"Улам мый Рве-зы-лык!" рубрик, 2018 ий, Ага тылзын 25-ше кечыже

Эн мотор студентке

Статьян авторжо Анастасия Эманова

Шукерте огыл Йошкар-Олаште «Студенчестве мисс — 2018» моторлык конкурс эртаралтын. Тушто марий ӱдыр Татьяна Яковлева эн чевер, эн ушан улмыжым ончыктен, жюрин кумылжым савырен.

yZ6UPp21_awВолжский район Нурмучаш ялын шочшыжо йоча годсек тӱрлӧ моторлык конкурсым ончаш йӧрата. Ӱдырлан пӱртӱс кап лывыргылыкым, мотор чурийвылышым пуэн. Тудо туныктышо ешыште шочын-кушкын. Кум шӱжарже уло. «Ачам Руслан Викторович, чаманен каласыман, кызыт тудо уке, Усола школышто физкультурым, технологийым да рисованийым туныктен, вара тусо школым петырымеке, Кугу Корамас школыш пашаш куснен. А авам Надежда Николаевна ИКН-ым туныкта, тыгак директорын воспитатлыме паша шотышто  алмаштышыже. Ешыште кум ӱдыр улына. Настя ден Катя шӱжырем-влак эше школышто тунемыт. Ача мемнам изинек спортлан шӱмаҥден. Мый школышто тунемме годым спорт ориентирований да туризм шотышто секцийыш коштынам, тӱрлӧ таҥасымаште участвоватленам. Ава мемнам сылнымутым йӧраташ туныктен. Тудо йочаж годым тӱрлӧ лудмаш конкурсышто участвоватлен. Тидлан кӧра Артек лагерьыш логалын. Меят шӱжарем-влак дене пырля Чавайн, Колумб лудмаште ятыр гана мастарлыкнам ончыктенна», – ойла Таня.

Т.Яковлева МарГУ-што йот йылме-влак факультетыште кокымшо курсышто тунемеш. Лингвист-кусарыше лияш ямдылалтеш. Студентке англичан йылмым сайын пала. 8-ше класс гычак йот йылме дене олимпиадыште участвоватлен. Туныктышыжо Роза Васильевна Захаровалан ты предметлан шӱмаҥдымыжлан таум ышта. «Яра жапем пеш чӱдӧ. Шуко тунемам, лудам, «Студенчестве мисс» конкурсышто сеҥыме деч вара фитнес рӱдерыш кызыт кошташ тӱҥалынам, тушко пӧлек шотеш абонементым пуэныт. Конкурсыш кандидатурем шке темленам. Утыжым тургыжланен омыл. «Маримедиа» сайтыште «Зрительын симпатийже мисс» номинацийыште арня жапыште йӱклымаш эртен. Тушто мылам эн шуко йӱкым пуэныт. Конкурсышто 16 ӱдыр пӱсӧ уш-акылнам, мутланен моштымынам, уста койышнам ончыктенна. Мый марла куштышаш улам ыле, но рвезе партнерем лийын огыл да кӱчык жапыште у номерым ямдылаш кӱлын. Акам (ачамын акажын ӱдыржӧ) «MYStudio» творчестве да хореографий студийыште пашам ышта. Тудын полшымыж дене аэробике куштымаш номерым ончыктенам. Ты конкурс шке виемлан ӱшаным луктын. Чыла участник чолга лийын. Но жюри эн шуко баллым мыланем пуэн. Тидыже, конешне, куан тулым чоныштем ылыжтен. Ынде 21-28 сентябрьыште Севастопольышто Российысе тыгаяк конкурсыш каяш ямдылалтам. Каласынем: кызытсе самырык ӱдыр-рвезе-влак кокла гыч шукыжо национальностьыштым шылташ шонат, руш улам манын ойлат. А мый марий улмем деч ом вожыл, кугешнем веле. Авам, ачам, ковам, кочам – чыланат марий улыт. Илышыште шке верыштым муыныт. Пошкудышткын, коллегыштын пагалымашыштым суленыт. Молан вара мый вожылшаш улам? Конкурсыш анкетым возымем годымат руш, англичан да марий йылме-влакым палымем возенам», – манеш  Студенчестве мисс.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: