"Ме марий улына" рубрик, 2018 ий, Ага тылзын 11-ше кечыже

Хант-Манси велне «Ӱжара» нӧлтеш

Статьян авторжо Ирина Ямбаршева

2010 ийысе перепись годым Хант-Манси округышто 7289 марий еҥ илен гын, таче кечылан Сургут олаште гына 7 тӱжем наре марий уло. Сургут, Нягань, Нижневартовск, Когалым олалаште илыше марий-влак, иквереш погынен, мер организаций-влакым ыштат. Нунын кокла гыч иктыже — «Ӱжара» — 2012 ийыште шочын.

Ханты3Тышке Хант-Манси округысо Советский ден Югорск олала гыч участник-влак коштыт. Кок ола кокла индеш меҥге лиеш. Репетицийыш Советский оласе «Юность» клубыш арнялан кок гана погынат. Клубышто гармонь, марий журнал ден книга-влак улыт. Участник-влак шукынжо Марий Турек район да Пошкырт кундем гыч толыныт. Ты олашке ешышт дене илаш кусненыт, тыштак пашам ыштат.

Ушем тыште илыше марий-влак коклаште йылмым, тӱвырам аралаш да самырык-влаклан палдараш манын ышталтын. Клубышто икте-весылан тӱрлӧ мастер-классым ончыктат, марий кочкышым ыштен кондат. Тыгак тӱрлӧ пайремыште марий-влакын тӱвырашт, йӱлашт дене палдарат. Национальный культур фестиваль, национальный вургем конкурс, тӱрлӧ мастер-класс да тулеч молат эртаралтыт. Теве, мутлан, национальный культур фестиваль годым Шорыкйол пайрем йӱлам модын ончыктеныт. «Жемчужина русской культуры» фестивальыште марий сӱан вургем дене палдареныт. «Согретые Севером» мероприятийыште марий йылме урокым эртареныт, шовычым чын пидме шотышто мастер-классым ончыктеныт, марий вургем дене подиумышто коштыныт.

Тачысе кечылан ты ушемыште 20 утла еҥ уло. Нунын кокла гыч нылытше – йоча. Икшыве-влак марла почеламутым лудыт, кушташ, мураш йӧратат, но чаманен каласаш логалеш, марла огыт мутлане.

Кодшо ийын «Югра многонациональная» фестивальыште марий калыкын чапшым араленыт.

«Ӱжара» мер ушемым София Ташбулатовна Бадамшина вуйлата. Тудо Югорск олаште ешыж дене 1984 ий годсек ила, Советский оласе рӱдӧ эмлымверыште хирургий отделенийыште медсестралан ышта.

Роксана Аймурзина, Пошкырт кундем Мишкан районын ӱдыржӧ, Марий кугыжаныш университетым тунем пытарымек, 2016 ийыште Югорск олаш толын. Кызыт тушто заочно тунемеш, чонлан келшыше пашам ышта.

Надежда Валиева — Пошкырт кундем Краснокам районын шочшыжо. 1986 ийыште еш дене пырля тышке толын. Ӱмыржӧ мучко Тюмень оласе энергобытовой компанийыште (ТЭК) бухгалтер-кассирлан пашам ышта.

Лариса Айдимирова ден Ольга Минибаева Пошкырт кундем Балтач район гыч улыт. Лариса марийже да йочаж дене пырля 1994 ийыште Советский олаш илаш толын. Оласе эмлымверыште младший медсестралан тырша, кидпашам ышташ йӧрата. Ольга Советский олаште ешыж дене 2004 ий годсек ила. Йочасадыште воспитательын полышкалышыжлан пашам ышта.

Екатерина Бадретдинова Пошкырт кундем Мишкан район Тымбай ял гыч. Аважын марий вургемжым арала. Эмлымверыште медшӱжарлан пашам ышта.

Илья Андреев — Марий Турек район Сардаялын шочшыжо. Югорск олаште чоҥышо-влак бригадым вуйлатен. Тиде бригаде 38 утла пӧртым чоҥен. Марий организацийлан спонсор семын полышкала.

Светлана Мусаляева ден Анисия Горбач Пошкырт кундем Калтаса район гыч улыт. Светлана ушемын участникше-влаклан вургемым сӧрастара, согам, ӱштым, оҥыш сакаш арверым шке кидше дене ышта. Йочасадыште бухгалтерлан тырша. Анисия 1996 ийыште Советский олаш илаш куснен, АТП-ыште кондукторлан пашам ышта.

Шукерте огыл, 1 майыште, ушемын участникше-влак «Мы голосуем за мир» национальный культур фестивальыште марий калык кочкышым, марий вургемым ончыктеныт, тӱрлӧ марий сем почеш (попурри) куштеныт.

Снимкыште: Шола гыч пурлашке шогат: София Бадамшина, Светлана Сафаргалеева, Лилия Ахмадеева, Роксана Аймурзина, Людмила Камаева, шинчат: Александр Ягодаров, Илья ден Дмитрий Михеевмыт.

Роксана Аймурзина.

Фото — ушемын архивше гыч.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: