"Рубрик деч посна", 2018 ий, Ага тылзын 11-ше кечыже

Тӱвыра пашалан кумылан модель, волонтёр

Статьян авторжо Елена Годунова

ЖаннаТений январь мучаште Марий Эл радио «Идалыкысе муро — 2017» фестивальым эртарыш. Тушто фестивальын статуэткыжым мурызо-влаклан мотор, лывырге капкылан ӱдыр пуэдыш. Тачысе лаштыкыште ты мотор ӱдыр дене палдарена.

Жанна Фёдорова — Морко ӱдыр. Шеҥше селаште шочын-кушкын. Тысе школышто шинчымашым поген. Школышто тунеммыж годым Жанна тысе тӱвыра пöртын ик эн чолга участницыже лийын. Тушто марий куштымашлан, мурылан шӱмаҥын. Нуно тӱрлö концертлаште шке мастарлыкыштым ончыктеныт. Тылеч посна ӱдыр театрализоватлыме постановкылаште роль-влакым чӱчкыдын модын, конкурслаште вийжым тергаш йöратен. Районысо «Эчук ден Пампалче» конкурсышто участвоватлен. Тушто тудо пидын да тӱрлен моштымо мастарлыкшым ончыктен. Школышто Жанна крючок дене пидын, тӱрлен. Садлан конкурслан шальым, салфеткым да молымат пидын ямдылен. Республикысе «Маленькой ёлочке хорошо в лесу» конкурсышто Жанна шогертеным модын. Тиде конкурс тудлан поснак шарнымашеш кодын. Конкурс Йошкар-Олаште эртаралтын, тунам Жанна олаште икымше гана лийын.

Школ деч вара, Фёдорова МарГу-со Калыкле тӱвыра да тӱвыра кокласе институтыш этнокультурный рӱдерым вуйлатыше специальностьлан тунемаш пурен. Кызыт нылымше курсышто тунемеш. Молан ты специальностьым ойырен налынат манын йодмемлан тыгерак вашештыш:

- Мыланем тӱвыра аланыште пашам ышташ моткоч келша. Вет мый изинек ты сомыллан шӱман кушкынам. Сандене школым тунем пытарымек, могай профессийым налаш кӱлмö нерген шуко шонкален омыл. Студент годым волонтёр нерген утларак пален налынам да шкежат волонтёр лияш кумылаҥынам. Молан манаш гын тудо калыклан поро пашам ышта, шуко пала. Тыгак шуко у йолташым муаш лиеш. А илышыште йолташ-влакын полышыштлан чӱчкыдын эҥерташ логалеш. Тыге мый шкенан институтышто эртаралтше «Угинде» пайремыште, «Богатство финно-угорских народов» форумышто, калык фронтын эртарыме «Форум действий. Регионы» (тушко В.Путин толын ыле) форумышто волонтёрын пашажым шуктенам.

Икымше курсышто «Голос юности», «Студент шошо» фестивальлаште участвоватленам.

Жанна шуко вере поро пашам шукта, чылажымат кумылын ышта. А эше тудо Алина Кутыреван (Креклинан) «Fashion» модельный студийыштыже модельлан тунем лектын. Тидын нерген тыгерак мане:

- Такшым модель лияш ик ганат шонен омыл. Кумшо курсышто тунеммем годым модель-влакым тунемаш вучат манме увертарымашым ужынам ыле. Капем кужу, молан тöчен ончаш огыл манын шоналтенам да отборым эрташ кумылаҥынам. Но вараш кодынам улмаш. Ик жап гыч эше лиеш манын каласеныт. Тыге кокымшо гана миенам да мыйым налыныт. Пел ий модельный студийыште тунемынам. Тунем лекмек, сертификатым пуэныт. Кызыт тӱрлö кевытын вургемжым ончыктымашке ӱжыт. Тушто ӱдыр -влак дене пырля у вургем коллекций дене палдарена.

Шуко модель ӱдыр тӱрлö диетыште шинча. Жаннан ойлымыж почеш, модель улат гын, кочмо шотышто шкем кучыман. Но тудо нимогай диетыште ок шинче, шке нормыжым пала. Телым ече дене коштеш. Ончыч «Марий мурсем» ансамбльыште куштен. Кызыт жап чӱдылан кöра тушко коштмым чарнен. Яра жапыште книгам лудаш, яндар южышто лияш йöрата.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: