"Сылнылык тӱня" рубрик, 2018 ий, Ага тылзын 11-ше кечыже

Удмурт койышыжо кумылым савыра

Статьян авторжо Анастасия Эманова

Дмитрий Яковлев Марий Турек район Кугу Карлыган ялыште шочын. Кызыт К.А.Андреев лӱмеш Карлыган кыдалаш школышто 11-ше классыште чыла «визытанлан» веле тунемеш. 

ЯковлевРвезын талантшым йочасадыштак ужын шуктеныт. Школыш кайымекыже, тӱрлӧ кружокыш коштын, балалайке да баян дене шокташ тунемын. Ялысе тӱвыра пӧртыштӧ выступатлен.  Репертуарым пойдараш да келшыше мурым ойырен налаш удмурт рвезылан «Зардон» ансабльын художественный вуйлатышыже Мария Аркадьевна Главатских полшен. Тудак сценыште шкем чын кучаш туныктен. «Репертуарышкем удмурт да руш муро-влак пурат. Ялыште ик концертат мый дечем посна эртен огыл, очыни», — ойла Дима.

Уста рвезе кугурак класслаште «Зардон» удмурт фольклор ансамбльын солистше лийын. «Эстрадный вернисаж» конкурсышто вийжым терген, республике кӱкшыт марте шуын, диплом дене палемдалтын. Кугурак лийме дене йӱкат вашталтеш. Тидлан кӧра икмыняр жаплан сценым коден каен.
7-ше класс гыч «Зардон» ансамбльыш аккомпаниаторлан пашам ышташ пурен, тачат тыштак тырша. Д.Яковлев музыкальный школышто  баян класс дене вич ий тунемын. Гастроль дене шуко вере ансамбль дене пырля коштеш. «Аккомпанементлан утларакшым гармоньым кучылтам, шуэнрак – баяным. Тыгак балалайке, гитар да ударный семӱзгар дене шоктем. Кодшо ийын кеҥежым ансамбль дене пырля Крымыш «Алтын Майдан» конкурсыш миен коштынна. Мый этно-эстраде мурызо-влак коклаште икымше вер дене палемдалтынам», - каласкала самырык рвезе.

Тений «Ший памаш» конкурс-фестивальыште 3-шо верым сеҥен налын.
Диман ачаже, коваже ден кочаже шке жапыштыже ансамбльыш коштыныт, муреныт да куштеныт. Ачаже моткоч яндарын мура, ондак клубышто выступатлен. Аважынат вокальный данныйже уло. Изаже музыкальный школышто баян дене шокташ тунемын, ялысе оркестрыште шоктен, кушташат мастар.
«Тыгай ешыште шочаш пиал логалын гын, кузе шке илышет музык дене от кылде? Умбакыжымат тиде пашам ом шу, но профессийым весым ойырен налаш шонем. Стоматолог лийнем. Кызыт ЕГЭ-лан кыртмен ямдылалтам», — ойла Д.Яковлев.

Еш альбом гыч налме фото.

Христина Александрова. 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: