"Рубрик деч посна", 2018 ий, Ага тылзын 11-ше кечыже

Шымлаш йöратыше ӱдыр журналист лияш шона

Статьян авторжо Елена Годунова

Элла  Шукерте огыл республикысе XXX краеведческий конференций лийын. Школышто тунемше-влак «Тоштер да йоча-влак» направленийлан келшыше паша-влакым шымленыт. «От истории экспоната к судьбе человека» секцийыште пашам ыштымыжлан, Морко посёлкысо 6-шо номеран школын тунемшыже Элла Ефимова 2-шо степенян лауреат лӱм дене палемдалтын.

Элла Морко район Лопнур ялыште шочын-кушкын. Ӱдырын 14 ийым темымешкыже ешыже ты ялыште илен, вара Морко посёлкыш куснен. Элла ондак Волаксола кыдалаш школышто, 7-ше класс деч вара Морко посёлкысо 6-шо номеран школышто тунемын. Кызыт 9-ше классышке коштеш. Тудо шуко жапым спортлан ойыра. Футболым моткоч йöрата, куштылго атлетике дене заниматла. Туризм кружокыш коштеш. Ӱдырын ойлымыж почеш, спорт да туризм кеч-могай ийготан еҥлан пайдале. Таза да кеч-могай ситуацийыштат йöным муын моштышо еҥ лийыт. Юнармия организаций дене пырля Элла эше военно-патриотический слётышто участвоватла.

- Марий йылме ден литературым тунемаш келша. Ты предмет-влак дене эртаралтше тӱрлö лудмо конкурслаште вием тергаш тыршем. «Живая классика» конкурсын республикысе этапышкыже логалынам ыле. Тений кугыжаныш марий йылме дене олимпиадыште районышто икымше, а республикыште нылымше лийынам. Шымлыме паша-влак моткоч келшат. Ондак руш йылме дене веле шымленам. Марий йылмым туныктышо Надежда Александровна Михайлова краеведений теме дене конкурс эртаралтеш манын, положенийжым ончыктен. Мыйынат тушто участвоватлаш кумыл лектын. Шымлыме теме Морко посёлкысо сувенирым ямдылыме цех нерген лийын. Тушто мемнан школын ик пашаеҥже ятыр ий тыршен. Тудо цех нерген каласкален, садлан тудын нерген утларак палыме шуын да шымлаш кумыл лектын. Конкурсын заочный этапше Моркышто эртаралтын, тушто икымше верым налынам. Заочный этап деч вара Йошкар-Олаште очный этап лийын. Тушто «Тоштер да йоча-влак» направленийыште 2-шо верым пуэныт. Мутат уке, тидлан моткоч куаненам, тидыже вес ганат иктаж вере таҥасаш кумылаҥда. Такшым мыланем кеч-могай конкурсышто участвоватлаш келша. Тыге моло-влакын опытыштлна, шинчымашыштлан эҥертен, кушкаш лиеш, — манеш Элла.

Элла школышто марий йылмым кугыжаныш йылме семын веле тунемеш гынат, мöҥгыштö шке гыч марий классик-влакын произведенийыштым лудеш, нунын возымо пашаштым шымла. Пӱртӱс, калык нерген возымым лудатат, чонем куана, манеш. Э.Ефимова профессиональный бокс дене кумданрак палыме лийнеже, МатчТВ телеканалыште пашам ышташ кугу шонымашыже уло. Тидлан журналистлан университетыш тунемаш пураш ямдылалташ тӱҥалын. Кызыт ӱдыр спорт дене кылдалтше чыла уверым эскера, вӱдышö-влак телевиденийыште кузе пашам ыштымыштым шымла.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: