, пасушко тарваныш.

11Тиддеч вара ме тӱҥ агрономын «Нива» машинаж дене тыгаяк трактор дене пасум культивироватлыше Роман Пахомов деке кудална. Студентын весела, куан тулан шинчаончалтышыже ушеш сӱретлалт кодо.

Вольык комплексыште ме Т-150 трактор дене тӱрлӧ кӱлешан пашам шуктышо, Оренбург кундемыште шочын-кушшо Семен Желонкин дене вашлийна. Тудат пашам куанен, кожмакын ышта. Коеш, тунем пытарен, армийыш миен толын, пашам сайын ыштен илаш тӱҥалнеже.

Пытартышлан озанлык вуйлатыше И.Н.Баранов дене Тапшер ял шеҥгеке, Т-150 трактор дене тырмалыше Максим Янцевинов деке, миен лекна. Курыкмарий кундемын поро шинчаончалтышан шочшыжын «деловой» койышыжо мыланна чылалан келшыш. Тудо писын тарванылеш, опытан специалист семын агрегатшым ончалеш, трактор рульым пеҥгыдын куча.

Тыге «У илыш» озанлыкыште эрласе специалист-влакын пашалан сайын ямдылалт шумыштым ужаш лиеш. Коеш, технике — пеҥгыде кидыште. Тидын верч Йошкар-Оласе аграрный колледж да кӱшнӧ ончыктымо озанлык тыршат.

Иван Речкин.

Авторын фотожо-влак.

06 07 DSCN3586 DSCN3537

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: