"Сылнылык тӱня" рубрик, 2018 ий, Ага тылзын 11-ше кечыже

Чон шижмашыже — мурышто

Статьян авторжо Анастасия Эманова

 «Шулдырем-шулдырем, ярнымем ит ончо, кава тӱрым ужнем, кече кушто шочын». Тыге мура ик мурыштыжо Ксения Юркина (Григорьева). Самырык мурызо илышыштыжат уло вийжым, ӱнаржым йӧратыме пашажлан, ешыжлан пуа. Чыла шотыштат сай кӱкшытыш шуаш тырша. Звенигово район Эсмекпляк селан шочшыжо кажне мурыжым чонжо гоч колта. Тудын репертуарыштыже ойганжат, веселажат, шонаш таратышыжат улыт.

юркина- Ксения, ме палена, школышто тунеммет годым тале спортсменке лийынат. Куштылго атлетике дене таҥасымашлаште эреак участвоватленат. Кузе вара сымыктыш тӱняш логалынат?

- Мурызо лиям манын иканат шоналтен омыл. Вожылшо йоча кушкынам. Школышто тунемме годым класс дене веле пырля муренам, посна лекташ ӧрынам. Эсмекпляк клубыш куштымо кружокыш кошташ йӧратенам. Кудымшо классыште пелийлан Звенигово школыш тунемаш каенам. Тушто музык урок вес семын эртаралтын. Туныктышо класс ончыко  тунемше-влакым икте дене луктын мурыктен. Шкет мурымем колын, хорыш возалташ темлен. Но мый шым тошт.

А мӧҥгыштӧ караоке дене мураш йӧратенам. Ачам мыйым поснак чот шулен колыштеш ыле. Кассетышкат  мурымем возен. Арален кодымо. Но пӱрымаш деч от курж докан.  9-ше классым тунем пытарымеке, 2007 ийыште, йолташ ӱдырем дене пырля Палантай лӱмеш тӱвыра да сымыктыш колледжыш калык семӱзгар пӧлкаш тунемаш пуренам.

Колледжыште тунемме деч посна «Югорно» бард клубыш коштынам. Пешак гитар дене шокташ тунеммем шуын. Икымше занятийыш толмо годым гитар почеш муралташ йодыныт. Тыге гитар кружокыш огыл, а мураш кошташ тӱҥалынам.

 - Кугу сценыш кунам икымше гана лектынат? Могай шижмаш чонетым авалтен?

- 2008 ийыште «Югорно» кружокыш возалтме деч вара Диана Ямбаршева дене дуэтыш шогалтеныт, «Канде шинча» мурым мураш темленыт. Тудым самодеятельный композитор Александр Мамаевын гитар дене шоктымыж почеш муренна. Варажым «Югорно» кружокын участникше-влак дене районлаш концерт дене кошташ тӱҥалме. Шернур посёлкышто икымше гана шуко калык ончылно выступатленам. Моткоч тургыжланенам. Такшым кызытат сценыш лекме деч ончыч тургыжланем, йолем чытыра. А мураш тӱҥалмеке, чоныштем куаным веле шижам.

 - Дмитрий Конаков дене пырля мурымыдам шукынжо йӧратат. Кызыт дуэт дене у мурым лукташ шонет?

- Тудын дене икмыняр мурым пырля мурена. «Йӧратет гын, умылет» икымше мурына ару, ныжылге йӧратымаш нерген. Тудым Марий Эл радиошто чӱчкыдын колтеныт. Кызыт Дима Курыкмарий районышто ила. Вашлияш йӧн уке. Но ӱшанем, пырля эше у мурым возена. А вес артист дене дуэтым ышташ эше шонен омыл. Чылажат ончылно.

 - Могай композитор дене пашам ышташ сайрак?

- Ятыр муремлан семым Александр Мамаев келыштарен. Тудын дене моткоч куштылго пашам ышташ. Сай, шӱмеш логалше муро-влакым возен мошта. Такшым кӧ дене пашам ыштенам, чылан уста еҥ улыт. Пытартыш жапыште самырык возкалыше Вера Гордееван почеламутшо негызеш возымо мурым мурем. Мыйын шонымашем, чон шижмашем умылен мошта да тидым почеламут корнылаш воза.

 - Концертлаште еҥ-влак могай мурым тый дечет утларакшым мураш йодыт?

- «Йӧратет гын, умылет» да «Йоча пагыт» муро-влакым. Мутшат келге шонымашан улыт, семжат чоным тарватыше, садлан, очыни.  

 - Марий эстрадым ончалаш гын, кӧн творчествыже тылат утларак келша?

- Татьяна Соловьева ден Артур Ефремовын репертуарыштым сайлан шотлем.  

 - Ксюша, тый пиалан ава улат. Изи ӱдыретат музыклан шӱман мо? Ончыкшым пырля мурым мураш огыда шоно?

- Камила ӱдырем идалыкат вич тылзаш гына. Йоча музыкальный каналым ончаш моткоч йӧрата. Муро почеш кушта, мурашат толаша. Очыни, тыгай ийготышто чыла йоча тыге ыштылеш. Музык деке шӱман улмыжо ончыкшым палдырна гын, пырля ала муралтена. 

 - Творческий айдемын кумылжо вашке волен кертеш. Тыгай шижмаш тылат палыме?

- Чынак, кризис лиеда. Южгунамже мурымат ок шу, сценымат коден каяш шонем.  Йоча дене шинчыме годым творчествыш пӧртылаш кумыл лийын огыл. Но ешем, коллегем-влак (Эсмекплак тӱвыра пӧртыштӧ пашам ыштем), мыйым мурем колышташ йӧратыше-влак ой дене лыпландарен моштат, пашамым аклат.

 - Ончычсо дене таҥастарымаште, кызыт усталык илышыштет вашталтыш уло мо?   

- Илыш умылымашем вашталтын. Можыч, мыйым ончен, колыштын ситареныт манын шонем. Репертуарем эркын дене пойдаралтеш. 2017 ий годсек Эсмекпляк тӱвыра пӧрт пеленысе «Олык сем» фольклор ансамбльым (Авт. Тиде ансамбль нерген газетыштына материал 9 февральыште лектын)  вуйлатем. Ончыч чыла яра жапем творчествылан ойыренам гын, кызыт ешем дене лияш тыршем. 

 - Критике шотышто мом ойлен кертат.

- Шӱмеш налам. Иктаж осал ойым шке нерген колам гын, тидын нерген кужун шонен коштам. Адакшым палем, чылалан келшаш огеш лий.

 - Эрдене кынелын, шкендым воштончышыш ончалын, могай мурызым ужат?

- Урем дене ошкылшемла шуко гана тыге лийын. Мый дечем тый вет сай мурым мурышо улат манын йодыт. Тыгай годым мом ойлашат ӧрам, йошкарген веле каем. Вара могай мурышо улам ом пале, но мураш мурем манын вашештем. Садлан воштончышыш ончалмек, мый шкемым артист огыл, а тыглай айдемым ужам. Но концерт деч ончыч репетицийым воштончыш ончылно ыштем. 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: